ବୋହୂ ଦେଲା ଧାରଣା, ଫିନାଇଲ ପିଇ ଦେଲେ ଶାଶୂ

ବ୍ରହ୍ମପୁର: ବୋହୂର ଧାରଣା ଯୋଗୁଁ ଆତ୍ମହତ୍ୟା କଲେ ଶାଶୂ । ନିର୍ଯାତନା ଅଭିଯୋଗରେ ଶାଶୂଘର ଆଗରେ ବୋହୂ ଧାରଣା ଦେବା ପରେ ଫିନାଇଲ ପିଇ ଆତ୍ମହତ୍ୟା କରିଛନ୍ତି ଶାଶୂ । ଗଞ୍ଜାମ ଏନ୍ଏସି ମଧ୍ୟଖଣ୍ଡ ସାହିରେ ଏଭଳି ଅଭାବନୀୟ ଘଟଣା ଘଟିଛି। ଗତକାଲି ବୋହୂ ତନ୍ମୟୀ ଯୌତୁକ ନିର୍ଯାତନା ଅଭିଯୋଗ ଆଣି ଶାଶୂଘର ଆଗରେ ଧାରଣା ଦେଇଥିଲେ।

୨୦୨୦ ଡିସେମ୍ବରରେ ତନ୍ମୟୀଙ୍କ ବିବାହ ହୋଇଥିଲା। ବିବାହର ୧୦ଦିନ ପରେ ସ୍ଵାମୀଙ୍କ ସହ କଳହ ପାଇଁ ବାପ ଘରକୁ ଚାଲି ଯାଇଥିଲେ ତନ୍ମୟୀ। ଶାଶୂ, ନଣନ୍ଦ ଓ ଶ୍ବଶୁର ବାରମ୍ବାର ନିର୍ଯାତନା ଦେଇଥିବା ତନ୍ମୟୀ ବ୍ରହ୍ମପୁର ମହିଳା ଥାନାରେ ଲିଖିତ ଅଭିଯୋଗ କରିଛନ୍ତି l ଯୌତୁକ ବାବଦରେ ନେଇଥିବା ୨୦ ଭରି ସୁନା ଓ ଦୁଇ ଲକ୍ଷ କୋଡିଏ ହଜାର ଟଙ୍କା ଫେରାଇ ଦେବାକୁ ସେ ଦାବି କରିଛନ୍ତି l

ଏନେଇ ମାମଲା କୋର୍ଟରେ ବିଚାରାଧୀନ ରହିଛି। ଗତକାଲି ତନ୍ମୟୀ ତାଙ୍କ ଆଈଙ୍କ ସହ ମିଶି ଶାଶୂଘର ଆଗରେ ଧାରଣା ଦେଇଥିଲେ। ଆଜି ଶାଶୂ ସୁଷମା ପଣ୍ଡା ଫିନାଇଲ ପିଇ ଦେଇଥିଲେ। ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି ପରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।