ମାସକର ଶିଶୁ ଦେହରେ ୩୦ରୁ ଅଧିକ ଚେଙ୍କ; ଗୁରୁତର ହୋଇ ମେଡିକାଲରେ ଭର୍ତ୍ତି

ନନ୍ଦିଘୋଷ ବ୍ୟୁରୋ: ମଣିଷ ମନରୁ କେବେ ହଟିବ ଅନ୍ଧବିଶ୍ଵାସ। ମାସକର ଶିଶୁକୁ ଦିଆଯାଇଛି ୩୦ରୁ ଅଧିକ ଚେଙ୍କ। ନବରଙ୍ଗପୁର ଚନ୍ଦାହାଣ୍ଡି ଅଞ୍ଚଳରେ ଏଭଳି ଅଭାବନୀୟ ଘଟଣା । ଡାକ୍ତରୀ ଚିକିତ୍ସାରେ ବିଶ୍ୱାସ ନକରି ଗୁଣି ଗାରେଡ଼ିକୁ କରୁଛନ୍ତି ଭରସା । ଛୋଟ ଶିଶୁର ମୁଣ୍ଡ ଓ ପେଟରେ ଦିଆଯାଇଛି ଏହି ଚେଙ୍କ । ଶିଶୁଟି ଗୁରୁତର ହେବା ପରେ ତାକୁ ଉମରକୋଟ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି । ଚନ୍ଦାହାଣ୍ଡି ବ୍ଲକ ଗମ୍ଭାରୀଗୁଡା ପଞ୍ଚାୟତର ଫୁଣ୍ଡେଲପଡା ଗାଁର ସରୋଜ କୁମାର ନାୟକଙ୍କ ୧ ମାସର ପୁଅ ଅସୁସ୍ଥ ହୋଇପଡିବାରୁ ଏହି ଚେଙ୍କ ଦେଇଥିବା ପରିବାର ଲୋକେ କହିଛନ୍ତି ।

ଚେଙ୍କର ଯନ୍ତ୍ରଣା ସମ୍ଭାଳି ନପାରି ଶିଶୁଟି ଲଗାତାର କାନ୍ଦିବାକୁ ଲାଗିଥିଲା । ବରିଷ୍ଠ ଶିଶୁ ରୋଗ ବିଶେଷଜ୍ଞ ତଥା ନବରଙ୍ଗପୁର ଜିଲା ମୁଖ୍ୟ ଚିକିତ୍ସା ଅଧିକାରୀ ସନ୍ତୋଷ କୁମାର ପଣ୍ଡା ଶିଶୁଟିର ଚିକିତ୍ସା କରୁଛନ୍ତି । ଚିକିତ୍ସା ପରେ ଶିଶୁଟି ଭଲ ଥିବା କହିଛନ୍ତି ଡାକ୍ତର । ଅତିଶୀଘ୍ର ଭଲ ହୋଇ ଯେପରି ଘରକୁ ଫେରିବ ସେଥିପାଇଁ ସ୍ଵାସ୍ଥ୍ୟ ବିଭାଗ ସବୁ ପ୍ରକାର ଚିକତ୍ସାରେ ସହଯୋଗ କରାଯିବ ବୋଲି ଡାକ୍ତର ପଣ୍ଡା କହିଛନ୍ତି । ତେବେ ପିଲାକୁ କିଏ ଚେଙ୍କ ଦେଲା ସେ ବିଷୟରେ କିଛି ସୂଚନା ଦେଇନାହାନ୍ତି ପରିବାର ଲୋକେ ।