ପାଦେ ପାଦେରେ ବିପଦ, ମରଣଯନ୍ତା ପାଲଟିଛି ରାସ୍ତା

ନନ୍ଦିଘୋଷ ବ୍ୟୁରୋ: ମରଣଯନ୍ତା ପାଲଟିଛି ନବରଙ୍ଗପୁର ଓ ଡାବୁଗାଁକୁ ସଂଯୋଗ କରୁଥିବା ରାସ୍ତା । ରାସ୍ତାରେ ସୃଷ୍ଟି ହୋଇଛି ବଡ ବଡ ଗର୍ତ୍ତ । ମୈଦଲପୁର – ସେମଳା ଠାରୁ କଣ୍ଟାଗାଁ ପର୍ଯ୍ଯନ୍ତ ୧୫ କିଲୋମିଟର ରାସ୍ତା ଦୀର୍ଘ ବର୍ଷ ହେବ ରକ୍ଷଣାବେକ୍ଷଣା ହୋଇନଥିବାରୁ ବିପର୍ଯ୍ଯସ୍ତ ହୋଇପଡିଛି । ଫଳରେ ପ୍ରତିଦିନ ଲୋକ ଦୁର୍ଘଟଣାର ଶିକାର ହେଉଛନ୍ତି।

ମରଣଯନ୍ତା ପାଲଟିଛି ରାସ୍ତା । ପାଦେ ପାଦେ ବିପଦ । ରାସ୍ତାରେ ସୃଷ୍ଟି ହୋଇଛି ବଡ ବଡ ଗର୍ତ୍ତ । ବିପଦପୂର୍ଣ୍ଣ ଭାବେ ଯାତାୟତ କରୁଛନ୍ତି ଲୋକେ । ଏ ହେଉଛି ନବରଙ୍ଗପୁର ଓ ଡାବୁଗାଁକୁ ସଂଯୋଗ କରୁଥିବା ରାସ୍ତାର ଦୃଶ୍ଯ । ନବରଙ୍ଗପୁର ଜିଲ୍ଲାର ଗୁରୁତ୍ଵପୂର୍ଣ୍ଣ ରାସ୍ତା ହେଉଛି ଏହି ରାସ୍ତା । ଏହି ରାସ୍ତା ଦେଇ ପ୍ରତିଦିନ ହଜାର ହଜାର ଲୋକ ଯାତାୟତ କରୁଛନ୍ତି । ହେଲେ ମୈଦଲପୁର – ସେମଳା ଠାରୁ କଣ୍ଟାଗାଁ ପର୍ଯ୍ଯନ୍ତ ୧୫ କିଲୋମିଟର ରାସ୍ତା ଦୀର୍ଘ ବର୍ଷ ହେବ ନିର୍ମାଣ ନହୋଇ ପଡିରହିଛି। ବର୍ଷା ଦିନେ ରାସ୍ତାର ଅବସ୍ଥା ଶୋଚନୀୟ ଥିବାରୁ ପ୍ରତିଦିନ ଲୋକ ଦୁର୍ଘଟଣାର ଶିକାର ହେଉଛନ୍ତି। ଏହି ରାସ୍ତା ଉପରେ ୩୦ଗୋଟି ଗଁ ଲୋକେ ନିର୍ଭର କରନ୍ତି । ହେଲେ ରାସ୍ତାର ଶୋଚନୀୟ ଅବସ୍ଥା ଲୋକଙ୍କ ଚିନ୍ତାର କାରଣ ପାଲଟିଛି । ତୁରନ୍ତ ରାସ୍ତାର ମରାମତି ପାଇଁ ସାଧାରଣରେ ଦାବି ଜୋର ଧରିଛି ।

ପୂଜାରୀଗୁଡା, ଅଞ୍ଚଳଗୁମା, କଣ୍ଟାଗାଁ, ମୈଦଲପୁର ରାସ୍ତା କାମ ପାଇଁ ପୂର୍ବ ସରକାର ୩୫ କୋଟି ଟଙ୍କା ଅନୁଦାନ ଦେଇଥିଲେ । ୧୮ କିଲୋମିଟର ରାସ୍ତା ନିର୍ମାଣ କରାଯାଇଥାନ୍ତା । ହେଲେ ବିଭାଗୀୟ ଅଧିକାରୀଙ୍କ ଉଦାସୀନତା ମନୋଭାବ ଯୋଗୁଁ ଏପର୍ଯ୍ଯନ୍ତ ରାସ୍ତା କାମ ହୋଇପାରିନାହିଁ । ପୂର୍ବତନ ଜିଲ୍ଲାପରିଷଦ ସଭ୍ୟଙ୍କ କହିବା ଅନୁସାରେ ଏହି ରାସ୍ତା କାମ ପାଇଁ ବୈଠକରେ ଅନେକ ଥର ଦାବି କରାଯାଇଥିଲେ ମଧ୍ଯ ଏପର୍ଯ୍ଯନ୍ତ ସୁଫଳ ମିଳିପାରିନାହିଁ । ଅନ୍ଯପଟେ ଏହି ରାସ୍ତା କାମ ନିମନ୍ତେ ଟେଣ୍ଡର ପ୍ରକ୍ରିୟା ସରିଛି ଖୁବ୍ ଶୀଘ୍ର ରାସ୍ତା ନିର୍ମାଣ ହେବ ବୋଲି ବିଭାଗୀୟ ଅଧିକାରୀ କହିଛନ୍ତି।