ମାଛ ପୋଖରୀ ଲିଜକୁ ନେଇ ପୂର୍ବତନ କୁଳପତିଙ୍କୁ ହତ୍ୟା, ଅଭିଯୁକ୍ତ ଗିରଫ
ଝାରସୁଗୁଡ଼ା: ସମ୍ବଲପୁର ବିଶ୍ୱବିଦ୍ୟାଳୟ ପୂର୍ବତନ କୁଳପତି ଡକ୍ଟର ଧ୍ରୁବରାଜ ନାଏକ ହତ୍ୟା ଘଟଣା । ଅଭିଯୁକ୍ତ ପ୍ରବୀଣ ଧରୁଆଙ୍କୁ ଗିରଫ କରିଛି ପୋଲିସ । ସେପଟେ ଧୀରେ ଧୀରେ ହତ୍ୟା ରହସ୍ୟ ଉପରୁ ପରଦା ହଟୁଛି । ଟଙ୍କା ପାଇଁ ନୁହେଁ ବରଂ ମାଛ ଚାଷକୁ କେନ୍ଦ୍ର କରି କୁଳପତିଙ୍କୁ ହତ୍ୟା କରାଯାଇଥିବା ଜଣାପଡ଼ିଛି । କୁଳପତି ଡକ୍ଟର ଧ୍ରୁବରାଜ ମାଛ ଚାଷ ପାଇଁ ନିଜ ପୋଖରୀକୁ ଅନ୍ୟକୁ ଲିଜ୍ ଦେଇଥିଲେ ।
ସେହି ଲିଜ୍କୁ ନେଇ ହତ୍ୟାକାଣ୍ଡ ହୋଇଥିବା ସୂଚନା ଦେଇଛି ପୋଲିସ । ଜେରା ବେଳେ ଅଭିଯୁକ୍ତ ପ୍ରବୀଣ ମାଛ ପୋଖରୀ ଲିଜକୁ ନେଇ ହତ୍ୟା କରିଥିବା କହିଛି । ଗତକାଲି ଅଭିଯୁକ୍ତ ଝାରସୁଗୁଡା କୁଆଁରମାଳ ସର୍ଗିଡିହି ସ୍ଥିତ କୁଳପତିଙ୍କ ଘରେ ପଶି ଟାଙ୍ଗିଆରେ ହାଣି ହତ୍ୟା କରିଥିଲା । ମଧ୍ୟାହ୍ନ ପ୍ରାୟ ୧୨ଟା ୩୦ରେ ଏହି ବର୍ବର କାଣ୍ଡ ଘଟାଇଥିବା ବେଳେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା ।
