ପ୍ରହସନ ପାଲଟିଛି ସାଂସଦ ଖେଳ ମହୋତ୍ସବ । ଗଞ୍ଜାମ ଜିଲ୍ଲାର ବିଭିନ୍ନ ବ୍ଲକରେ ଚାଲିଛି ସାଂସଦ ଖେଳ ମହୋତ୍ସବ । ଯୁବ ଶକ୍ତିଙ୍କୁ ମିଳୁଛି ମଞ୍ଚ । ବିକଶିତ ଓଡିଶାରେ କ୍ରୀଡାକୁ ଦିଆଯାଉଛି ପ୍ରାଧାନ୍ୟ । ହେଲେ ତୃଣମୂଳ ସ୍ତରରେ ଖେଳାଳି ସୃଷ୍ଟି କରିବା ପାଇଁ ଯେଉଁ ଖେଳ ପଡିଆର ଆବଶ୍ୟକତା ରହିଛି ତାହାର ବିକାଶ କଥା ଭୁଲି ଯାଇଛନ୍ତି ସରକାର । ରକ୍ଷଣାବେକ୍ଷଣ ଅଭାବରୁ ଗଛଲତାରେ ଭର୍ତ୍ତି ହେଲାଣି ଖେଳପଡିଆ । ଆଜିବି ବିଭିନ୍ନ ଗାଁରେ ଖେଳ ପଡିଆଟିଏ ନାହିଁ । ପିଲାମାନେ ରାସ୍ତା ଉପରେ, ପଡିଆ ଜମିରେ ଖେଳୁଛନ୍ତି । ଏପରିକି ଅନେକ ସ୍କୁଲରେ ପ୍ଲେ ଗ୍ରାଉଣ୍ଡଟିଏ ବି ନାହିଁ । ଫଳରେ ଖେଳ ପ୍ରତି ରୁଚି ରଖିଥିବା ପିଲା ନିଜର ଅନ୍ତନିର୍ହିତ ଗୁଣ ଦେଖାଇ ପାରୁନାହାନ୍ତି । ଆଉ ଯେଉଁ ଯୁବକ ଯୁବତୀ ଖେଳ ପ୍ରତି ରୁଚି ରଖୁଛନ୍ତି ସେମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।
ସରକାର ଏବେ ବ୍ଲକ ସ୍ତରରୁ ପ୍ରତିଭାବାନ ଖେଳାଳି ବାଛିବା ପାଇଁ ସାଂସଦ ଖେଳ ମହୋତ୍ସବ ଆୟୋଜନ କରୁଛନ୍ତି । ଆଉ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି । ଗାଁ ଗହଳିରୁ ହଜି ଯାଉଥିବା କବାଡି, ଖୋ ଖୋ, କ୍ରିକେଟ, ଫୁଟବଲ ପରି ଅନେକ ଖେଳର ପ୍ରତିଯୋଗିତା କରି ଖେଳାଳିଙ୍କ ମନୋବଳ ବଢାଇବାକୁ ଉଦ୍ୟମ କରୁଛନ୍ତି । ହେଲେ ସ୍କୁଲ କି ଗାଁ ଗହଳିରେ ଖେଳ ପଡିଆ ବ୍ୟବସ୍ଥା ନକରି କେବଳ ବ୍ଲକ ସ୍ତରରେ ସାଂସଦ ଖେଳ ମହୋତ୍ସବ କଲେ କିଛି ଲାଭ ନାହିଁ ବୋଲି ସାଧାରଣରେ ମତ ପାଇଛି ।
