ରିୟାଙ୍କୁ ଖୋଜୁଛି ବିହାର ପୋଲିସ,ଫ୍ଲାଟରୁ ଉଭାନ ଅଭିନେତ୍ରୀ !

ମୁମ୍ବାଇ: ଅଭିନେତ୍ରୀ ରିୟା ଚକ୍ରବର୍ତ୍ତିଙ୍କ ବିରୋଧରେ ସୁଶାନ୍ତ ସିଂ ରାଜପୁତଙ୍କ ବାପା ଏତଲା ଦେବା ପରଠାରୁ ରିୟା ନିଖୋଜ ଅଛନ୍ତି । କୁହାଯାଉଛି ଯେ, ରିୟା ଗିରଫଦାରୀ ଏଡାଇବା ପାଇଁ କେଉଁଆଡେ ଫେରାର ହୋଇଯାଇଛନ୍ତି । ରିୟା ତାଙ୍କ ଫ୍ଲାଟରେ ନଥିବା ସୂଚନା ମିଳୁଛି । ତାଜା ସୂଚନା ଅନୁସାରେ ରିୟାଙ୍କ ମୁମ୍ବାଇ ସ୍ଥିତ ଫ୍ଲାଟକୁ ବିହାର ଓ ସ୍ଥାନୀୟ ପୋଲିସ ଯାଇଥିଲେ କିନ୍ତୁ ସେଠାରେ ତାଙ୍କୁ ପାଇନଥିଲେ । ତେବେ ଏପର୍ଯ୍ୟନ୍ତ ତାଙ୍କୁ ଫେରାର ଘୋଷଣା କରାଯାଇନାହିଁ । କାରଣ ରିୟା ଏବେ ମଧ୍ୟ ନିଜ ଓକିଲଙ୍କ ସଂପର୍କରେ ଅଛନ୍ତି । କୁହାଯାଉଛି ଯେ, ରିୟା ଅଗ୍ରୀମ ଜାମିନ ଆବେଦନ କରିବେ ।

ସୂଚନାଯୋଗ୍ୟ ଯେ,  ସୁଶାନ୍ତ ସିଂ ରାଜପୁତଙ୍କ ପିତାଙ୍କ ଦ୍ୱାରା ରିୟା ଓ ତାଙ୍କ ପରିବାର ବିରୋଧରେ ସାଂଘାତିକ ଅଭିଯୋଗ କରାଯାଇଛି । ରିୟା ଓ ତାଙ୍କ ପରିବାର ସୁଶାନ୍ତଙ୍କଠାରୁ ୧୪ କୋଟି ଠକି ନେଇଥିଲେ ବୋଲି ସୁଶାନ୍ତଙ୍କ ପିତା ଅଭିଯୋଗ କରିଛନ୍ତି । ଏହା ସହ ରିୟା ଜୁନ୍ ୬ ତାରିଖ ଦିନ ସୁଶାନ୍ତଙ୍କ ଘରୁ ତାଙ୍କ ମେଡିକାଲ ରିପୋର୍ଟ ସହ ନଗଦ ଟଙ୍କା ଆଦି ଚୋରି କରିନେଇଥିଲେ । ମେଡିକାଲ ରିପୋର୍ଟ ଆଧାରରେ ସୁଶାନ୍ତଙ୍କୁ ରିୟା ବ୍ଲାକମେଲିଂ କରୁଥିଲେ ବୋଲି ପିତା କେ କେ ସିଂ ଅଭିଯୋଗ କରିଛନ୍ତି । ସୁଶାନ୍ତ କେରଳରେ ଜୈବିକ ଚାଷ କରିବାକୁ ଇଛୁକ ଥିଲେ କିନ୍ତୁ ରିୟା ତାଙ୍କୁ ଏଭଳି କରିବାକୁ ଦେଉନଥିଲେ । ସୁଶାନ୍ତଙ୍କୁ ମିଳୁଥିବା ଫିଲ୍ମରେ ରିୟା ଅଭିନୟ କରିବାକୁ ଚାହୁଁଥିଲେ,ଏଥିପାଇଁ ସେ ସୁଶାନ୍ତଙ୍କ ଉପରେ ଚାପ ପ୍ରୟୋଗ କରୁଥିଲେ ବୋଲି ଏତଲାରେ ଉଲ୍ଲେଖ ଅଛି ।

ଅଗ୍ରୀମ ଜାମିନ ପାଇଁ ଉଦ୍ୟମ କରୁଛନ୍ତି ରିୟା

ରିୟା ଆଜି କୋର୍ଟରେ ଅଗ୍ରୀମ ଜାମିନ ଆବେଦନ କରି ପାରନ୍ତି ।  ଗିରଫଦାରୀରୁ ବଂଚିବା ପାଇଁ ରିୟା ସବୁ ଉଦ୍ୟମ କରୁଛନ୍ତି । ଗତକାଲି ବରିଷ୍ଠ ଆଇନଜୀବୀ ସତୀଶ ମାନେ ଶିନ୍ଦେଙ୍କ ଜୁନିଅର ଓକିଲ ରିୟାଙ୍କ ଘରେ ପହଂଚିଥିଲେ । ମିଳୁଥିବା ସୂଚନା ଅନୁସାରେ ରିୟା ଓକିଲଙ୍କୁ ନିଜ ମଂଜୁରୀ ଦସ୍ତଖତ କରି ଦେଇଛନ୍ତି । ଯାହାପରେ ସେ ଆଗକୁ ଆଇନଗତ ସାହାଯ୍ୟ ନେଇପାରିବେ । ତେବେ ରିୟା କେବେ ଓ କେତେବେଳେ ଅଦାଲତରେ ଜାମିନ ଆବେଦନ କରିବେ ସେ ବାବଦରେ ଏପର୍ଯ୍ୟନ୍ତ କିଛି ଜଣା ପଡିନାହିଁ ।

https://www.youtube.com/watch?v=Zxf8JeL0Vnc