କୁକୁରକୁ ଉଦ୍ଧାର କରିବାକୁ ଯାଇ AWTE ସଦସ୍ୟ ଆକ୍ରମଣର ଶିକାର
ବାଲିପାଟଣା: ଆନିମଲ୍ ଓ୍ୱେଲଫେୟାର୍ ଟ୍ରଷ୍ଟ ସଦସ୍ୟଙ୍କୁ ମରଣାନ୍ତକ ଆକ୍ରମଣ ଅଭିଯୋଗ । ଆହାତ କୁକୁରକୁ ଉଦ୍ଧାର କରିବାକୁ ଯାଇଥିବାରୁ ଆକ୍ରମଣ । ଏଭଳି ଏକ ଘଟଣା ଦେଖିବାକୁ ମିଳିଛି ରାଜଧାନୀ ଉପକଣ୍ଠ ବାଲିଅନ୍ତା ଥାନା ପୁରଣ ଶାସନ ଗାଁରେ | ଆକ୍ରମଣରେ ଆନିମଲ୍ ଓ୍ୱେଲଫେୟାର୍ ଟ୍ରଷ୍ଟର ସଦସ୍ୟ ସତ୍ୟମ୍ ପୃଷ୍ଟି ଏବଂ ଅନ୍ୟ ଜଣେ ସୂଚନା ପ୍ରଦାନକାରୀ ଆହାତ ହୋଇଛନ୍ତି । ପୁରଣ ଶାସନ ଗ୍ରାମର ବିଜୟ ମଲ୍ଲିକ ଏକ କୁକୁର କୁ ଅମାନୁଷିକ ଭାବେ ମାଡ ମାରି ଲହୁ ଲୁହାଣ କରିବା ସହ କୁକୁରର ଅଣ୍ଟା ଭାଙ୍ଗି ଦେଇଥିଲେ । ଘଟଣାକୁ ଗ୍ରାମର ଜଣେ ମହିଳା ଆନିମଲ୍ ଓ୍ୱାଲେଫେୟାର ଟ୍ରଷ୍ଟକୁ ଜଣାଇଥିଲେ । ଦୁଇ ଜଣିଆ ଟିମ୍ ପୁରଣ ଶାସନ ଗ୍ରାମରେ ପହଁଞ୍ଚି ଶ୍ୱାନଟିକୁ ଉଦ୍ଧାର କରିବା ସମୟରେ ବିଜୟ ଅଶ୍ରାବ୍ୟ ଭାଷାରେ ଗାଳି ଗୁଲଜ କରିଥିଲା । ପରେ ବିଜୟ ସହ ଗ୍ରାମର ୧୦ ରୁ ୧୨ ଜଣ ସଂଘବଦ୍ଧ ଭାବେ ବେଲଚା କୋଦାଳ ଆଦିରେ ଆକ୍ରମଣ କରିଥିଲେ । ଆକ୍ରମଣରେ ଟ୍ରଷ୍ଟର ସଦସ୍ୟ ସତ୍ୟମ୍ ପୃଷ୍ଟି ଏବଂ ସୂଚନା ପ୍ରଦାନକାରୀ ମହିଳା ଗୁରୁତର ଭାବେ ଆହାତ ହୋଇଛନ୍ତି । ଟ୍ରଷ୍ଟ ପକ୍ଷରୁ ବାଳକାଟି ଫାଣ୍ଡିରେ ଲିଖିତ ଅଭିଯୋଗ କରିଛନ୍ତି ଟ୍ରଷ୍ଟର ଚେୟାରପର୍ସନ ପୂରବୀ ପାତ୍ର ।
