ନନ୍ଦିଘୋଷ ଟିିଭିର ସ୍ବନକ୍ଷତ୍ର ଅବସରରେ ପୂର୍ବତନ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧିତ କଲେ ସାଂସଦ ମାନସ ମଙ୍ଗରାଜ

ଭୁବେନଶ୍ବର: ଆଜି ନନ୍ଦିଘୋଷ ଟିଭିର ସ୍ବନକ୍ଷତ୍ର ଦିବସ ଅବସରରେ ଜାତି ନନ୍ଦିଘୋଷ କନକ୍ଲେଭ ୨୦୨୫ ଅନୁଷ୍ଠିତ ହୋଇଥିଲା । ଏହି ଅବସରରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାଂସଦ ମାନସ ମଙ୍ଗରାଜ ମଞ୍ଚ ଉପରେ ସମ୍ବର୍ଦ୍ଧିତ କରିଥିଲେ । ନବୀନଙ୍କ ପରି ଜଣେ ରାଷ୍ଟ୍ରନାୟକଙ୍କ ପାଇଁ ଏହି ମୁହୂର୍ତ୍ତ ନିଶ୍ଚିତ ଭାବେ ଏକ ନିଆରା ଥିଲା । କାର୍ଯ୍ୟକ୍ରମରେ ସାମିଲ ହୋଇଥିବା ଅତିଥି ଓ ଟିଭି ତଥା ସୋସିଆଲ ମିଡ଼ିଆରେ ଏହି କାର୍ଯ୍ୟକ୍ରମକୁ ଦେଖୁଥିବା ଦର୍ଶକ କିଛି ମୁହୂର୍ତ୍ତ ପାଇଁ ଭାବପ୍ରବଣ ହୋଇଉଠିଥିଲେ । ଆଜି ବି ନବୀନଙ୍କ ପ୍ରତି କୋଟି କୋଟି ଓଡ଼ିଶାବାସୀଙ୍କର ରହିଛି ଅତୁଟ ଭଲପାଇବା । ଏହା ପୁଣି ଥରେ ହୋଇଛି ପ୍ରମାଣିତ ।

ମୁଖ୍ୟ ଅତିଥି ଭାବେ ଯୋଗଦେଇ ବିରୋଧୀ ଦଳ ନେତା ନବୀନ ପଟ୍ଟନାୟକ ଜୟ ଜଗନ୍ନାଥରୁ ତାଙ୍କ ବକ୍ତବ୍ୟ ଆରମ୍ଭ କରିଥିଲେ। ନନ୍ଦିଘୋଷ ଟିଭିର ଜାତି ନନ୍ଦିଘୋଷରେ ଯୋଗ ଦେଇ ବହୁତ ଖୁସି ବୋଲି କହିଥିଲେ ନବୀନ। ନନ୍ଦିଘୋଷ ଶବ୍ଦ ଓଡ଼ିଆ ଜାତିର ସମ୍ପର୍କର ଭାବପ୍ରବଣତା ରହିଛି। ନନ୍ଦିଘୋଷ ନାମ ନେଲେ ମହାପ୍ରଭୁଙ୍କ ରୂପ ଆଖି ଆଗକୁ ଆସିଯାଏ। ଆଶା କରୁଛି ନନ୍ଦିଘୋଷ ଟିଭି ଲୋକଙ୍କ ଓଡ଼ିଆ ଲୋକଙ୍କ ବିକାଶ ଯାତ୍ରାକୁ ଆହୁରି ଆଗକୁ ନେବାରେ ସହାୟକ ଭୂମିକା ନେବ ବୋଲି କହିଥିଲେ ନବୀନ। ଗଣତନ୍ତ୍ରରେ ଗଣମାଧ୍ୟମ ହେଉଛି ଲୋକଙ୍କ ସ୍ଵର। ଲୋକଙ୍କ ସ୍ଵାର୍ଥ ପାଇଁ ଗଣମାଧ୍ୟମ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରିବା ଉଚିତ। ସମସ୍ତ ଚାପ ସତ୍ଵେ ସତ୍ୟର ପ୍ରତୀକ ଭାବେ ଗଣମାଧ୍ୟମ ରହିବା ଆବଶ୍ୟକ। ମିଛ ଓ ଭୁଲ୍ ଖବର ଲୋକଙ୍କ ନିକଟରେ ପହଞ୍ଚାଇବାରେ ଗଣମାଧ୍ୟମ ଦୂରରେ ରହିବା ଆବଶ୍ୟକ ବୋଲି କହିଥିଲେ ନବୀନ।

ଜାତି ନନ୍ଦିଘୋଷ କନକ୍ଲେଭ୍ -୨୦୨୫ରେ ଯୋଗଦେଇ ସ୍ଵାଗତ ଭାଷଣ ରଖିଥିଲେ ନନ୍ଦିଘୋଷ ଟିଭି ସିଓଓ ଜବର ସିଂ ପନୱର ନନ୍ଦିଘୋଷ ଟିଭି ମୁଖ୍ୟ ସମ୍ପାଦକ ଶିଶିର ଭଟ୍ଟମିଶ୍ର ।  ଏହି ଅବସରରେ ନନ୍ଦିଘୋଷ ଟିଭି ଓ ସକାଳ ଖବରକାଗଜ ମୁଖ୍ୟ ତଥା ରାଜ୍ୟସଭା ସାଂସଦ ମାନସ ରଞ୍ଜନ ମଙ୍ଗରାଜ ଯୋଗଦେଇ ତାଙ୍କ ବକ୍ତବ୍ୟ ରଖିଥିଲେ । ପ୍ରଶାସନରେ ଥିବା ତୃଟି ଓ ବିଚ୍ୟୁତିର ସକାରାତ୍ମକ ସମାଧାନ ପାଇଁ କାର୍ଯ୍ୟ କରିବୁ। ଏହି ପଣକୁ ସାକାର କରିବାକୁ ନନ୍ଦିଘୋଷ ଟିଭି ଆରମ୍ଭ ହୋଇଥିଲା ଓ ପରେ ସକାଳ ସମ୍ବାଦପତ୍ର ପ୍ରକାଶ ପାଇଥିଲା। ସମାଜର ଶେଷ ଧାଡ଼ିର ଲୋକଙ୍କ ନିକଟରେ ପହଞ୍ଚି ପାରିଛୁ। ପ୍ରତିଟି ଲୋକଙ୍କ କଥା ଦର୍ଶକ ଓ ପାଠକଙ୍କ ନିକଟରେ ପହଞ୍ଚାଇବାରେ କେତେକ ସଫଳ ହୋଇଛୁ। ସବୁ ଘାତ ପ୍ରତିଘାତ ସତ୍ଵେ ଓଡ଼ିଶାର ସ୍ଵର ଭାବେ ପରିଣତ ହୋଇଛି ବୋଲି କହିଥିଲେ ନନ୍ଦିଘୋଷ ଟିଭି ଓ ସକାଳ ଖବରକାଗଜ ଅଧ୍ୟକ୍ଷ ମାନସ ମଙ୍ଗରାଜ।