5T ଅଧ୍ୟକ୍ଷଙ୍କୁ ଧନ୍ୟବାଦ ଜଣାଇଲେ ୧୩ ସଂଗଠନର କର୍ମକର୍ତ୍ତା

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିଷ୍ପତ୍ତିକୁ ଚାରି ଆଡ଼େ ସ୍ବାଗତ । ଆଜି ବି ନବୀନ ନିବାସ ବାହାରେ ଶୁଭେଚ୍ଛୁ ଓ ସମର୍ଥକଙ୍କ ଭିଡ଼ । ଭତ୍ତା ବୃଦ୍ଧି ଯୋଗୁଁ ହୁଳହୁଳି ପକାଇ ଧନ୍ଯବାଦ ଜଣାଇଥିଲେ ମିଶନ ଶକ୍ତି ମାଆ । ସେହପରି ନୂତନ ଏନଏସି ମାନ୍ୟତା ପାଇଥିବା ବିଭିନ୍ନ ଅଞ୍ଚଳର ଲୋକଙ୍କ ପାଟିରେ ବି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ 5T ଅଧ୍ୟକ୍ଷଙ୍କ ଜୟଗାନ । ଏପରିକି ସଂଖ୍ୟାଲଘୁ ବି ସୁବିଧା ପାଇଥିବାରୁ ଲମ୍ବା ଧାଡ଼ିରେ ନବୀନ ନିବାସ ଯାଇ କୃତଜ୍ଞତା ଜଣାଇଥିଲେ । ମୋଟ ୧୩ଟି ସଂଗଠନ ଆଜି ଭେଟି ଥିଲେ । ଏହି ଅବସରରେ ସବୁ ସଂଗଠନଗୁଡିକୁ ମୁଖ୍ଯମନ୍ତ୍ରୀଙ୍କ ନୂତନ ଓ ସଶକ୍ତ ଓଡ଼ିଶା ଗଠନର ସ୍ବପ୍ନ ସାକାର ପାଇଁ କଠିନ ପରିଶ୍ରମ କରିବାକୁ ପରାମର୍ଶ ଦେଇଛନ୍ତି 5T ଅଧ୍ୟକ୍ଷ ।

ସଂଗଠନର କର୍ମକର୍ତ୍ତାମାନେ ମୁଖ୍ୟମନ୍ତ୍ରୀ ଏବଂ 5T ଅଧ୍ୟକ୍ଷଙ୍କୁ ଧନ୍ୟବାଦ ଜଣାଇବା ସହ କହିଛନ୍ତି, ରାଜ୍ୟରେ ଚାଲିଥିବା ରୂପାନ୍ତରଣ ଆମକୁ ଉତ୍ସାହିତ କରିଛି । ବଡ଼ ଲକ୍ଷ୍ୟ ହାସଲ କରିବା ପାଇଁ ସମର୍ପଣ ଭାବରେ ଆମେ କାମ କରିବୁ । 5T ଅଧ୍ୟକ୍ଷ ସଂଗଠନର କର୍ମକର୍ତ୍ତାଙ୍କୁ ଧନ୍ୟବାଦ ଜଣାଇବା ସହ କହିଛନ୍ତି, ମୁଖ୍ୟମନ୍ତ୍ରୀଙ୍କ ନୂଆ ଓ ସଶକ୍ତ ଓଡ଼ିଶା ସ୍ବପ୍ନକୁ ପୂରଣ କରିବା ଆମର ଏକମାତ୍ର ଲକ୍ଷ୍ୟ । ନୂଆ ଓ ସଶକ୍ତ ଓଡ଼ିଶା ପରିକଳ୍ପନା ସାକାର କରିବାକୁ ହେଲେ ସମସ୍ତଙ୍କୁ ସାମୂହିକ ଭାବେ ପ୍ରୟାସ କରିବାକୁ ପଡିବ ।

ରାଜ୍ୟସଭା ସାଂସଦ ମାନସ ମଙ୍ଗରାଜଙ୍କ ନେତୃତ୍ବରେ କୁକୁଡାଖଣ୍ଡି ଏନଏସିର ଜନତା 5T ଅଧ୍ୟକ୍ଷଙ୍କୁ ଭେଟି ଧନ୍ୟବାଦ ଅର୍ପଣ କରିଥିଲେ । ସେହିପରି କଟକ ମେୟର ସୁବାସ ସିଂଙ୍କ ନେତୃତ୍ବରେ ଅଲ ଓଡ଼ିଶା ଜିପିଏଲଏ (MBK, CRP, କୃଷୀ ମିତ୍ର, ପ୍ରାଣୀ ମିତ୍ର, LSP) ସଦସ୍ୟ 5T ଅଧ୍ୟକ୍ଷଙ୍କୁ ଭେଟିଥିଲେ । ପଦ୍ମନାଭ ବେହେରାଙ୍କ ନେତୃତ୍ବରେ ବୀରମହାରାଜପୁର ଏନଏସି, ବର୍ଷା ସିଂ ବରିହାଙ୍କ ନେତୃତ୍ବରେ ପାଇକମାଳ ଏନଏସି, ସ୍ନେହାଙ୍ଗିନୀ ଛୁରିଆଙ୍କ ନେତୃତ୍ବରେ ବରଗଡ଼ ଏନଏସିର ଭେଡେନ ଜନତା ଏବଂ ରମେଶ ମାଝିଙ୍କ ନେତୃତ୍ବରେ ଯାଦବ ମହାସଙ୍ଘ କର୍ମକର୍ତ୍ତା 5T ଅଧ୍ୟକ୍ଷଙ୍କୁ ଭେଟି ଧନ୍ୟବାଦ ଜଣାଇଥିଲେ । ଏମାନଙ୍କ ସମେତ ବିିଭିନ୍ନ ସଙ୍ଗଠନର କର୍ମକର୍ତ୍ତା 5T ଅଧ୍ୟକ୍ଷଙ୍କୁ ଭେଟିଥିଲେ ।