ଚୋରୀ ପରେ ନିଆଁ ଲଗେଇ ଫେରାର୍ ହେଲେ, ଜଳିଗଲେ ୨ଜଣ…..

ଆନନ୍ଦପୁର: ଆନନ୍ଦପୁର ଉପଖଣ୍ଡ ନନ୍ଦିପଦା ଥାନା କଳିଗାଁରେ ଅଭାବନୀୟ ଘଟଣା ଘଟିଛି । ବୁଧବାର ବିଳମ୍ବିତ ରାତିରେ ଗାଁରେ ଥିବା ଗୋଟିଏ ତେଜରାତି ଦୋକାନରୁ କେହି ଦୁର୍ବୁତ୍ତ ଚୋରି କରିବା ପରେ ଦୋକାନ ପାଖରେ ଥିବା ଏକ ଘରେ ନିଆଁ ଲଗାଇଦେଇଛନ୍ତି । ଘର ଭିତରେ ଥିବା ୨ଜଣ ଜିଅନ୍ତା ଜଳିଯାଇଛନ୍ତି । ମୃତକ ହେଲେ ମା ପୁଅ ଜଞ୍ଜାଳୀ ଜେନା ଓ ବନମାଳୀ ଜେନା  ।

ଶୋଇଥିବା ଅବସ୍ଥାରେ ନିଆଁ ଲାଗିଥିବାରୁ ଉଭୟଙ୍କ ମୃତ୍ୟୁ ହୋଇଛି । ନିଆଁ ଲଗାଇବାର କାରଣ ଅସ୍ପଷ୍ଟ ରହିଛି । ତେବେ ଘଟଣାସ୍ଥଳରୁ ଏକ ରକ୍ତାକ୍ତ ବାଉଁଶ ଉଦ୍ଧାର ହୋଇଛି । ଦୁର୍ବୃତ୍ତ ଚୋରି କରୁଥିବା ବେଳେ ମା ପୁଅ ଦେଖିଦେଇଥିବାରୁ ବୋଧହୁଏ ମା ପୁଅଙ୍କୁ ପ୍ରଥମେ ପିଟିପିଟି ମାରିବା ପରେ ଘରେ ନିଆଁ ଲଗାଇଦେଇଥିବା ସନ୍ଦେହ କରାଯାଉଛି । ଅତ୍ୟନ୍ତ ଗରିବ ହୋଇଥିବାରୁ ଏମାନେ ପଞ୍ଚାୟତର ଗୋଟିଏ ପରିତ୍ୟକ୍ତ ଘରେ ରହୁଥିଲେ । ଘଟଣାସ୍ଥଳରେ ନନ୍ଦିପଦା ଥାନା ପୋଲିସ ପହଞ୍ଚି ଯାଞ୍ଚ କରୁଥିବା ବେଳେ ଫରେନସିକ୍ ଟିମ୍ ମଧ୍ୟ ଯାଞ୍ଚ କରିବ ।