ପିଜା ରେଷ୍ଟୁରାଣ୍ଟରେ ମିସାଇଲ ଆକ୍ରମଣ, ୩ ନାବାଳକଙ୍କ ସମେତ ୧୧ ମୃତ

କିଭ୍: ପିଜା ରେଷ୍ଟୁରାଣ୍ଟରେ ମିସାଇଲ ଆକ୍ରମଣ । ୩ ନାବାଳକଙ୍କ ସମେତ ୧୧ ମୃତ । ଇଷ୍ଟର୍ଣ୍ଣ ୟୁକ୍ରେନ ସହର କ୍ରାମାଟୋସ୍କରେ ଋଷର ମିସାଇଲ ଆକ୍ରମଣରେ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ ୬୦ରୁ ଊର୍ଦ୍ଧ୍ବ ଗୁରୁତର ହୋଇଛନ୍ତି । ଋଷରେ ଓ୍ବାଗନରର ବିଦ୍ରୋହ ଥମିବା ପରେ ପୁଣି ଥରେ ୟୁକ୍ରେନ ଉପରେ ଆଟାକ ଜୋରଦାର କରିଛି ଋଷ । ଇଷ୍ଟର୍ଣ୍ଣ ୟୁକ୍ରେନର ଅଧିକାଂଶ ସହରରେ ଏୟାର ଷ୍ଟ୍ରାଇକ ଜାରି ରହିଥିବା ବେଳେ ରେଷ୍ଟୁରାଣ୍ଟରେ ଅଚାନକ ଆକ୍ରମଣ ଯୋଗୁ ୧୧ ଜଣ ସାଧାରଣ ଲୋକଙ୍କର ମୃତ୍ୟୁ ହୋଇଛି । ରେଷ୍ଟୁରାଣ୍ଟ ଉପରେ ଆକ୍ରମଣ ପାଇଁ ଋଷ ସୈନ୍ୟଙ୍କୁ ସହଯୋଗ କରିଥିବା ସନ୍ଦେହରେ ଜଣଙ୍କୁ ଗିରଫ କରାଯାଇଛି । ୧୬ ମାସରୁ ଅଧିକ ସମୟ ଧରି ଜାରି ରହିଛି ଋଷ-ୟୁକ୍ରେନ ଯୁଦ୍ଧ । ଦୁଇ ଦେଶର ଲକ୍ଷାଧିକ ସୈନ୍ୟଙ୍କ ମୃତ୍ୟୁ ହୋଇଥିବା ବେଳେ ଧ୍ବସ୍ତ ହୋଇଯାଇଛି ୟୁକ୍ରେନ ।