UFOକୁ ନେଇ ନାସା ରିପୋର୍ଟରେ ଖୁଲାସା, ପୃଥିବୀ ବାହାରେ ମଧ୍ୟ ଜୀବନ ଅଛି !

ନନ୍ଦିଘୋଷ ବ୍ୟୁରୋ: ଆମେରିକାର ସ୍ପେସ୍ ଏଜେନ୍ସି ନାସା ଗୁରୁବାର UFO (ଅନ୍ ଆଇଡେଣ୍ଟିଫାଏଡ ଫ୍ଲାଇଙ୍ଗ ଅବଜେକ୍ଟସ) ଉପରେ ଆଧାର କରି ବହୁ ପ୍ରତୀକ୍ଷିତ ରିପୋର୍ଟ ପ୍ରକାଶ କରିଛି । ନାସା ଏକ ବର୍ଷ ପାଇଁ UFO ର ବିଷୟ ଅଧ୍ୟୟନ କରିଛି ଏବଂ ଏବେ ରିପୋର୍ଟ ପ୍ରକାଶ କରିଛି, ଯାହା ସମଗ୍ର ବିଶ୍ୱର ଦୃଷ୍ଟି ଆକର୍ଷଣ କରିଛି । ଏହି ୩୩ ପୃଷ୍ଠାର ରିପୋର୍ଟରେ ନାସା କହିଛି ଯେ ଅସ୍ପଷ୍ଟୀକୃତ ଘଟଣା ପଛରେ ଏଲିଏନ୍ସ ଅଛନ୍ତି ବୋଲି କୌଣସି ପ୍ରମାଣ ନାହିଁ, କିନ୍ତୁ ନାସା ଏହାର ସମ୍ଭାବନାକୁ ଏଡ଼ାଇ ଦେଇନାହିଁ। ନାସା କହିଛି ଯେ ଏହି ବିଷୟ ଉପରେ ବିସ୍ତୃତ ଅଧ୍ୟୟନ ପାଇଁ ନୂତନ ବୈଜ୍ଞାନିକ କୌଶଳ ଏବଂ ଉନ୍ନତ ଉପଗ୍ରହ ଆବଶ୍ୟକ ହେବ ।

ଏହି ରିପୋର୍ଟରେ ନାସା ସ୍ୱାକାର କରିଛି ଯେ UFO ଆମ ଗ୍ରହର ସବୁଠାରୁ ବଡ ରହସ୍ୟ ଅଟେ । ଏହି ରିପୋର୍ଟ ପ୍ରକାଶ କରି ନାସା ମ୍ୟାନେଜର ବିଲ୍ ନେଲସନ କହିଛନ୍ତି ଯେ ପୃଥିବୀ ବ୍ୟତୀତ ଏହି ବ୍ରହ୍ମାଣ୍ଡରେ ଜୀବନ ଅଛି ବୋଲି ସେ ବିଶ୍ୱାସ କରନ୍ତି ।  ନାସା କହିଛି ଯେ ସେ ଯେଉଁ ନୂଆ ମିଶନର ଯୋଜନା କରୁଛି ସେଥିରେ ଗ୍ରହର ବାତାବରଣ ଏବଂ ପୃଷ୍ଠରେ ଏଲିଏନ୍ସ ଜ୍ଞାନକୌଶଳର ଚିହ୍ନଟ କରିବାକୁ ଚେଷ୍ଟା କରିବ । ନାସା ଏହା ମଧ୍ୟ କହିଛି ଯେ ସେ ୟୁଏଫଓ ଉପରେ ରିସର୍ଚ୍ଚ ପାଇଁ ନୂଆ ନିର୍ଦ୍ଦେଶକଙ୍କ ଘୋଷଣା କରିବ ।

ରିପୋର୍ଟରେ କୁହାଯାଇଛି ଯେ ପୃଥିବୀ ଉପରେ ନଜର ରଖୁଥିବା ସାଟେଲାଇଟସରେ ସ୍ପୋଟିୟଲ ରିଜୋଲ୍ୟୁସନର ଅଭାବ ରହିଛି, ଯେଉଁ କାରଣରୁ ୟୁଏଫଓ ବା ୟୁଏପି ଭଳି ଛୋଟ ଅବଜେକ୍ଟସ ଉପରେ ନଜର ରଖାଯାଇପାରିବ ନାହିଁ । ପେଣ୍ଟାଗନ ପୂର୍ବରୁ ଏକ ଭିଡିଓ ଜାରି କରିଥିଲା, ୟେଉଁଥିରେ ନୌସେନାର ପାଇଲଟ ଆମେରିକାର ପୂର୍ବ ଏବଂ ପଶ୍ଚିମ ଉପକୂଳରେ କିଛି ରହସ୍ୟମୟୀ ବିମାନ ଦେଖିଥିଲେ । ଏହି ବିମାନର ଗତି ବର୍ତ୍ତମାନର ବିମାନ ଚଳାଚଳ ପ୍ରଯୁକ୍ତିବିଦ୍ୟାଠୁ ଅଧିକ ଥିଲା ଏବଂ ବିମାନର ଡିଜାଇନ ମଧ୍ୟ ରହସ୍ୟମୟ ଥିଲା, ଯେଉଁ କାରଣରୁ ବିମାନଟି କେଉଁଠାରୁ ନିୟନ୍ତ୍ରିତ ହେଉଥିଲା ତାହା ଜଣାପଡ଼ିନଥିଲା ।

ନାସା କହିଛି ଯେ ଏଆଇ ଏବଂ ମେଶିନ ଲର୍ଣ୍ଣିଂ ଜ୍ଞାନକୌଶଳ ସହାୟତାରେ ୟୁଏଫଓକୁ ନେଇ ଅଧ୍ୟୟନ କରାଯିବ । ଚଳିତ ବର୍ଷ ଆରମ୍ଭରେ ନାସାର ଏକ ଟିମ୍ ଜୋର ଦେଇ କହିଥିଲା ଯେ ୟୁଏଫଓ ସହ ସମ୍ବନ୍ଧିତ ଆଲୌକିକ ଜୀବନର କୌଣସି ଚରମ ପ୍ରମାଣ ନାହିଁ କିନ୍ତୁ ବର୍ତ୍ତମାନ ସଦ୍ୟତମ ରିପୋର୍ଟରେ ନାସା ସ୍ୱୀକାର କରିଛି ଯେ ଆମ ଗ୍ରହ ବାହାରେ ମଧ୍ୟ ଜୀବନ ଥାଇପାରେ । ନାସା କହିଛି ଯେ ଏପର୍ଯ୍ୟନ୍ତ ପର୍ଯ୍ୟାପ୍ତ ତଥ୍ୟ ନାହିଁ, ଯେଉଁ କାରଣରୁ ୟୁଏଫଓକୁ ନେଇ କୌଣସି ସିଦ୍ଧାନ୍ତ ଉପରେ ପହଞ୍ଚିହେବ ନାହିଁ ।