ଅଧା ରହିଗଲା ପୁଅକୁ ଡାକ୍ତର କରିବାର ସ୍ୱପ୍ନ
1 min read
ନୂଆଦିଲ୍ଲୀ: ଋଷର ସେନା କ୍ରମାଗତ ଭାବରେ ୟୁକ୍ରେନ ଉପରେ ବୋମା ବର୍ଷଣ ସହ ମିସାଇଲ ମାଡ଼ କରିଚାଲିଛି । ଏବେ ୟୁକ୍ରେନର ପରିସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି । ଋଷ ତରଫରୁ ଦାବି କରାଯାଉଛି ଯେ, ଏହା ସାମରିକ ବେସକୁ ଟାର୍ଗେଟ କରୁଛି ଆବାସିକ ଅଞ୍ଚଳଗୁଡିକ ନୁହେଁ କିନ୍ତୁ ଚିତ୍ର କିଛି ଭିନ୍ନ କାହାଣୀ କହୁଛି । କାରଣ ପ୍ରତ୍ୟେକ ଦିନ ସାଧାରଣ ନାଗରିକଙ୍କୁ ମୃତ୍ୟୁ ସାମ୍ନାକୁ ଆସୁଛି । ତେବେ ଋଷର ଆକ୍ରମଣରେ ୟୁକ୍ରେନରେ ମେଡ଼ିକାଲ ପଢୁଥିବା ଭାରତୀୟ ଛାତ୍ର ନବୀନ ଶେଖରପ୍ପାଙ୍କ ମୃତ୍ୟୁ ହୋଇଛି ।
ଜବାନ ପୁଅକୁ ହରାଇ ନବୀନଙ୍କ ବାପା ଏବେ ଦେଶର ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛନ୍ତି । ଡାକ୍ତର ହେବାର ସ୍ୱପ୍ନ ନେଇ MBBS ଅଧ୍ୟୟନ କରିବାକୁ ୟୁକ୍ରେନ ଯାଇଥିବା ନବୀନଙ୍କ ପିତା କହିଛନ୍ତି ଯେ ତାଙ୍କ ପୁଅ PUC ରେ ୯୭ ପ୍ରତିଶତ ମାର୍କ ରଖିଥିଲେ। ପିୟୁସିରେ ୯୭ ପ୍ରତିଶତ ମାର୍କ ହାସଲ କରିବା ସତ୍ତ୍ୱେ ତାଙ୍କ ପୁଅକୁ ରାଜ୍ୟରେ ମେଡିକାଲ ସିଟ୍ ମିଳିପାରି ନଥିଲେ । ତେଣୁ ସେ ତାଙ୍କ ପୁଅକୁ ୟୁକ୍ରେନ ପଠାଇଥିଲେ । କାରଣ ମେଡିକାଲରେ ସିଟ୍ ପାଇବା ପାଇଁ ଯେଉଁଠି କୋଟି କୋଟି ଟଙ୍କା ଖର୍ଚ୍ଚ କରିବାକୁ ପଡୁଛି ସେଠି କମ୍ ଟଙ୍କା ଖର୍ଚ୍ଚ କରି ବିଦେଶରେ ସମାନ ଶିକ୍ଷା ଲାଭ କରିହେଉଛି ।
ସୂଚନାଯୋଗ୍ୟ ଯେ, କର୍ଣ୍ଣାଟକର ହାବେରି ନିବାସୀ ନବୀନ ଶେଖରପ୍ପା, ଖାରକିଭରେ ଏମବିବିଏସ ଅଧ୍ୟୟନ କରୁଥିବା ବେଳେ ଋଷ ସୈନ୍ୟଙ୍କ ଗୁଳିରେ ନିହତ ହୋଇଥିଲେ । ନବୀନଙ୍କ ମୃତ୍ୟୁ ବିଷୟରେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି । ଏହି ଘଟଣା ପରେ ପ୍ରଧାନମନ୍ତ୍ରୀ ମୋଦୀ ମଧ୍ୟ ନବୀନଙ୍କ ପିତାଙ୍କ ସହ ଫୋନରେ କଥା ହୋଇ ନବୀନଙ୍କ ପରିବାରକୁ ସାନ୍ତ୍ୱନା ଦେଇଛନ୍ତି। କର୍ଣ୍ଣାଟକର ମୁଖ୍ୟମନ୍ତ୍ରୀ ବାସବରାଜ ବେମ୍ମାଇ ମଧ୍ୟ କହିଛନ୍ତି ଯେ ସରକାର ନବୀନଙ୍କ ମୃତଦେହକୁ ୟୁକ୍ରେନରୁ ଆଣିବାକୁ ଚେଷ୍ଟା କରୁଛନ୍ତି।
