ରକ୍ତ ରଞ୍ଜିତ ମାଷ୍ଟରକ୍ୟାଣ୍ଟିନ, ଦିନ ଦ୍ୱିପ୍ରହରରେ ଯୁବକଙ୍କୁ ଗୋଡ଼ାଇ ହାଣିଲେ

ଭୁବନେଶ୍ୱର: ରାଜଧାନୀରେ ରଣକ୍ଷେତ୍ର । ଦିନ ଦ୍ବିପ୍ରହରରେ ବୁଲିଲା ଖଣ୍ଡା । ମାଷ୍ଟରକ୍ୟାଣ୍ଟିନ ଷ୍ଟେସନ ଛକ ହେଲା ରକ୍ତ ରଞ୍ଜିତ । ପୂର୍ବଶତ୍ରୁତା ଏବଂ ଦେକାନ ବ୍ୟବସାୟକୁ ନେଇ ମରଣାନ୍ତକ ଆକ୍ରମଣ । ଆକ୍ରମଣର ଶିକାର ହୋଇଛନ୍ତି ମାଳିସାହିର ଶେଖ ରାଜା, ଶେଖ ସାହିଦ , କଲାମ ଓ ଏସକେ ରୁନାମିଲ । ଗତ ୧୫ ଦିନ ତଳେ ପାନଦୋକାନ ପକାଇବାକୁ ନେଇ ଶେଖ ରାଜା ଓ ଅନ୍ୟ ଜଣେ ଶେଖ ସାହିଦ ମଧ୍ୟରେ ଗଣ୍ଡଗୋଳ ହୋଇଥିଲା । ଶେଖ ସାହିଦ ରାଜାକୁ ମାଡ ମାରିଥିଲା ।

ଆଜି ସାହିଦ ଅଟୋ ଷ୍ଟାଣ୍ଡରେ ଅଟୋ ରଖି ଛିଡା ହୋଇଥିବା ବେଳେ ଶେଖ ରାଜା ମାଳିସାହିର ୧୦ରୁ ୧୫ ସହଯୋଗୀଙ୍କୁ ନେଇ ଲୁହା ରଡ ଏବଂ ଖଣ୍ଡାରେ ମରଣାନ୍ତକ ଆକ୍ରମଣ କରିଥିଲା । ଆକ୍ରମଣର ଶିକାର ହୋଇଥିବା ବ୍ୟକ୍ତି ମାନଙ୍କ ଅବସ୍ଥା ଗୁରୁତ୍ତର ରହିଛି । ସେମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାରେ ମୁଖ୍ୟ ଅଭିଯୁକ୍ତ ଶେଖ ରାଜାକୁ ଅଟକ ରଖି ତଦନ୍ତ ଚଳାଇଛି ଖାରବେଳ ନଗର ଓ କ୍ୟାପିଟାଲ ଥାନା ପୋଲିସ ।