କୃଷକଙ୍କୁ ମୋଦି କ୍ୟାବିନେଟର ଉପହାର, ରବି ଫସଲ ଉପରେ MSP ବୃଦ୍ଧିକୁ ମଞ୍ଜୁରୀ
1 min read
ନୂଆଦିଲ୍ଲୀ: ଲୋକସଭା ପରେ ରାଜ୍ୟସଭାରେ ମୋଦି ସରକାର କୃଷି ସମ୍ବଦ୍ଧିତ ବିଲ୍ ପାରିତ କରାଇଛନ୍ତି । ସୂତ୍ରୁ ମିଳଥିବା ସୂଚନା ଅନୁସାରେ ଏବେ ମୋଦି କ୍ୟାବିନେଟ ରବି ଫସଲର ସର୍ବନିମ୍ନ ସହାୟକ ମୂଲ୍ୟ (MSP) ବୃଦ୍ଧିକୁ ଅନୁମୋଦନ ଦେଇଛନ୍ତି । ଏହାକୁ ନେଇ କୃଷି ମନ୍ତ୍ରୀ ନରେନ୍ଦ୍ର ସିଂହ ତୋମର ସୂଚନା ଦେବେ ।
କୃଷି ବିଲକୁ ନେଇ ଦେଶରେ ବିରୋଧ ଲାଗି ରହିଛି । ଏହାରି ଭିତରେ କେନ୍ଦ୍ର ସରକାର ରବି ଫସଲର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ନେଇ ନିଷ୍ପତ୍ତି ନେଇଛନ୍ତି । ଦେଶରେ ଅନେକ ସ୍ଥାନରେ ଏମଏସପିକୁ ନେଇ ବିବାଦ ଲାଗି ରହିଛି । ଯେଉଁଥିପାଇଁ ଉତ୍ତରପ୍ରଦେଶ, ରାଜସ୍ଥାନ, ପଞ୍ଜାବ ଓ ହରିୟାଣାରେ କୃଷକ ବିରୋଧ ପ୍ରଦର୍ଶନ କରୁଛନ୍ତି ।
କୃଷି କ୍ଷେତ୍ର ସହ ଜଡ଼ିତ ବିଲରେ ଏମଏସପିକୁ ନେଇ କୃଷକ ଅସହମତି ପ୍ରକାଶ କରିଛନ୍ତି । ଯେତେବେଳେ କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜେ କହି ସାରିଛନ୍ତି ଏମଏସପି ବ୍ୟବସ୍ଥା ଜାରି ରହିବ । ଫସଲକୁ ପୂର୍ବଭଲି ସରକାର କିଣିବେ । ତଥାପି ଦେଶରେ କୃଷକଙ୍କ ବିରୋଧ ପ୍ରଦର୍ଶନ ଥମିବାର ନାଁ ଧରୁନି ।
ବିଲରେ କୃଷକଙ୍କୁ ଅମଳକୁ କେଉଁଠାରେ ମଧ୍ୟ ବିକ୍ରି ପାଇଁ ଅନୁମତି ମିଳିବ । ଏହାଦ୍ୱାରା ମଣ୍ଡି ଗୁଡ଼ିକ ପ୍ରଭାବିତ ହେବେ । ଯେତେବେଳେ କି ପଞ୍ଜାବ ଓ ହରିୟାଣାରେ ମଣ୍ଡି ସଂଖ୍ୟା ଅଧିକ । ଏବଂ ଏହି ରାଜ୍ୟଗୁଡ଼ିକରେ ଏବେ କୃଷକ ସଂଗଠନ ଜୋରଦାର ବିରୋଧ ପ୍ରଦର୍ଶନ କରୁଛନ୍ତି । ଏମଏସପିକୁ ନେଇ କୃଷକ ଦ୍ୱନ୍ଦ୍ୱରେ ଥିବାରୁ ବିରୋଧ ତେଜିବାରେ ଲାଗିଛି ।
କୃଷି ବିଲକୁ ସଂସଦରୁ ସଡ଼କ ସବୁଠି ବିରୋଧ ଜାରି ରହିଛି । ବିପକ୍ଷ ଦଳ ବିଲ୍ ବିରୋଧରେ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଭେଟିବାକୁ ସମୟ ମାଗିଛନ୍ତି । ରାଷ୍ଟ୍ରପତି ୨ଟି ଯାକ କୃଷି ବିଲରେ ଦସ୍ତଖତ ନକରି ରାଜ୍ୟସଭା ପଠାଇଦେବାକୁ ବିରୋଧୀଙ୍କ ପକ୍ଷରୁ ଅପିଲ୍ କରାଯିବ ।
