ଋଷିଙ୍କୁ ନେଇ କ’ଣ କହିଲେ ଶ୍ୱଶୁର ନାରାୟଣ ମୁର୍ତ୍ତି ?

ନୂଆଦିଲ୍ଲୀ: ଭାରତୀୟ ବଶୋଦ୍ଭବ ଋଷି ସୁନକ ବ୍ରିଟେନର ପ୍ରଧାନମନ୍ତ୍ରୀ ହେବା ପରେ ବ୍ରିଟେନ ସମେତ ଭାରତରେ ଉତ୍ସାହର ମାହୋଲ୍ ଦେଖାଦେଇଛି । କାରଣ ଜଣେ ଭାରତୀୟ ବଶୋଦ୍ଭବ ଭାବେ ସୁନକ ପ୍ରଥମ ଥର ପାଇଁ  ବ୍ରିଟେନ୍ ସରକାରରେ ସବୁଠୁ ବଡ଼ ପଦ ସମ୍ଭାଳିବେ । ତେବେ ସୁନକ ପ୍ରଧାନମନ୍ତ୍ରୀ ହେବା ପରେ ଦେଶର ସବୁଠୁ ବଡ଼ ଟେକ୍ କମ୍ପାନୀ ଇନଫୋସିସର ସହ-ପ୍ରତିଷ୍ଠାତା ତଥା ସୁନକଙ୍କ ଶ୍ୱଶୁର ଏନ.ଆର ନାରାୟଣ ମୁର୍ତ୍ତି ପ୍ରଥମ ଥର ପାଇଁ ବୟାନ ଦେଇଛନ୍ତି ।

ନାରାୟଣ ମୁର୍ତ୍ତି ଜ୍ୱାଇଁଙ୍କ ସଫଳତାରେ କହିଛନ୍ତି- ଆମେ ଗର୍ବିତ । ମୁଁ ତାଙ୍କର ଆହୁରି ଉନ୍ନତି କାମନା କରୁଛି । ୟୁନାଇଟେଡ୍ କିଙ୍ଗଡମର ଲୋକଙ୍କ ପାଇଁ ସେ ସବୁଠୁ ଭଲ କାମ କରିବେ ବୋଲି ଆମର ବିଶ୍ୱାସ ରହିଛି ।

ଇନଫୋସିସର ସହ-ପ୍ରତିଷ୍ଠାତା ଏନ.ଆର ନାରାୟଣ ମୁର୍ତ୍ତିଙ୍କ ଝିଅ ଅକ୍ଷତାଙ୍କୁ ବିବାହ କରିଛନ୍ତି ଋଷି ସୁନିକ । କୁହାଯାଏ ଦୁଇ ଜଣଙ୍କ ସାକ୍ଷାତ ଷ୍ଟେନଫୋର୍ଡରେ ଏମବିଏ କୋର୍ସ କରୁଥିବା ବେଳେ ହୋଇଛି । ଏହି ବନ୍ଧୁତ୍ୱ ପରବର୍ତ୍ତୀ ସମୟରେ ବିବାହରେ ପରିଣତ ହୋଇଥିଲା । ଦୁହିଁଙ୍କର କୃଷ୍ଣା ଓ ଅନୁଷ୍କା ନାମକ ଦୁଇ ଝିଅ ରହିଛନ୍ତି ।

ସୁନକଙ୍କ ଭାରତ କନେକ୍ସନ-

ଋଷି ସୁନକଙ୍କ ଜନ୍ମ ୧୨ ମଇ ୧୯୮୦ରେ ବ୍ରିଟେନର ସାଉଥମ୍ପଟନରେ ହୋଇଥିଲା । ତାଙ୍କ ମାଆଙ୍କ ନାଁ ଉଷା ସୁନକ ଏବଂ ପିତାଙ୍କ ନାଁ ଯଶବୀର ସୁନକ । ସେ ତିନି ଭାଇ ଭଉଣୀଙ୍କ ମଧ୍ୟରେ ସବୁଠୁ ବଡ଼ ଅଟନ୍ତି । ତାଙ୍କ ଜେଜେ ବାପା ଓ ଜେଜେ ମାଆ ପଞ୍ଜାବର ବାସିନ୍ଦା ଥିଲା । ୧୯୬୦ରେ ସେ ନିଜ ପିଲାଙ୍କ ସହ ପୂର୍ବ ଆଫ୍ରିକା ଚାଲିଯାଇଥିଲେ ।

ସୂଚନାନୁଯାୟୀ, ଋଷି ସୁନକ ୨୮ ଅକ୍ଟୋବରରେ ଶପଥ ନେଇପାରନ୍ତି । ୨୯ରେ ବ୍ରିଟିସ କ୍ୟାବିନେଟର ନୂଆ ମନ୍ତ୍ରୀମଣ୍ଡଳ ଗଠନ ହେବ । ସୂଚନାଥାଉକି ୪୫ ଦିନ ପର୍ଯ୍ୟନ୍ତ ବ୍ରିଟେନର ପ୍ରଧାନମନ୍ତ୍ରୀ ରହିଥିବା ଲିଜ୍ ଟ୍ରସଙ୍କ ଇସ୍ତଫା ପରେ ପୁଣିଥରେ ନିର୍ବାଚନ କରାଯାଇଥିଲା । ଏଥିରେ ଋଷି ମଜବୁତ ପ୍ରାର୍ଥୀ ଜଣାଯାଉଥିଲେ ।  ସୋମବାର ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନ ମଧ୍ୟ ପ୍ରଧାନମନ୍ତ୍ରୀ ଦୌଡର ନିଜକୁ ଅଲଗା କରିଦେଇଥିଲେ । ଯାହାପରେ ସ୍ପଷ୍ଟ ହୋଇଯାଇଥିଲା ଯେ ଋଷି ହିଁ ଆଗାମୀ ପ୍ରଧାନମନ୍ତ୍ରୀ ହେବେ ।