କରୋନା ସଂକ୍ରମଣରେ ପ୍ରାଣ ହରାଇଲେ ମୁମ୍ବାଇର ସର୍ଜନ

ମୁମ୍ବାଇ: ମହାରାଷ୍ଟ୍ରରେ ଜଣେ ୮୫ ବର୍ଷ ବୟସ୍କ ସର୍ଜନ କରୋନା ଦ୍ୱାରା ସଂକ୍ରମିତ ହୋଇ ପ୍ରାଣ ହରାଇଛନ୍ତି । ଅନ୍ୟପକ୍ଷରେ ତାଙ୍କ ପୁଅ କରୋନା ପଜିଟିଭ୍ ଥିବା ପରୀକ୍ଷାରୁ ଜଣା ପଡିଛି । ବରିଷ୍ଠ ସର୍ଜନ ତାଙ୍କ ନାତି ଦ୍ୱାରା ସଂକ୍ରମିତ ହୋଇଥିଲେ । ନାତି ଲଣ୍ଡନରେ ସଂକ୍ରମିତ ହୋଇ ଭାରତ ଫେରିଥିଲେ ।

ମୁମ୍ବାଇରେ ରହୁଥିବା ଏହି ଡାକ୍ତରଙ୍କ ଦେହାନ୍ତ ଶୁକ୍ରବାର ରାତିରେ ହୋଇଥିଲା । ମୃତ୍ୟୁ ବରଣ କରିଥିବା ଡାକ୍ତରଙ୍କ ପୁଅ ମଧ୍ୟ ଜଣେ ସର୍ଜନ । ତାଙ୍କ ଟେଷ୍ଟ ରିପୋର୍ଟ ପଜିଟିଭ୍ ଆସିବା ପୂର୍ବଦିନ ମଧ୍ୟ ସେ ଅପରେସନ କରିଥିବା ଜଣା ପଡିଛି । ଯେଉଁ ଦୁଇଟି ହସ୍ପିଟାଲରେ ସେ ଅପରେସନ କରିଥିଲେ, ସେହି ହସ୍ପିଟାଲକୁ ଏବେ ବିଶୋଧନ କରାଯାଉଛି । ଏହାସହ ତାଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିମାନଙ୍କୁ ଖୋଜା ଯାଉଛି ।