ବାଇକରେ ଝୁଲାଇଥିଲେ ଟଙ୍କାବ୍ୟାଗ୍, ଆଖି ପିଛୁଳାକେ ଝାମ୍ପିନେଲେ ଏକ ଲକ୍ଷ
ଭଦ୍ରକ: ବନ୍ତ ବଜାରରେ ୧ ଲକ୍ଷ ଟଙ୍କା ଝାମ୍ପି ନେଲେ ଦୁଇ ଲୁଟେରା । ଦୁଇ ଜଣ ଦୁର୍ବୃତ୍ତ ଏକ ନାଲି ରଙ୍ଗର ସ୍କୁଟିରେ ଆସି ଜଣେ ଔଷଧ ଟଙ୍କା ସଂଗ୍ରହକାରୀ ବ୍ୟକ୍ତିଙ୍କ ବାଇକରେ ଟଙ୍ଗାଯାଇଥିବା ବ୍ୟାଗକୁ ଝାମ୍ପି ନେଇ ଚମ୍ପଟ୍ ମାରିଥିଲେ । ବ୍ୟାଗରେ ୧ ଲକ୍ଷ ଟଙ୍କା ସହ ବ୍ୟାଙ୍କ ଚେକ୍ ଥିଲା ।
ଏନେଇ ବନ୍ତ ଥାନାରେ ବ୍ୟକ୍ତି ଜଣକ ଅଭିଯୋଗ କରିଛନ୍ତି । ସୂଚନା ଅନୁସାରେ, ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ବାଲିଗଢିଆ ଗ୍ରାମର ଧିରତ ଦାସ ଭଦ୍ରକ ନାରାୟଣ ଫାର୍ମାରେ ଟଙ୍କା ଆଦାୟକାରୀ ଭାବେ କାର୍ଯ୍ୟ କରନ୍ତି । ପ୍ରତି ସପ୍ତାହର ଶୁକ୍ରବାର ଦିନ ବିଭିନ୍ନ ଅଂଚଳକୁ ଔଷଧ ଦେଇଥିବା ଦୋକାନୀଙ୍କ ଠାରୁ ଟଙ୍କା ସଂଗ୍ରହ କରିଥାନ୍ତି । ତେବେ ଗାଡିରେ ଟଙ୍କା ରଖି ଦୋକାନକୁ ପାଣି ଆଣିବାକୁ ଯାଇଥିବା ବେଳେ ଟଙ୍କା ନେଇ ଚମ୍ପଟ ମାରିଥିଲେ ଦୁଇ ଲୁଟେରା । ଘଟଣାରେ ପୋଲିସ ତଦନ୍ତ ଜାରି ରଖିଛି ।
