ଆଦାନୀଙ୍କୁ ପଛରେ ପକାଇ ଏସିଆର ସବୁଠୁ ଧନୀ ବ୍ୟକ୍ତି ହେଲେ ମୁକେଶ ଅମ୍ବାନୀ

ନୂଆଦିଲ୍ଲୀ: ହିଣ୍ଡେନବର୍ଗର ରିପୋର୍ଟ ଆସିବା ପରେ ଆଦାନୀ ଗ୍ରୁପର ଚେୟାରମ୍ୟାନଙ୍କ ସମ୍ପତ୍ତିରେ ଲଗାତାର ହ୍ରାସ ଦେଖିବାକୁ ମିଳୁଛି । ଏହି କାରଣରୁ ମୁକେଶ ଅମ୍ବାନୀ ଏବେ କେବଳ ଭାରତର ନୁହେଁ ବରଂ ସମ୍ପୂର୍ଣ୍ଣ ଏସିଆର ସବୁଠୁ ଧନୀ ବ୍ୟକ୍ତି ହୋଇଯାଇଛନ୍ତି । ଫୋବର୍ସ ରିୟଲ ଟାଇମ୍ ବିଲେନିୟର ଇଣ୍ଡେକ୍ସରେ ଏବେ ସେ ଆଦାନୀଙ୍କଠାରୁ ୪ ଟି ସ୍ଥାନ ଉପରେ ଅର୍ଥାତ ୯ମ ସ୍ଥାନରେ ରହିଛନ୍ତି । ସେହିପରି ଆଦାନୀ ୧୩ତମ ସ୍ଥାନକୁ ଖସିଆସିଛନ୍ତି ।

ଗୌତମ ଆଦାନୀଙ୍କ ମୋଟ ସମ୍ପତ୍ତିରେ ଆଜି ୯ ଆରବ ଡଲାରର ହ୍ରାସ ଦେଖିବାକୁ ମିଳିଛି । ଏବେ ତାଙ୍କର ମୋଟ ନେଟୱର୍ଥ ୭୮.୯ ବିଲିୟନ ଡଲାର ରହିଯାଇଛି । କିଛି ଦିନ ପୂର୍ବେ ଆଦାନୀ ଫୋବର୍ସ ସୂଚୀରେ ତୃତୀୟ ସ୍ଥାନରେ ରହିଥିଲେ । ହିଣ୍ଡେନବର୍ଗର ରିପୋର୍ଟ ସାମ୍ନାକୁ ଆସିବା ପରେ ତାଙ୍କ କମ୍ପାନୀର ସେୟାର ହ୍ରାସ ପାଇବାରେ ଲାଗିଛି । ଏବେ ସେ ବିଶ୍ୱର ଟପ-୧୦ ଧନୀ ତାଲିକାରୁ ମଧ୍ୟ ବାହାରି ଯାଇଛନ୍ତି ।