୬୦ ଛାତ୍ରୀଙ୍କ ଗାଧୋଉଥିବା ଭିଡିଓ ଭାଇରାଲ, ପୋଲିସ କହିଲା ଆସିନି ଆତ୍ମହତ୍ୟା ଅଭିଯୋଗ

ଚଣ୍ଡିଗଡ: ଅଶାନ୍ତ ହୋଇଛି ଚଣ୍ଡିଗଡରେ ଥିବା ଏକ ବିଶ୍ବବିଦ୍ୟାଳୟର କ୍ୟାମ୍ପସ  । ବିଳମ୍ବିତ ରାତିରେ ବିଶ୍ବବିଦ୍ୟାଳୟ କ୍ୟାମ୍ପସରେ ବିରୋଧ ପ୍ରଦର୍ଶନ କରିଛନ୍ତି ଉତ୍ତ୍ୟକ୍ତ ଛାତ୍ରଛାତ୍ରୀ  । ଛାତ୍ରୀ ହଷ୍ଟେଲର ଜଣେ ଯୁବତୀ ଅନ୍ୟ ୬୦ ଛାତ୍ରୀଙ୍କ ଗାଧୋଇବା ସମୟ ଭିଡିଓ ଭାଇରାଲ କରିବା ପରେ କ୍ୟାମ୍ପସରେ ଉତ୍ତେଜନା ପରିସ୍ଥିତି ଦେଖାଦେଇଛି  । ଦୀର୍ଘଦିନରୁ ହଷ୍ଟେଲରେ ଗାଧୋଉଥିବା ଛାତ୍ରୀଙ୍କ ଭିଡିଓ ଭାଇରାଲ ହେଉଥିବା ଅଭିଯୋଗ ହୋଇ ଆସୁଥିଲା । ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଏଥିପାଇଁ ଦାୟୀ ବୋଲି ଛାତ୍ରଛାତ୍ରୀ ଅଭିଯୋଗ କରିଛନ୍ତି  ।

ବିରୋଧ ଏତେମାତ୍ରାରେ ବଢିଯାଇଥିଲା ଯେ, ବିଶ୍ବବିଦ୍ୟାଳୟର ମୁଖ୍ୟ ଫାଟକରେ ତାଲା ପକାଇଛନ୍ତି କର୍ତ୍ତୃପକ୍ଷ  । ଉତ୍ତ୍ୟକ୍ତ ଛାତ୍ରଙ୍କୁ ଅଟକାଇବା ପାଇଁ ପୋଲିସକୁ ଲାଠିଚାର୍ଜ କରିବାକୁ ପଡିଛି  । ସୋସିଆଲ ମିଡିଆରେ ଛାତ୍ରୀଙ୍କ ଭିଡିଓ ଭାଇରାଲ କରିଥିବା ଯୁବକ ଶିମଲାର ହୋଇଥିବା ଜଣାପଡିଛି  । ହଷ୍ଟେଲରେ ଯୁବତୀଙ୍କ ଭିଡିଓ କରୁଥିବା ଛାତ୍ରୀଙ୍କୁ ଧରିବା ପରେ ତାଙ୍କର ଏକ ଭିଡିଓ କରି ୟୁଟ୍ୟୁବରେ ଅପଲୋଡ କରାଯାଇଛି  ।

ଘଟଣା ଜଣାପଡିବା ପରେ କର୍ତ୍ତୃପକ୍ଷଙ୍କୁ ଛାତ୍ରଛାତ୍ରୀ ମାନେ ଜଣାଇଥିଲେ ସୁଦ୍ଧା କୌଣିସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ  । ଯେଉଁଥିପାଇଁ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି ।

ସେପଟେ ମାମଲାକୁ ଗୁରୁତର ସହ ନେଇ ପୋଲିସ ଅଭିଯୁକ୍ତକୁ ଗିରଫ କରିଛି  । ଭିଡିଓ ଭାଇରାଲ ପରେ କୌଣସି ଛାତ୍ରୀ ଆତ୍ମହତ୍ୟା ଉଦ୍ୟମ କରିନଥିବା ସଫେଇ ଦେଇଛି ପୋଲିସ  । ପଞ୍ଜାବ ମହିଳା ଆୟୋଗ ଅଧ୍ୟକ୍ଷ ମାମଲାର ତଦନ୍ତ ପାଇଁ ବିଶ୍ବବିଦ୍ୟାଳୟ ପରିଦର୍ଶନ କରିବେ ବୋଲି କହିଛନ୍ତି  ।