ରିଷ୍ଟ୍ରକଚରିଂ ଆଳରେ ମିଶନ ଶକ୍ତିର ଲକ୍ଷ ଲକ୍ଷ ଇସି ସଦସ୍ୟଙ୍କୁ ବହିଷ୍କାର ପାଇଁ ଯୋଜନା କରାଯାଇଥିବା ଅଭିଯୋଗ

ଭୁବନେଶ୍ବର ; ସ୍ଵାବଲମ୍ବୀ ମାଆମାନଙ୍କ ଭବିଷ୍ୟତ ଅନ୍ଧକାର ମଧ୍ୟକୁ ଠେଲି ଦେବା ପାଇଁ ବିଜେପି ସରକାରର ଚକ୍ରାନ୍ତ। କେବଳ ରାଜନୈତିକ ଉଦ୍ଦେଶ୍ୟରେ କରାଯାଉଛି ଏହି ଷଡ଼ଯନ୍ତ୍ର। ରିଷ୍ଟ୍ରକଚରିଂ ଆଳରେ ମିଶନ ଶକ୍ତିର ଲକ୍ଷ ଲକ୍ଷ ଇସି ସଦସ୍ୟଙ୍କୁ ବହିଷ୍କାର ପାଇଁ ଯୋଜନା କରାଯାଇଥିବାର ଅଭିଯୋଗ କରିଛି ନିଖିଳ ଓଡ଼ିଶା ଜୀବିକା ମିଶନ ଇସି ସଂଘ। ଗତ ମାସ ୮ ଓ ୨୨ ତାରିଖରେ ଏ ସଂପର୍କିତ ସରକାରୀ ନିର୍ଦ୍ଦେଶନାମା ପରେ ଆନ୍ଦୋଳନ ପାଇଁ ସଂଘ ସଜବାଜ ହେଲାଣି। ନିର୍ଦ୍ଦେଶନାମା ଯଦି କାର୍ଯ୍ୟକାରୀ ହୁଏ, ୨୫ ବର୍ଷ ଧରି କାମ କରୁଥିବା ଇସି ବେକାର ହେବେ। ତେଣୁ ପ୍ରତିବାଦରେ ଦେଢ଼ ଲକ୍ଷରୁ ଅଧିକ ସଦସ୍ୟା ଆସନ୍ତା ୧୩ ତାରିଖରୁ ଅନିର୍ଦିଷ୍ଟ କାଳ ଯାଏ ବିଧାନସଭା ସମ୍ମୁଖରେ ଆନ୍ଦୋଳନ କରିବାକୁ ନିଷ୍ପତ୍ତି ନେଇଛନ୍ତି।  …

ମିଶନ ଶକ୍ତିରେ ବିଜେଡି ସରକାର ୬ ଲକ୍ଷ SHG ଜରିଆରେ ୭୦ ଲକ୍ଷରୁ ଅଧିକ ମହିଳାଙ୍କୁ ସ୍ୱ ସ୍ୱାବଲମ୍ବୀ କରାଇଥିଲେ। ମହିଳାଙ୍କୁ ମିଳିଥିଲା ରୋଜଗାରର ବାଟ। ସମଗ୍ର ଭାରତରେ ଓଡ଼ିଶାର ମିଶନ ଶକ୍ତି ସର୍ବୋଚ୍ଚ ଦକ୍ଷତାର ଶୀର୍ଷରେ ପହଞ୍ଚିଥିଲା। ତେଣୁ ଏହି ଇସି ସଦସ୍ୟଙ୍କ ଦକ୍ଷତାକୁ ବିଚାରକୁ ନେଇ ରାଜନୈତିକ ପ୍ରତିହିଂସା ପରାୟଣ ନ ହୋଇ ରିଷ୍ଟ୍ରକଚରିଂ ଆଦେଶ ନିଷ୍ପତ୍ତି ପ୍ରତ୍ୟାହାର କରିବାକୁ ଦାବି ହୋଇଛି। ନଚେତ ଏହାକୁ ରାଜ୍ୟ ସରକାରଙ୍କ ମହିଳା ବିରୋଧୀ କାମ ବୋଲି ଧରାଯିବ ଓ ଜୋରଦାର ପ୍ରତିବାଦ କରାଯିବ।  ପୂର୍ବରୁ ୫ ରୁ ୧୫ ସ୍ୱୟଂ ସହାୟିକା ଗୋଷ୍ଠୀକୁ ନେଇ ସିଏଲଏଫ ଗଠିତ ହେଉଥିବା ବେଳେ ସରକାରୀ ଆଦେଶ ଅନୁଯାୟୀ ରିଷ୍ଟ୍ରକଚରିଂ ହେଲେ ୨୦ ରୁ ୩୯ ମହିଳା ଗୋଷ୍ଠୀଙ୍କୁ ନେଇ ସିଏଲଏଫର ପୁନର୍ଗଠନ ହେବ। ଫଳରେ ଦୁଇ ତୃତୀୟାଂଶରୁ ଅଧିକ ସିଆରପି ଓ କମ୍ୟୁନିଟି ସପୋର୍ଟ ଷ୍ଟାଫ ଚାକିରିରୁ ବାଦ ପଡିବେ।