ଅର୍ଥନୀତିରେ ସୁଧାର ପାଇଁ ମୋଦିଙ୍କ ଉଚ୍ଚସ୍ତରୀୟ ବୈଠକ, ନିବେଷକଙ୍କୁ ଆକର୍ଷିତ କରିବାକୁ ଯୋଜନା

କରୋନା ମହାମାରୀରୁ ପ୍ରଥମେ ଜୀବନ ରକ୍ଷା କରିବା ପରେ ସରକାର ଏବେ ଆର୍ଥିକ ସ୍ଥିତିରେ ସୁଧାର ଆଣିବାକୁ ଚେଷ୍ଟା ଆରମ୍ଭ କରିଛନ୍ତି । ଗତ ମାର୍ଚ୍ଚ 25ରୁ ସମଗ୍ର ଦେଶରେ ଲକ୍‌ଡାଉନ୍ ସ୍ଥିତି ଜାରି ରହିଛି । ଯେଉଁଥିପାଇଁ ଅର୍ଥନୀତିକୁ ଏକ ବଡ଼ ଝଟକା ଲାଗିଛି । ଅର୍ଥନୈତିକ କାରବାରରେ ଅସ୍ଥିରତା କାରଣରୁ ବିକାଶର ଗତି ଧୀମା ହୋଇଯାଇଛି । ଏଭଳି ପରିସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଦେଶୀ ପୁଞ୍ଜି ନିବେଶକାରୀଙ୍କୁ ଆକର୍ଷିତ କରିବା ଏବଂ ଘରୋଇ ପୁଞ୍ଜି ବିନିଯୋଗକୁ ତ୍ୱରାନ୍ୱିତ କରିବା ସହ ଦେଶର ଅର୍ଥନୀତିକୁ ପୁନର୍ଜୀବିତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି । ଏହି ବୈଠକରେ ଗୃହମନ୍ତ୍ରୀ ଅମିତ ଶାହା, ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସମେତ ସମସ୍ତ ଅଧିକାରୀ ଉପସ୍ଥିତ ଥିଲେ ।

PM Narendra Modi today held a comprehensive meeting to discuss strategies to attract more foreign investments into India as well as to promote local investments in order to give a boost to the economy against the backdrop of the #COVID19 Pandemic: Prime Minister's Office pic.twitter.com/oPbw2Rx7gI

— ANI (@ANI) April 30, 2020

କ୍ଲିୟରାନ୍ସ ପ୍ରକ୍ରିୟା ସହଜ ହେବା ଉଚିତ୍

ବୈଠକରେ ପ୍ରଧାନମନ୍ତ୍ରୀ କହିଛନ୍ତି ଯେ ନିବେଶକମାନେ ଯେଭଳି କୌଣସି ସମସ୍ୟାର ସମ୍ମୁଖୀନ ନହେବେ ସେନେଇ ବିଶେଷ ଧ୍ୟାନ ଦେବା ଉଚିତ୍ । କେନ୍ଦ୍ରୀୟ ଏବଂ ରାଜ୍ୟ ସ୍ତରରେ ସେମାନଙ୍କୁ କ୍ଲିୟରାନ୍ସ ସମ୍ବନ୍ଧରେ ଯେଭଳି କୌଣସି ସମସ୍ୟା ନଉପୁଜେ ଏବଂ ଏହି ପ୍ରକ୍ରିୟାରେ ଲାଗୁଥିବା ସମୟ ଯେଭଳି ହ୍ରାସ କରାଯିବ ସେନେଇ ବ୍ୟବସ୍ଥା କରାଯିବା ଉଚିତ୍‌ । ବୈଠକରେ ଆହୁରି ମଧ୍ୟ କୁହାଯାଇଛି ଯେ, ଦେଶରେ ଶିଳ୍ପ ଜମି/ ପ୍ଲଟ୍ର ଭିତ୍ତିଭୂମିକୁ ପ୍ରୋତ୍ସାହିତ କରିବା ପାଇଁ ଏକ ଯୋଜନା ପ୍ରସ୍ତୁତ କରାଯିବା ସହ ଆବଶ୍ୟକ ଆର୍ଥିକ ସହାୟତା ପ୍ରଦାନ କରାଯିବା ଉଚିତ୍ ।

୨୭ ଏପ୍ରିଲରେ, ଯେତେବେଳେ ପ୍ରଧାନମନ୍ତ୍ରୀ ମୋଦି ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ, ସେତେବେଳେ ମଧ୍ୟ ସେ ବିଦେଶୀ ପୁଞ୍ଜି ନିବେଶକାରୀଙ୍କ ପାଇଁ ସମସ୍ତ ସୁବିଧା କରାଇବାକୁ ପରାମର୍ଶ ଦେଇଥିଲେ ।

ନିବେଶକମାନେ ଚୀନ୍‌ର ବିକଳ୍ପ ଖୋଜୁଛନ୍ତି

ବାସ୍ତବରେ, ଅନେକ ରିପୋର୍ଟରେ କୁହାଯାଇଛି ଯେ କରୋନା ମହାମାରୀ ମଧ୍ୟରେ ସମଗ୍ର ବିଶ୍ୱରୁ ବିଭିନ୍ନ କମ୍ପାନୀ ଏବଂ ନିବେଶକମାନେ ଚୀନ୍‌ର ବିକଳ୍ପ ଖୋଜୁଛନ୍ତି ଆଉ ସେମାନେ ଭାରତ ଉପରେ ନଜର ରଖିଛନ୍ତି । ଅର୍ଥନୖତିକ ବିଶେଷଜ୍ଞମାନେ ଏହା ମଧ୍ୟ କହିଛନ୍ତି ଯେ, ଏହା ଭାରତ ପାଇଁ ଏକ ସୁବର୍ଣ୍ଣ ସୁଯୋଗ । ଯଦି ଭାରତ ଏହି ସୁଯୋଗର ଲାଭ ଉଠାଏ, ତେବେ ଆଗାମୀ ଦିନରେ ଭାରତ ସାରା ବିଶ୍ୱରେ ଯୋଗାଣ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ।