ମୁଣ୍ଡଳୀ ଟୋଲ ଗେଟ୍ ଅନ୍ୟାଦେଶ ପର୍ଯ୍ୟନ୍ତ ସିଲ୍, ୪ କର୍ମଚାରୀ ଗିରଫ
କଟକ: ପର୍ଯ୍ୟଟକଙ୍କୁ ମାଡ ମାରିବା ମୁଣ୍ଡଳୀ ଗେଟ କର୍ତ୍ତୃପକ୍ଷଙ୍କୁ ମହଙ୍ଗା ପଡ଼ିଛି । ଛତିଶଗଡରୁ ଆସିଥିବା ପର୍ଯ୍ୟଟକଙ୍କୁ ନିର୍ମମ ମାଡ଼ ମାରିଥିବା ଦୃଶ୍ୟ ଭାଇରାଲ ହେବା ପରେ ପ୍ରଶାସନ ପକ୍ଷରୁ ଗେଟ କାର୍ଯ୍ୟାଳୟକୁ ଅନ୍ୟାଦେଶ ପର୍ଯ୍ୟନ୍ତ ସିଲ୍ କରାଯାଇଛି । ଏହି ଘଟଣାରେ ଟୋଲ ଗେଟର ୪ଜଣଙ୍କୁ କର୍ମଚାରୀକୁ ଗିରଫ କରିଛି ଆଠଗଡ଼ ପୋଲିସ୍ ।
ଘଟଣାରେ ସଂପୃକ୍ତି ଥିବା ଅନ୍ୟ ମାନଙ୍କୁ ତୁରନ୍ତ ଗିରଫ କରାଯିବ ବୋଲି ସୂଚନା ଦେଇଛନ୍ତି ଉପଜିଲ୍ଲାପାଳ । ସିଲ ନୂହେଁ ସଂପୂର୍ଣ୍ଣ ଭାବେ ଏହି ଗେଟଟିକୁ ଉଠାଇ ଦେବା ପାଇଁ ଯାତାୟାତ କରୁଥିବା ଯାତ୍ରୀଙ୍କ ଠାରୁ ଆରମ୍ଭ କରି ବିଭିନ୍ନ ସଂଗଠନ ଦାବି କରିଛନ୍ତି । କର୍ତ୍ତୃପକ୍ଷଙ୍କ ଆକ୍ସନ ପରେ ଗେଟ କାର୍ଯ୍ୟାଳୟରେ ତାଲା ଝୁଲିବା ସହ ନାଲି କପଡା ବାନ୍ଧି ସିଲ୍ କରାଯାଇଛି । ଗେଟ କାର୍ଯ୍ୟାଳୟ ପାଖରେ ମରାଯାଇଛି ଯାନବାହନ ଯିବା ଆସିବା ପାଇଁ ସରକାରଙ୍କ ପକ୍ଷରୁ ଧାର୍ଯ୍ୟ ଦର ।
ତେବେ ଗେଟ୍ କର୍ମଚାରୀଙ୍କ ବିରୋଧରେ ଧାର୍ଯ୍ୟ ଦର ଠାରୁ ଅଧିକା ଟଙ୍କା ନେବା, ଡ୍ରାଇଭର, ଯାତ୍ରୀ ମାନଙ୍କୁ ଖରାପ ବ୍ୟବହାର ଦେଖାଇବା ଭଳି ଅନେକ ଅଭିଯୋଗ ଆସିଛି । ତେଣୁ ୧୯୯୬ ଠାରୁ ଥିବା ଏହି ଗେଟକୁ ତୁରନ୍ତ ବନ୍ଦ କରିବାକୁ ଦାବି କରିଛନ୍ତି ଯାତ୍ରୀ । ଘଟଣା ପରେ ତୀର୍ଥଯାତ୍ରୀଙ୍କୁ ଦୁଇଟି ଘରୋଇ ବସରେ ଛତିଶଗଡ଼ ଛଡ଼ାଯାଇଛି ।
