ପ୍ଲାଜମା ପାଇଁ ରାଜ୍ୟରେ ୦.୫% କମ୍ ହୋଇଛି ମୃତ୍ୟୁହାର, ୪୦ ଦିନ ଭିତରେ ରାଜ୍ୟରେ ୬ଟି ପ୍ଲାଜମା ବ୍ୟାଙ୍କର ପ୍ରତିଷ୍ଠା

ଭୁବନେଶ୍ୱର: କରୋନାକୁ ମୂଳପୋଛ କରିବାରେ ସହାୟକ ହେଉଛି ପ୍ଲାଜମା ଚିକତ୍ସା । ପ୍ଲାଜମା ଚିକିତ୍ସା ଦ୍ୱାରା ରାଜ୍ୟରେ ମୃତ୍ୟୁହାର ୦.୫% କମ୍ ହୋଇଛି । ଫଳରେ ଏହାର ଗରୁତ୍ୱକୁ ଦେଖି ୪୦ ଦିନ ଭିତରେ ସାରା ରାଜ୍ୟରେ ୬ଟି ପ୍ଲାଜମା ବ୍ୟାଙ୍କର ପ୍ରତିଷ୍ଠା କରାଯାଇଛି । ଜୁଲାଇ ୧୫ରେ ପ୍ରଥମ ପ୍ଲଜମା ବ୍ୟାଙ୍କ SCBରେ ପ୍ରତିଷ୍ଠା କରାଯାଇଥିଲା । ଏହାପରେ ଭୁବନେଶ୍ୱରର କ୍ୟାପିଟାଲ ହସପିଟାଲ, ରାଉରକେଲାର IGH, ବ୍ରହ୍ମପୁରର MKCG, ବୁର୍ଲାର VIMSAR, କୋରାପୁଟର SLN MC &Hରେ ପ୍ଲାଜମା ବ୍ୟାଙ୍କ ପ୍ରତିଷ୍ଠା କରାଯାଇଛି ।

ବାଲେଶ୍ୱରର FM-MCHରେ ପ୍ଲାଜମା ସଂଗୃହିତ କେନ୍ଦ୍ର ଖୋଲାଯାଇଛି । ଭଦ୍ରକ, ବାଲେଶ୍ୱର, ମୟୂରଭଞ୍ଜ ପାଇଁ ଏହି ପ୍ଲାଜମା ସଂଗୃହିତ କେନ୍ଦ୍ର ଖୋଲାଯାଇଛି । ସାରା ରାଜ୍ୟରେ ଏପର୍ଯ୍ୟନ୍ତ ସଂଗୃହିତ ହୋଇଛି ୫୫୯ ୟୁନିଟ ପ୍ଲାଜମା । ତେବେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଗୁରୁତର କରୋନା ରୋଗୀଙ୍କୁ ପ୍ଲାଜମା ଥେରାପି ଦିଆଯାଉଛି । ଏପର୍ଯ୍ୟନ୍ତ ୪୮୨ କରୋନା ରୋଗୀଙ୍କୁ ପ୍ଲାଜମା ଥେରାପି ଦିଆଯାଇଛି । ଏହି ଥେରାପି ଯୋଗୁ ୬୩ ଜଣ କରୋନା ରୋଗୀ ସୁସ୍ଥ ହୋଇ ଘରକୁ ଫେରିଛନ୍ତି । ଅନ୍ୟପଟେ ରାଉରକେଲା IGHରେ  ଆଣ୍ଟିବଡି ସ୍ତରର ପରୀକ୍ଷା ପାଇଁ ସରକାରଙ୍କ ଯୋଜନା କରିଛନ୍ତି  । ଆଗକୁ ରାଜ୍ୟରେ ଆହୁରି ପ୍ଲାଜମା ବ୍ୟାଙ୍କର ବୃଦ୍ଧି କରିବା ପାଇଁ ଲକ୍ଷ ରଖିଛନ୍ତି ରାଜ୍ୟସରକାର ।