ଗଞ୍ଜାମ : ପୂର୍ବ ସରକାର ଘର ଦେଇଥିଲେ। ଏବର ସରକାର ଘରୁ ବେଦଖଲ କରିବାକୁ ଦେଇଛନ୍ତି ନୋଟିସ। ଷ୍ଟାଡିୟମ ନିର୍ମାଣ ପାଇଁ ସରକାରୀ ଉଚ୍ଛେଦ ନୋଟିସ ପାଇବା ପରେ ଏପରି କ୍ଷୋଭ ପ୍ରକାଶ କରିଛନ୍ତି ଆସିକା ବ୍ଲକ କାଳଷଣ୍ଢପୁର ପଞ୍ଚାୟତ ଏରୋଗୋଲା ସାହିର ୪୦ ପରିବାର। ପ୍ରଶାସନିକ ଅଧିକାରୀଙ୍କୁ ଗୁହାରି କଲେ ବି କିଛି ଫରକ ପଡ଼ିନି।
ନବୀନ ଯୋଗାଇଥିଲେ ଘର। ବିଜେପି ସରକାର ଘର ଖାଲି କରିବାକୁ ଦେଇଛନ୍ତି ନୋଟିସ। ଷ୍ଟାଡିୟମ ନିର୍ମାଣ ପାଇଁ ଗଞ୍ଜାମ ଜିଲ୍ଲା ଆସିକା ବ୍ଲକ କାଳଷଣ୍ଢପୁର ପଞ୍ଚାୟତ ଏରୋଗୋଲା ସାହି ଲୋକେ ନୋଟିସ ପାଇବା ପରେ ଚିନ୍ତାରେ। ଦୀର୍ଘ ବର୍ଷ ଧରି ଏରୋଗୋଲା ସାହିରେ ୪୦ ପରିବାର ବସବାସ କରିଆସୁଛନ୍ତି । ଲୋକଙ୍କୁ ଘରବାରି ପଟ୍ଟା ବି ମିଳି ସାରିଛି । ଏମାନଙ୍କ ସୁବିଧା ପାଇଁ ସରକାର ପାନୀୟ ଜଳ, ରାସ୍ତା ଘାଟ ସାଙ୍ଗକୁ ସ୍କୁଲ ବ୍ୟବସ୍ଥା କରିଛନ୍ତି । ହେଲେ ଏଠାରେ ଥିବା ଖେଳପଡିଆକୁ ସଂପ୍ରାସରଣ କରିବାକୁ ସମସ୍ତ ପରିବାରକୁ ଉଚ୍ଛେଦ କରିବାକୁ ସରକାର ନୋଟିସ ଜାରି କରାଯାଇଛି ।
ଉଚ୍ଛେଦ ନୋଟିସ ପାଇଥିବା ଲୋକେ କେଉଁଠିକୁ ଯିବେ ? କଣ କରିବେ ? ଏନେଇ ସ୍ଥାନୀୟ ପ୍ରଶାସନଠୁ ଆରମ୍ଭ କରି ଜିଲ୍ଲାପାଳଙ୍କ ନିକଟକୁ ଦୌଡି ଦୌଡି ନୟାନ୍ତ ହେଲେଣି । ହେଲେ କେହି ଶୁଣୁନାହାନ୍ତି । ଏବେ ଏକାଠି ହୋଇଛନ୍ତି ସାହିବାସିନ୍ଦା । ଭଞ୍ଜନଗର ଉପଜିଲ୍ଲାପାଳ କହିଛନ୍ତି, ଉଚ୍ଛେଦ ପରିବାରକୁ ସମସ୍ତ ସୁବିଧା ଯୋଗାଇ ଦିଆଯିବ ।
