OTT ମୁହାଁ ପ୍ରଯୋଜକ, ହଜିଯିବ କି ସିନେମା ହଲର ସିଲଭର୍ ସ୍କ୍ରିନ୍ ?

ଭୁବନେଶ୍ୱର: ହଜିଯିବ କି ରୂପେଲି ପରଦା ? OTT ଓ ଟେଲିଭିଜନ ପ୍ଲାଟଫର୍ମରେ ସିନେମା କରିବାକୁ ପସନ୍ଦ କରୁଛନ୍ତି ପ୍ରଯୋଜକ । କରୋନା କାଳରେ ଲୋକେ ବି ସିନେମା ହଲକୁ ଯିବାକୁ ମନ ବଳାଉ ନାହାନ୍ତି । ଏଭଳି ପରିବର୍ତ୍ତନକୁ ଦେଖି ଚିନ୍ତା ପ୍ରକଟ କଲେଣି ସିନେ ସମୀକ୍ଷକ ।

ପ୍ରେକ୍ଷାଳୟ ଅପେକ୍ଷା ଓଟିଟି ପ୍ଲାଟଫର୍ମରେ ରିଲିଜ୍ ହେଉଛି ଫିଲ୍ମ । ଡିଜିଟାଇଜେସନକୁ ଅଧିକ ପ୍ରାଧାନ୍ୟ ଦେଉଛନ୍ତି ପ୍ରଯୋଜକ । ଯାହାକୁ ଚିନ୍ତା ପ୍ରକଟ କରିଛନ୍ତି ସିନେ ସମୀକ୍ଷକ । ୧୯୯୯ ଠାରୁ ରାଜ୍ୟରେ ହ୍ରାସ ପାଇବାକୁ ଲାଗିଲାଣି ପ୍ରେଖ୍ୟାଳୟ ସଂଖ୍ୟା । ଏହାସହ ମହାମାରୀ ଯୋଗୁ ପ୍ରଭାବିତ ହୋଇଛି ଚଳଚ୍ଚିତ୍ର ଶିଳ୍ପ । କଟକଣା ପାଇଁ କମ୍ ସଂଖ୍ୟକ ଦର୍ଶକରେ ଚାଲୁଛି ସିନେମା । ଯେଉଁଥିପାଇଁ କ୍ଷତି ସହୁଛନ୍ତି ଉଭୟ ପ୍ରଯୋଜକ ଓ ହଲ ମାଲିକ । ଏଥିପାଇଁ କମ ବଜେଟ୍ ଭିତରେ ସିନେମା କରି ଓଟିଟି ପ୍ଲାଟଫର୍ମରେ ରିଲିଜ୍ କରିବାକୁ ପସନ୍ଦ କରୁଛନ୍ତି ସିନେ ପ୍ରଯୋଜକ । 2021ରେ ୨୦ଟି ସିନେମା ବଡ଼ ପରଦାରେ ରିଲିଜ୍ ହୋଇଥିବା ବେଳେ ୩୦ଟି ଓଟିଟି ଫ୍ଲାଟଫର୍ମରେ ରିଲିଜ୍ ହୋଇଛି ।

ଏଭଳି ପରିସ୍ଥିତିରେ ଆଗାମୀ ଦିନରେ ସିଲଭର ସ୍କ୍ରିନ ସମ୍ପୂର୍ଣ୍ଣ ରୂପ ବନ୍ଦ ହୋଇଯିବା ନେଇ ଆଶଂକା ପ୍ରକଟ କରିଛନ୍ତି ସିନେ ସମୀକ୍ଷକ ସୂର୍ଯ୍ୟ ଦେଓ । ଅନ୍ୟପଟେ ବର୍ତ୍ତମାନ ଓଟିଟି ପ୍ଲାଟଫର୍ମକୁ ସ୍ୱାଗତ କରିଛନ୍ତି ସିନେ ପ୍ରେମୀ ଓ ସିନେ ତାରକା । ବ୍ୟସ୍ତ ବହୁଳ ଜୀବନ ଭିତରେ ନିଜ ମୋବାଇଲରେ ସିନେମା ଦେଖିବା ଅଧିକ ସୁବିଧାଜନକ ବୋଲି କହିଛନ୍ତି ସିନେପ୍ରେମୀ । ସେପଟେ କମ୍ ବଜେଟ ସିନେମା ଯୋଗୁ ନୂଆ ସିନେ ତାରକାଙ୍କୁ ସୁଯୋଗ ମିଳୁଥିବା କହିଛନ୍ତି ଅନେକ ।