ଏଠି ଗଛ ଉପରେ କାହିଁକି ବସିଛି ପୋଲିସ? ଜାଣନ୍ତୁ

ମଥୁରା: ଉତ୍ତର ପ୍ରଦେଶର ଯମୁନା ଏକ୍ସପ୍ରେସ ୱେରେ ଲୁଟ ଘଟଣା ପୋଲିସ ପ୍ରଶାସନର ଚିନ୍ତା ବଢାଇ ଦେଇଛି  । ଲଗାତାର ଲୁଟ ପରେ ଜାତୀୟ ରାଜପଥରେ ପାଟ୍ରୋଲିଂକୁ ବଢାଇ ଦିଆଯାଇଛି  । ଯେମିତି ପ୍ରତି ଲୁଟେରାଙ୍କୁ କାବୁ କରିହେବ ପୋଲିସ ସେମିତି କିଛି ପଇନ୍ତରା ଆପଣାଇଛି  । ଏବେ ଗଛ ଉପରେ ବସି ଅପରାଧୀଙ୍କ ଉପରେ ନଜର ରଖିଛି ପୋଲିସ  । ସାଧା ପୋଷାକରେ ଏକ୍ସପ୍ରେସ ୱେରେ ପ୍ରତି ଦୁଇ କିଲୋମିଟରରେ ଜଗିଛି ପୋଲିସ  । ଏହାଛଡା ସାଧା ପୋଷାକରେ ମଧ୍ୟ ବିଲ ଭିତରେ ଜଗିଛି ପୋଲିସ  । ମଥୁରା ପୋଲିସର ଏଭଳି କାର୍ଯ୍ୟାନୁଷ୍ଠାନରେ ଖୁସି ପ୍ରକାଶ କରିଛନ୍ତି ଯମୁନା ଏକ୍ସପ୍ରେସ ୱେ ପ୍ରାଧିକରଣ  ।

ସାଧା ପୋଷାକରେ ପୋଲିସ ବନ୍ଧୁକ ଓ ଦୂରବିକ୍ଷଣ ଯନ୍ତ୍ର ସହ ମଥୁରା ଏକ୍ସପ୍ରେସରେ ନଜର ଆସୁଛନ୍ତି  । ସାଧାରଣ ଜନତା ଭଳି ଦେଖାଯିବା ପାଇଁ ରାସ୍ତା କଡରେ ଖଟିଆର ବ୍ୟବସ୍ଥା କରାଯାଇଛି  । ତେବେ ପ୍ରାଥମିକ ତଦନ୍ତରୁ ଅପରାଧୀଙ୍କ ବୟସ ୨୦ ରୁ ୩୫ ବର୍ଷ ବୟସ ହୋଇଥିବା ଅନୁମାନ କରାଯାଉଛି  । ସ୍କେଚ ଆଧାରରେ ଏକ୍ସପ୍ରେସ ୱେରେ ଲାଗିଥିବା ସିସିଟିଭିର ନିୟମିତ ଯାଞ୍ଚ କରାଯାଇ ଗିରଫ କରିବା ପାଇଁ ପୋଲିସ ପ୍ରୟାସ ଚଳାଇଛି  ।

୧୬୫ କିଲୋମିଟର ଲମ୍ବ ଓ ଛଅ ଲେନ୍‌ ବିଶିଷ୍ଟ ଯମୁନା ଏକ୍ସପ୍ରେସ ୱେ ନୋଏଡାକୁ ଆଗ୍ରା ସହ ଯୋଡୁଛି  । ମଥୁରା ଜିଲ୍ଲାରେ ଏକ୍ସପ୍ରେସ ୱେର ଲମ୍ବ ପାଖାପାଖି ୬୫ କିଲୋମିଟର ପର୍ଯ୍ୟନ୍ତ ରହିଛି  । ଏହି ଜିଲ୍ଲାରେ ସାତୋଟି ପୋଲିସ ଥାନା ଜାତୀୟ ରାଜପଥ ଅଧୀନରେ ରହିଛି  ।