୧କୋଟି ୬୮ଲକ୍ଷ ଲୋକଙ୍କୁ ଦିଆଯିବ କୃମିନାଶକ ଔଷଧ, ୧୨ରୁ ଆରମ୍ଭ ଅଭିଯାନ

ଭୁବନେଶ୍ୱର: ଅଗଷ୍ଟ ୧୨ ତାରିଖରେ ପାଳନ କରାଯିବ ଜାତୀୟ କୃମିନାଶକ ଦିବସ। ପରିବାର ନିର୍ଦ୍ଦେଶାଳୟ ଦ୍ୱାରା ମହିଳା ଓ ଶିଶୁ ବିକାଶ ବିଭାଗ, ବିଦ୍ୟାଳୟ ଓ ଗଣଶିକ୍ଷା ବିଭାଗରେ ପାଳନ କରାଯିବ ଏହି ଦିବସ । ଏହି ଦିନ ୧ ବର୍ଷରୁ ୧୯ ବର୍ଷ ପର୍ୟନ୍ତ ସମସ୍ତ ପିଲାମାନଙ୍କୁ କୃମି ନାଶକ ଔଷଧ ଖାଇବାକୁ ଦିଆଯିବାକୁ ଲକ୍ଷ ରଖାଯାଇଛି । ତେବେ ଯେଉଁମାନେ ଅଗଷ୍ଟ ୧୨ ତାରିଖରେ କୌଣସି କାରଣରୁ ଏହି ଔଷଧ ଖାଇ ପାରି ନଥିବେ ସେମାନେ ଅଗଷ୍ଟ ୧୯ ତାରିଖରେ ଏହି ଔଷଧ ଖାଇପାରିବେ। ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ ସୂଚନା ଦେଇଛନ୍ତି।

ଏହି ଅବସରରେ ରାଜ୍ୟର ୧କୋଟି ୬୮ଲକ୍ଷ ୩୧ହଜାର ୬୭୯ ଜଣ ହିତାଧିକାରୀଙ୍କୁ ଏହି ଔଷଧ ଖାଇବାକୁ ଦିଆଯିବ । ଏହି ଔଷଧ ଖାଇବା ଦ୍ୱାରା ପିଲା ମାନଙ୍କର ରକ୍ତ ହୀନତା ନିୟନ୍ତ୍ରଣ, ପୃଷ୍ଟିହୀନତାରୁ ରକ୍ଷା, ଶିକ୍ଷା ଦକ୍ଷତା ବୃଦ୍ଧି, ବିଦ୍ୟାଳୟ ଓ ଅଙ୍ଗନବାଡି କେନ୍ଦ୍ରରେ ଉପସ୍ଥାନ ବୃଦ୍ଧି କାର୍ଯ୍ୟ ଦକ୍ଷତା ଓ ଜୀବିକା ସୁଯୋଗ ସୃଷ୍ଟିରେ ସହାୟକ ହେବା ସହିତ କୃମି ସଂକ୍ରମଣ ହ୍ରାସ କରିବାରେ ସହାୟକ ହୋଇଥାଏ। । ତେବେ କୃମିନାଶକ ଔଷଧ ବିତରଣରେ ୫୫ ହଜାର ୫ ଶହ ସ୍କୁଲକୁ ସାମିଲ କରାଯାଇଛି ।  ଏବଂ ଏଥିରେ ୬୯ ହଜାର ଶିକ୍ଷକ , ୭୨ ହଜାର ଅଙ୍ଗନବାଡି କର୍ମୀ, ୪୮ ହଜାର ଅଶକର୍ମୀ ସହ ୭ ହଜାର ୮ ଶହ ଏଏନଏମ କର୍ମୀ ସହଯୋଗ କରିବେ। ଏହା ସହିତ ଅଗଷ୍ଟ ମାସର ସମସ୍ତ ବୁଧବାର ଦିନ ଟୀକାକରଣ ଦିବସରେ ୯ ମାସରୁ ୫ ବର୍ଷ ପର୍ଯ୍ୟନ୍ତ ପିଲାମାନଙ୍କୁ ଭିଟାମିନ A ଦ୍ରବଣ ଖାଇବାକୁ ଦିଆଯାଉଅଛି । ସମସ୍ତ କୋଭିଡ କଟକଣା ସହ ସ୍କୁଲ ଓ ଅଙ୍ଗନବାଡ଼ିରେ ଏହି ଔଷଧ ପିଲାମାନଙ୍କୁ ଦିଆଯିବାର ବ୍ୟବସ୍ଥା କରାଯାଇଛି ବୋଲି ବିଜୟ ପାଣିଗ୍ରାହୀ କହିଛନ୍ତି।