ନବଜୋତ୍ ସିଂହ ସିଦ୍ଧୁଙ୍କର ମିଳୁନି ପତା… ଖୋଜି ଖୋଜି ନୟାନ୍ତ ହେଲେଣି ପୋଲିସ
ଅମୃତସର: କ୍ରିକେଟରରୁ ରାଜନେତା ହୋଇଥିବା ନବଜୋତ୍ ସିଂହ ସିଦ୍ଧୁଙ୍କୁ ବିହାର ପୋଲିସ ଗତ ଚାରି ଦିନ ହେବ ଖୋଜୁଛି। କିନ୍ତୁ ଏହି କଂଗ୍ରେସ ନେତାଙ୍କର କୌଣସି ପତ୍ତା ମିଳୁନାହିଁ। ଗତ ୪ ଦିନରୁ ଅମୃତସରରେ ସବ୍ ଇନ୍ସପେକ୍ଟର ଜାୱେଦ୍ ଅହମ୍ମଦ ଏବଂ ଜନାର୍ଦ୍ଦନ ସିଦ୍ଧୁଙ୍କୁ ଭେଟିବାକୁ ଚାହୁଁଥିଲେ, କିନ୍ତୁ ସେମାନେ ପ୍ରତିଦିନ ନିରାଶ ହୋଇ ଫେରନ୍ତି । ସିଦ୍ଧୁ ତାଙ୍କ ଘରେ ଅଛନ୍ତି ନା ନାହିଁ ସେ ବିଷୟରେ କେହି ଜାଣିନାହାନ୍ତି । ପୋଲିସ ଅଧିକାରୀଙ୍କ କହିବା ଅନୁସାରେ, ଏକ ଜାମିନ ପାଇଁ ତାଙ୍କ ଦସ୍ତଖତ ଆଣିବାକୁ ସେମାନେ ଲଗାତାର ୪ ଦିନ ଧରି ତାଙ୍କୁ ଭେଟିବାକୁ ଯାଉଛନ୍ତି । ହେଲେ ତାଙ୍କ ଦେଖାପାଉନାହାନ୍ତି ।
ସିଦ୍ଧୁଙ୍କ ସହ ଭେଟିବାକୁ ତାଙ୍କ ସିକ୍ୟୁରିଟି ଗାର୍ଡ ଅନୁମତି ଦେଉନାହାଁନ୍ତି। ସେପଟେ ଅମୃତସର ପୋଲିସ କମିଶନର ସୁଖଚେନ ସିଂ ଗିଲ କହିଛନ୍ତି ଯେ, ବିହାର ପୋଲିସ ଏଯାଏଁ ସ୍ଥାନୀୟ ପୋଲିସ ସହ କୌଣସି ଯୋଗାଯୋଗ କରିନାହାଁନ୍ତି । ବିହାରର ଉଭୟ ପୋଲିସ ଅଧିକାରୀ ବର୍ତ୍ତମାନ ଫେରିବା ମୁଡ୍ ରେ ନାହାଁନ୍ତି । ଏ ବାବଦରେ ବରିଷ୍ଠ ପୋଲିସ ଅଧିକାରୀଙ୍କ ନିର୍ଦ୍ଦେଶକୁ ଅପେକ୍ଷା କରିବେ ବୋଲି ସେମାନେ କହିଛନ୍ତି।
ନବଜୋତ୍ ସିଂହ ସିଦ୍ଧୁ ଅଭିଯୋଗ କରିଛନ୍ତି ଯେ, ସେ ଗତ ବର୍ଷ ଏପ୍ରିଲରେ ୧୬ ତାରିଖରେ କଟିହାରରେ ନିର୍ବାଚନ ପ୍ରଚାର ସମୟରେ ଏକ ଭାଷଣ ଦେଇଥିଲେ। ସେ କଂଗ୍ରେସ ପ୍ରାର୍ଥୀ ତାରିକ ଅନୱରଙ୍କ ସପକ୍ଷରେ ପ୍ରଚାର କରିବାକୁ ଆସିଥିଲେ। ପରେ କଟିହାରର ବାରସୋଇ ପୋଲିସ ଷ୍ଟେସନରେ ତାଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା। ଏହି ସମାବେଶକୁ ସମ୍ବୋଧିତ କରି ସେ କହିଥିଲେ ଯେ, ‘ଆପ (ମୁସଲମାନ ସମ୍ପ୍ରଦାୟ) ଏକଜୁଟ୍ ହେଲେ, ପ୍ରାର୍ଥୀ ତାରିକ ଅନୱରଙ୍କୁ କେହି ପରାସ୍ତ କରିପାରିବେ ନାହିଁ ।
ନବଜୋତ ସିଂହ ସିଦ୍ଧୁ ୨୦୧୭ରେ ବିଜେପି ଛାଡି କଂଗ୍ରେସରେ ସାମିଲ ହୋଇଥିଲେ। କଂଗ୍ରେସ ତାଙ୍କୁ କ୍ୟାବିନେଟରେ ମଧ୍ୟ ସ୍ଥାନ ଦେଇଥିଲେ। କିନ୍ତୁ ପରେ ମୁଖ୍ୟମନ୍ତ୍ରୀ ଅମରିନ୍ଦର ସିଂ ତାଙ୍କଠାରୁ ମନ୍ତ୍ରୀ ପଦ ଛଡ଼ାଇ ନେଇଥିଲେ। ସେବେଠାରୁ ସିଦ୍ଧୁ ଦଳରୁ ଅଲଗା ହୋଇଯାଇଥିଲେ। ଆଜିକାଲି, ୟୁଟ୍ୟୁବ୍ ଚ୍ୟାନେଲ ମାଧ୍ୟମରେ, ସିଏ ସର୍ବସାଧାରଣଙ୍କ ସାମ୍ନାରେ ନିଜ ତଥ୍ୟ ପ୍ରକାଶ କରନ୍ତି ।
