କାଳ ସାଜିଲା କରୋନା, ପୁଅର ମୃତ୍ୟୁ ଶୁଣି ହୃଦଘାତରେ ଚାଲିଗଲା ମାଆର ଜୀବନ
ଯାଜପୁର: ମହାମାରୀ ନେଇଗଲା ମାଆ, ପୁଅଙ୍କୁ । ଗୋଟିଏ ପରିବାରର ୩ ଜଣ କରୋନା ସଂକ୍ରମିତ ହୋଇଥିଲେ । ବାପପୁଅଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ସେମାନଙ୍କୁ ମେଡିକାଲରେ ଭର୍ତ୍ତି କରା ଯାଇଥିଲା । ମାଆ ଏକାକୀ ହୋମ୍ ଆଇସୋଲେସନରେ ଥିଲେ । ଚିକିତ୍ସାଧୀନ ଅବସ୍ଥାରେ ଆଜି ସକାଳେ ଏକମାତ୍ର ୨୮ ବର୍ଷର ପୁଅର ମୃତ୍ୟୁ ହୋଇଥିଲା ।
ଏହି ଖବର ଶୁଣିବା ପରେ ତାଙ୍କ ମାଆଙ୍କର ହୃଦଘାତରେ ମୃତ୍ୟୁ ହୋଇଛି । ଏଭଳି ଦୁଃଖଦ ଘଟଣା ଘଟିଛି ଯାଜପୁର ଜିଲ୍ଲା ବ୍ୟାସନଗର ଧବଳଗିରି ଅଞ୍ଚଳରେ । ସୂଚନା ମୁତାବକ ରଙ୍ଗ ବ୍ୟବସାୟୀ ଚୈତନ୍ୟ ଆରୁଖଙ୍କ ପରିବାରର ସମସ୍ତେ କରୋନାରେ ଆକ୍ରାନ୍ତ ହୋଇଥିଲେ । ଚୈତନ୍ୟ ଏବେବି କୋଭିଡ୍ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ।
ଯାଜପୁରର ଏ ଗୋଟିଏ ଘଟଣା ନୁହେଁ । କରୋନା ଏଭଳି ଅନେକ ପରିବାରକୁ ଛାରଖାର୍ କରି ଦେଇଛି । କେଉଁଠି ଛୋଟ ଛୋଟ ଛୁଆଙ୍କୁ ଅନାଥ କରି ପରିବାର ଉଜୁ଼ଡ଼ି ଯାଉଛି ତ ଆଉ କେଉଁଠି ଭେଣ୍ଡିଆ ପୁଅ ଆରପାରିକୁ ଗଲା ପରେ ଏକା ହେଉଯାଉଛି ବୁଢ଼ୀ ମାଆ । ଭୂତାଣୁର ଆକ୍ରମଣରେ ପୂରା ପରିବାର ଉଜୁଡ଼ି ଯାଉଛି ।
