ନନ୍ଦିଘୋଷ ବ୍ୟୁରୋ: ବର୍ଷା ଋତୁ ଆସିବା ସହିତ ଅନେକଙ୍କଠାରେ ଗଣ୍ଠିବାତ ସମସ୍ୟା ବଢ଼ିଯାଏ। ବିଶେଷକରି ଆଣ୍ଠୁ, ଅଣ୍ଟା, କାନ୍ଧରେ ବ୍ୟଥା ଭାବ ଅନୁଭୂତ ହୁଏ। ବିଶେଷଜ୍ଞଙ୍କ କହିବା ଅନୁସାରେ, ଏହା କେବଳ ଧାରଣା ନୁହେଁ, ବରଂ ଏହା ପଛରେ ବୈଜ୍ଞାନିକ କାରଣ ରହିଛି। ଚିକିତ୍ସକମାନେ ଗଣ୍ଠିର ସ୍ୱାସ୍ଥ୍ୟ ପ୍ରତି ସଚେତନ ରହିବାକୁ ପରାମର୍ଶ ଦେଇଛନ୍ତି।
ଅର୍ଥୋପେଡିକ୍ ବିଶେଷଜ୍ଞମାନଙ୍କ କହିବା ଅନୁସାରେ, ବର୍ଷା ଦିନରେ ବାୟୁମଣ୍ଡଳୀୟ ଚାପ (Barometric Pressure) କମିଯାଏ। ଏହାର ପ୍ରଭାବ ଯୋଡ଼ର ଟିସ୍ୟୁ ଉପରେ ପଡ଼ିଥାଏ। ଯେଉଁମାନଙ୍କର ପୂର୍ବରୁ ଗଣ୍ଠିବାତରେ ସମସ୍ୟା ରହିଛି, ସେମାନଙ୍କର ବ୍ୟଥା ଅଧିକ ବଢ଼ିପାରେ। ଅନେକ ରୋଗୀ ବର୍ଷା ଆରମ୍ଭ ପୂର୍ବରୁ ମଧ୍ୟ ଯୋଡ଼ରେ ଭାରିପଣ କିମ୍ବା ବ୍ୟଥା ଅନୁଭବ କରନ୍ତି।
ବର୍ଷା ଋତୁରେ ବାୟୁରେ ଆର୍ଦ୍ରତା ବଢ଼ିଯିବାରୁ ମାଂସପେଶୀ ଓ ଲିଗାମେଣ୍ଟ ଅଧିକ କଠିନ ଅନୁଭୂତ ହୁଏ। ଫଳରେ ଚାଲିବା, ବସିବା କିମ୍ବା ଉଠିବାରେ ଅସୁବିଧା ହୁଏ। ବିଶେଷକରି ସକାଳେ ଉଠିବାବେଳେ ଆଣ୍ଠୁ କିମ୍ବା ଅଣ୍ଟାରେ ବ୍ୟଥା ଭାବ ଅଧିକ ଅନୁଭୂତ ହୁଏ।
ବର୍ଷା ଦିନରେ ଶାରୀରିକ କାର୍ଯ୍ୟକଳାପ କମିଯିବା ମଧ୍ୟ ଏହାର ଏକ ପ୍ରମୁଖ କାରଣ। ଘରେ ଅଧିକ ସମୟ ରହିବା ଓ ବ୍ୟାୟାମ ନ କରିବା ଯୋଗୁଁ ମାଂସପେଶୀ ଦୁର୍ବଳ ହୋଇପଡ଼େ। ଏହାଛଡ଼ା ସୂର୍ଯ୍ୟକିରଣ କମ୍ ମିଳିବାରୁ ଶରୀରରେ ଭିଟାମିନ୍–ଡିର ଅଭାବ ଦେଖାଦେଇ ହାଡ଼ ଓ ମାଂସପେଶୀର ସ୍ୱାସ୍ଥ୍ୟ ପ୍ରଭାବିତ ହୋଇପାରେ।
ବିଶେଷଜ୍ଞମାନଙ୍କ କହିବା ଅନୁସାରେ, ବର୍ଷା ଋତୁ କୌଣସି ନୂଆ ରୋଗ ସୃଷ୍ଟି କରେନାହିଁ, କିନ୍ତୁ ପୂର୍ବରୁ ଥିବା ସମସ୍ୟାର ଲକ୍ଷଣକୁ ଅଧିକ ସ୍ପଷ୍ଟ କରିଦିଏ। ଅଷ୍ଟିଓଆର୍ଥରାଇଟିସ୍, ରିଉମାଟଏଡ୍ ଆର୍ଥରାଇଟିସ୍, ପୁରୁଣା ହାଡ଼ ଭାଙ୍ଗିବା, ଖେଳ ସମୟରେ ଲାଗିଥିବା ଆଘାତ କିମ୍ବା ନି–ରିପ୍ଲେସମେଣ୍ଟ କରାଇଥିବା ରୋଗୀମାନେ ଏହି ସମୟରେ ଅଧିକ ସମସ୍ୟାର ସମ୍ମୁଖୀନ ହୋଇଥାନ୍ତି।
ବର୍ଷା ଋତୁରେ ଯୋଡ଼ର ଯତ୍ନ ପାଇଁ ପରାମର୍ଶ:
- ପ୍ରତିଦିନ ୩୦ରୁ ୪୦ ମିନିଟ୍ ହାଲୁକା ଚାଲିବା କିମ୍ବା ବ୍ୟାୟାମ କରନ୍ତୁ।
- ଦୀର୍ଘ ସମୟ ଧରି ଗୋଟିଏ ସ୍ଥାନରେ ବସି ରୁହନ୍ତୁ ନାହିଁ।
- ଯୋଡ଼କୁ ଥଣ୍ଡା ଓ ଆର୍ଦ୍ର ପରିବେଶରୁ ସୁରକ୍ଷିତ ରଖନ୍ତୁ।
- କ୍ୟାଲସିୟମ୍ ଓ ଭିଟାମିନ୍–ଡି ଯୁକ୍ତ ସନ୍ତୁଳିତ ଖାଦ୍ୟ ଗ୍ରହଣ କରନ୍ତୁ।
- ଡାକ୍ତରଙ୍କ ପରାମର୍ଶ ଅନୁଯାୟୀ ନିୟମିତ ଫିଜିଓଥେରାପି କରନ୍ତୁ।
ଯଦି ବ୍ୟଥା ସହିତ ଜ୍ୱର କିମ୍ବା ଚାଲିବାରେ ଗୁରୁତର ଅସୁବିଧା ଦେଖାଦିଏ, ତେବେ ଏହାକୁ କେବଳ ପାଣିପାଗର ପ୍ରଭାବ ବୋଲି ଅବହେଳା କରନ୍ତୁ ନାହିଁ। ତୁରନ୍ତ ଅର୍ଥୋପେଡିକ୍ ବିଶେଷଜ୍ଞଙ୍କ ପରାମର୍ଶ ନିଅନ୍ତୁ। ସମୟୋପଯୋଗୀ ଚିକିତ୍ସା, ନିୟମିତ ବ୍ୟାୟାମ ଏବଂ ସକ୍ରିୟ ଜୀବନଶୈଳୀ ଯୋଡ଼କୁ ସୁସ୍ଥ ରଖିବାର ସବୁଠୁ ପ୍ରଭାବଶାଳୀ ଉପାୟ।
