ଗଞ୍ଜେଇ ଧରିବାକୁ ଯାଇ ୨୬ ପୋଲିସ ଆହତ
1 min read
ବ୍ରହ୍ମପୁର : ଗଞ୍ଜେଇ ଧରିବାକୁ ଯାଇ ୨୬ ପୋଲିସ ଆହତ । ଏଭଳି ଘଟଣା ଦେଖିବାକୁ ମିଳିଛି ଗଜପତି ଜ଼ିଲ୍ଲା ମୋହନା ଥାନା ଯୁବ ପଂଚାୟତର ପିଡିଆରୀ ଗାଁରେ । ଏହି ଗାଁରେ ବେଆଇନ ଗଞ୍ଜେଇ ଗଚ୍ଛିତ ଥିବା ଖବର ପାଇବା ପରେ ଗତକାଲି ରାତିରେ ଚଢାଉ କରିଥିଲା ପୋଲିସ ଟିମ । ଗଜପତି ଏସପିଙ୍କ ନିର୍ଦ୍ଦେଶ କ୍ରମେ ଆର. ଉଦୟଗିରି ଏସଡିପିଓଙ୍କ ନେତୃତ୍ୱରେ ମୋହନା, ଅଡବା, ଆର. ଉଦୟଗିରି ଆଇଆଇସି ସହ ରାମଗିରି ଥାନା ଅଧିକାରୀ ଓ ଗୋଟିଏ ପ୍ଲାଟୁନ ଫୋର୍ସ ଚଢାଉ କରିଥିଲେ । କିଛି ଘରୁ ଗଞ୍ଜେଇ ମଧ୍ୟ ଜବତ କରିଥିଲା ପୋଲିସ ଟିମ । ରାତିରେ ପୋଲିସ ଲୋକଙ୍କୁ ହଇରାଣ କରୁଥିବା ଅଭିଯୋଗ କରି ଢେଲାପଥର ମାଡ଼ କରିଥିଲେ ଗ୍ରାମବାସୀ । ଏହି ଆକ୍ରମଣରେ ଆର. ଉଦୟଗିରି ଏସଡିପିଓ, ମୋହନା ଥାନା ଅଧିକାରୀ ଏବଂ ଅଡବା ଥାନା ଅଧିକାରୀ ସମେତ ୨୩ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି l ଏହାସହ ପୋଲିସ ଫୋର୍ସର ୬ଟି ଗାଡିକୁ ମଧ୍ୟ ଭଙ୍ଗା ରୁଜା କରିଛନ୍ତି ଲୋକେ l ଦୀର୍ଘ ୫ ଘଣ୍ଟା ଧରି ପୋଲିସ ଟିମକୁ ଅଟକ ରଖିଥିଲେ ଗ୍ରାମବାସୀ । ଜନପ୍ରତିନିଧିଙ୍କ ହସ୍ତକ୍ଷେପ ପରେ ପୋଲିସ ଟିମକୁ ମୁକ୍ତ କରିଛନ୍ତି ଗ୍ରାମବାସୀ ।
