ବୌଦ୍ଧ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଖୋଲଲା ମିଶନ ଶକ୍ତି ଫିଟନେସ୍ ଓ ହାପିନେସ୍ କ୍ଲବ

ବୌଦ୍ଧ: ଫିଟ୍ ରହିବେ ସରକାରୀ କର୍ମଚାରୀ । ମିଶନ ଶକ୍ତି ମା’ ବି ହେବେ ସ୍ବାବଲମ୍ବୀ । ବୌଦ୍ଧ ଜିଲ୍ଲା ପ୍ରଶାସନ ପକ୍ଷରୁ ଭିନ୍ନ ପ୍ରୟାସ । ଜିମରେ ଓ୍ୱାର୍କ ଆଉଟ୍ କରୁଛନ୍ତି ସରକାରୀ କର୍ମଚାରୀ । କିଏ ଟ୍ରେଡମିଲ ତ କିଏ ସ୍ପିନ ବାଇକ ଆଉ କିଏ କାଡିଓ ଫିଟନେସ୍ ସାଇକେଲରେ ବ୍ୟାୟାମ କରୁଛନ୍ତି । ଏଠି ବ୍ୟାୟାମ ବିଭିନ୍ନ ଉପକରଣ ରଖାଯିବା ସହ ସ୍ବଚ୍ଛତା ପ୍ରତି ଧ୍ୟାନ ଦିଆଯାଉଛି  । ବୌଦ୍ଧ ଜିଲ୍ଲାପାଳଙ୍କ କାଯ୍ୟାଳୟରେ ଖୋଲାଯାଇଛି ଏହି ମିଶନ ଶକ୍ତି ଫିଟନେସ ଓ ହାପିନେସ କ୍ଲବ । ଏହାର ପରିଚାଳନା ଦାୟିତ୍ବ ଏସଏସଜି ମହିଳାଙ୍କୁ ହସ୍ତାନ୍ତର କରାଯାଇଛି । ଫଳରେ ସରକାରୀ କର୍ମଚାରୀ ସୁସ୍ଥ ରହିବା ସହ କର୍ମ ନିଯୁକ୍ତି ପାଇଛନ୍ତି ମିଶନ ଶକ୍ତି ମହିଳା ।

ବୌଦ୍ଧ ଜିଲ୍ଲା ପ୍ରଶାସନ ଓ ମନ୍ତ୍ରୀ ପ୍ରଦୀପ ଅମାତଙ୍କ ଉଦ୍ୟମରେ ଜିଲ୍ଲାପାଳଙ୍କ କାର୍ଯ୍ୟାଳୟ ତୃତୀୟ ମହଲାରେ ୭ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମାଣ ହୋଇଛି ମିଶନ ଶକ୍ତି ଫିଟନେସ୍ ଓ ହାପିନେସ୍ କ୍ଲବ୍। ଜଣେ ପ୍ରଶିକ୍ଷକ ମଧ୍ୟ ନିଯୁକ୍ତ ହୋଇଥିବା ବେଳେ ସକାଳେ ଓ ସଂଧ୍ୟାରେ ଏହି କ୍ଲବ ଖୋଲା ଯାଉଛି । ମାସିକ ଫି ୨ ଶହ ଟଙ୍କା ରଖାଯାଇଥିବା ବେଳେ ଏହାର ରକ୍ଷଣାବେକ୍ଷଣ ଦାୟିତ୍ବ ସ୍ବୟଂସହାୟକ ଗୋଷ୍ଠୀ ମହିଳାମାନଙ୍କୁ ଦିଆଯାଇଛି । ରାଜ୍ୟରେ ପ୍ରଥମ କରି ବୌଦ୍ଧ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଏଭଳି ଜିମ୍ ଖୋଲାଯାଇଥିବା ବେଳେ ସରକାରୀ କର୍ମଚାରୀ ଓ SHG ମହିଳାମାନେ ଉପକୃତ ହୋଇପାରୁଛନ୍ତି ।