ବରଯାତ୍ରୀରେ ନାଚୁଥିବା ଶିଶୁ କନ୍ୟାକୁ ପ୍ରଥମେ ଅପହରଣ, ପରେ ଦୁଷ୍କର୍ମ ଓ ହତ୍ୟା

ଲକ୍ଷ୍ନୌ: ଶିଶୁ ବଳତ୍କାର ଘଟଣାରେ ଦେଶରେ ଶୀର୍ଷରେ ଥିବା ଉତ୍ତରପ୍ରଦେଶରୁ ଆସିଛି ଆଉ ଏକ ଛାତିଥରା ଘଟଣା । ଏକ ନିରୀହ ଶିଶୁ କନ୍ୟା ସହ ଯାହା ଘଟିଛି, ତାହା ବିଚଳିତ କରିଦେଲାଭଳି  । ବିବାହ କାର୍ଯ୍ୟରେ ଯୋଗଦେବାକୁ ଯାଇ ବରଯାତ୍ରୀଙ୍କ ସହ ନାଚୁଥିବା ପାଞ୍ଚବର୍ଷର ଶିଶୁ କନ୍ୟାକୁ ବଳତ୍କାର ପରେ ହତ୍ୟା  ।  ମିଳିଥି୍ବା ସୂଚନା ମୁତାବକ ବାପା-ମାଆଙ୍କ ସହ ଜଣେ ପରିଜନଙ୍କ ବିବାହ କାର୍ଯ୍ୟରେ ଯୋଗଦେବାକୁ ଯାଇଥିଲା ପାଞ୍ଚ ବର୍ଷର ନାବାଳିକା   । ଡିଜେର ତାଳେ ତାଳେ ନାଚରେ ମସଗୁଲ ଥିଲା କୁନି ଝିଅ  ।  ସମକ୍ଷକ ପିଲାଙ୍କ ମେଳରେ ରାତି ୧୨ଟାରେ ଡ୍ୟାନ୍ସ କରୁଥିବା ନାବାଳିକା କେଉଁଆଡ଼େ ନିଖୋଜ ହୋଇଯାଇଥିଲା  । ପରେ ଏକ ଧାନ କ୍ଷେତରେ ଶିଶୁର ମୃତ ଶରୀର ପଡ଼ିଥିବାବେଳେ ଶିଶୁକନ୍ୟାକୁ ବଳତ୍କାର କରାଯାଇଥିବା ଅଭିଯୋଗ ହୋଇଛି  ।

ଘଟଣା ଆଗ୍ରାର ମଲାପୁର ଥାନା ଅଞ୍ଚଳରେ ଘଟିଛି  । ବୁଧବାର ରାତିରେ ଗ୍ରାମର ଜଣେ ସମ୍ପର୍କୀୟଙ୍କ ବିବାହ ଅନୁଷ୍ଠିତ ହେଉଥାଏ  । ତେଣୁ ଦମ୍ପତ୍ତି ନିଜ ପାଞ୍ଚ ବର୍ଷର ଝିଅ ସହ ବିବାହ କାର୍ଯ୍ୟରେ ଯୋଗଦେବାକୁ ଯାଇଥିଲେ  । ବରଗାଡ଼ି ରୋଷଣୀରେ ଯାଉଥିବାବେଳେ ସମସ୍ତେ ନାଚଗୀତରେ ମସଗୁଲ ରହିଥିଲେ  । ଏହି ସମୟରେ ଉକ୍ତ ଶିଶୁକନ୍ୟା ସେଠାରେ ଉପସ୍ଥିତ ରହିଥିଲା  । ରାତି ପ୍ରାୟ ୧୨ ଟା ସମୟରେ ମଧ୍ୟ ଶିଶୁ କନ୍ୟାଟି ନାଚୁଥିବା ନଜର ଆସିଥିଲା  । ପରେ ବିବାହ କାର୍ଯ୍ୟକ୍ରମ ଆରମ୍ଭ ହୋଇଥିଲା  । ବାପା-ମାଆ ମଧ୍ୟ ବିବାହ କାର୍ଯ୍ୟରେ ବେସ ବ୍ୟସ୍ତ ରହିଥିଲେ  । ତେଣୁ ଝିଅଟି ସମ୍ପର୍କୀୟଙ୍କ ପାଖରେ ଶୋଇଥିବା ନେଇ ଅନୁମାନ କରିଥିଲେ  । ବୁଧବାର ଯାଇ ଗୁରୁବାର ହୋଇଥିଲା  । ସମସ୍ତେ ଉଠିଥିଲେ କିନ୍ତୁ ନାବାଳିକର କୌଣସି ସୂଚନା ମିଲିନଥିଲା  । ପରିବାର ଓ ସମ୍ପର୍କୀୟ ବହୁ ଖୋଜାଖୋଜି କରିବା ପରେ ମଧ୍ୟ କୌଣସି ପତ୍ତା ମିଳି ନଥିଲା  । ରାତି ୧୨ ଟା ପରେ ଶିଶୁ କନ୍ୟାକୁ କେହି ଦେଖନଥିବା ମଧ୍ୟ କହିଥିଲେ  । ଶେଷରେ ସ୍ଥାନୀୟ ଥାନାରେ ଅଭିଯୋଗ କରିଥିଲେ ପରିବାର ଲୋକ  ।

ମଲାପୁର ପୋଲିସ ଘଟଣା ସ୍ଥଳରେ ପହଁଚି ସମସ୍ତ ବିଷୟରେ ପଚାରି ବୁଝିଥିଲେ  । ବିବାହ କାର୍ଯ୍ୟର ବ୍ୟସ୍ତତା ଭିତରେ ନାବାଳିକାର ବାପା-ମାଆ ପିଲାକୁ ଦେଖିନଥିବା କହିଥିଲେ  । ରାତି ୧୨ଟାରେ ଝିଅ ବରଯାତ୍ରୀଙ୍କ ମେଳରେ ନାଚୁଥିବା ଶେଷଥର ପାଇଁ ଦେଖିଥିବା କହିଥିଲେ ଅଭିଭାବକ  । ତେବେ ଏହା ପରେ ଝିଅକୁ ଆଉ ଦେଖନଥିଲେ  । ପରିଜନଙ୍କ ସହ ଶୋଇପଡିଥିବା ଅନୁମାନ କରିଥିଲେ, ତେଣୁ ଆଉ ଖୋଜିନଥିବା କହିଥିଲେ  । ସେପଟେ ବନ୍ଧୁ ପରିଜନଙ୍କ ସହ ଗ୍ରାମରେ ସର୍ଚ୍ଚ ଅପରେସନ ଜୋରଦାର କରିଥିଲା ସ୍ଥାନୀୟ ପୋଲିସ  । ପ୍ରାୟ ୨ ଘଣ୍ଟା ଖୋଜାଖୋଜି କରିବା ପରେ ଡ୍ୟାନ୍ସ କରୁଥିବା ସ୍ଥାନର ୨୦୦ ମିଟର ଦୂରରେ ଝିଅର ମୃତ ଶରୀର ପଡ଼ିଥିବା ପାଇଥିଲା ପୋଲିସ  ।  ସେପଟେ ଉଦ୍ଧାର ସମୟରେ ଶିଶୁ କନ୍ୟାଟି ଦେହରେ ନଥିଲା କପଡ଼ା  । ତେଣୁ ଶିଶୁ କନ୍ୟାଟିକୁ ବଳତ୍କାର ପରେ ହତ୍ୟା କରାଯାଇଥିବା ସନ୍ଦେହ କରାଯାଉଛି  ।

ସେପଟେ ଏପରି ସାଙ୍ଘାତିକ ଅଭିଯୋଗ ପରେ ଏସଏସପି ସୁଧୀର କୁମାର ସିଂଙ୍କ ସମେତ ଅନେକ ବରିଷ୍ଠ ପୋଲିସ ଅଧିକାରୀ ଘଟଣାସ୍ଥଳରେ ପହଁଚିଛନ୍ତି  । ଏସଏସପି କହିଛନ୍ତି ଏହି ଘଟଣା ଯଥା ଶୀଘ୍ର ପର୍ଦ୍ଦାଫାସ କରାଯିବ  । ଯେଉଁ ଅଭିଯୁକ୍ତ ଏହି ଘଟଣାରେ ସଂଶ୍ଲିଷ୍ଟ ସମସ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ  । ପୋଲିସର ସନ୍ଦେହରେ ରହିଛନ୍ତି ନାବାଳିକାର ସଂପର୍କୀୟ  । କାରଣ କୌଣସି ପରିଚିତ ଲୋକ ହିଁ ଘଟଣାରେ ଜଡିତ ଥିବା ଅନୁମାନ କରିଛି ପୋଲିସ  । ରାତି ୧୨ ଟାରେ ଡ୍ୟାନ୍ସ କରୁଥିବା ଝିଅକୁ ଅପହରଣ ଏବଂ ହତ୍ୟା କରିବା ପଛରେ କାହାର ହାତ ରହିଛି ତାହାର ସନ୍ଧାନ ଚଳାଇଛି  । ଭିଡ଼ିଓ ସୁଟ ହୋଇଥିବା କ୍ଲିପକୁ ତନ୍ନ ତନ୍ନ କରି ଯାଞ୍ଚ କରିବା ସହ ନାବାଳିକା ନାଚୁଥିବା ବେଳେ କେଉଁମାନେ ପାଖରେ ଥିଲେ, ସେମାନଙ୍କୁ ଚିହ୍ନଟ କରୁଛି ପୋଲିସ  ।