ଘଞ୍ଚ ଜଙ୍ଗଲରେ ଭଗବତ୍ ଆରାଧନା, ଅଖିଆ ଅପିଆ ତପସ୍ୟା କରୁଛନ୍ତି ନିରାବତୀ
ଉମରକୋଟ: ଆଧୁନିକ ସଭ୍ୟତାରେ ବି ଭଗବତ୍ ବିଶ୍ୱାସର ନୂଆ ଉଦାହରଣ । ଋଷି ମୁନିଙ୍କ ପରି ପାହାଡ଼ରେ ତପସ୍ୟା କରୁଛନ୍ତି ଯୁବତୀ । ଅଖିଆ ଅପିଆ ଘଞ୍ଚ ଜଙ୍ଗଲରେ ଚାଲିଛି ତପସ୍ୟା । ନା ଅଛି ହିଂସ୍ର ଜନ୍ତୁଙ୍କ ଭୟ, ନା ଅସାମାଜିକଙ୍କ ଆଶଙ୍କା । ଯାହାକୁ ଦେଖିବାକୁ ଅଞ୍ଚଳରେ ଏବେ ଲୋକଙ୍କ ବଢିଛି ଉତ୍କଣ୍ଠା । ଏମିତି ଏକ ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ବଡ଼ଭରଣ୍ଡି ପଞ୍ଚାୟତ ଚେରଗୁଡ଼ା ଗାଁ ନିକଟରେ ଥିବା ପୋଡ଼ାଗଡ଼ ପର୍ବତରେ ।
ଘଞ୍ଚ ଜଙ୍ଗଲରେ ତପସ୍ୟାରତ ଯୁବତୀ । ଅଖିଆ ଅପିଆ କରୁଛନ୍ତି ଭଗବତ୍ ଆରାଧନା । ମୌନବ୍ରତ କରି ୪ ଦିନ ହେଲା ଏଠାରେ ତପସ୍ୟା କରୁଛନ୍ତି ଯୁବତୀ । ୨୧ ଦିନ ଧରି ତପସ୍ୟା କରିବେ ଧାମନାଗୁଡ଼ା କମୁଳୁ କଲାରଙ୍କ ଝିଅ ନିରାବତୀ । ଯାହାକୁ ଦେଖିବାକୁ ଏବେ ଛୁଟୁଛି ଲୋକଙ୍କ ସୂଅ ।
ବିଶ୍ୱାସ ଓ ଅନ୍ଧବିଶ୍ୱାସରେ ମଣିଷ ପେଶି ହେଉଥିବାବେଳେ ନିରାବତୀଙ୍କ ଏହି ଭଗବତ ବିଶ୍ୱାସ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ରାତିର ଅନ୍ଧକାରରେ ବି ସେ ଅବିଚଳିତ । ତାଙ୍କର ଏହି ଦୃଢ ସଂକଳ୍ପ କାରଣରୁ ଏଠାରେ କିଛି ଭଗବତ୍ ଶକ୍ତିର ବିଶ୍ୱାସ କରି ଲୋକେ ପୂଜାର୍ଚ୍ଚନା ବି ଆରମ୍ଭ କରିଦେଇଛନ୍ତି । ବାବା ଭୋଳାନାଥଙ୍କ ସ୍ୱପ୍ନାଦେଶ ପରେ ଗଜଲକ୍ଷ୍ମୀ ପୂଜା ପରଠାରୁ ସେ ଏହି ସଂକଳ୍ପ ନେଇଥିବା କହିଛନ୍ତି ଗ୍ରାମବାସୀ ।
