ଚୀନ ପାଇଁ ଆମେରିକାର ମାଷ୍ଟର ପ୍ଲାନ, ଏହି ଦେଶ ମାନଙ୍କ ସହିତ ମିଶି ଆରମ୍ଭ କରିବ ନାଟୋ ଭଳି ସଙ୍ଗଠନ

ଓ୍ୱାଶିଂଟନ୍: ଦକ୍ଷିଣ ଏସିଆ ଏବଂ ଦକ୍ଷୀଣ ଚୀନ ସାଗରରେ ଚୀନର ଦାଦାଗିରି ବିରୁଦ୍ଧରେ ଆମେରିକା ନିଜର ମାଷ୍ଟର ପ୍ଲାନ ପ୍ରସ୍ତୁତ କରିସାରିଲାଣି । ଆମେରିକା ଇଣ୍ଡୋ-ପେସିଫିକ କ୍ଷେତ୍ରରେ ଭାରତ,ଜାପାନ ଏବଂ ଅଷ୍ଟ୍ରେଲିଆକୁ ନେଇ North Atlantic Treaty Organization ବା ନାଟୋ ଭଳି ଏକ ସଙ୍ଗଠନ ଗଠନ କରିବାକୁ ଚାହୁଁଛି । ଚୀନକୁ ଲଗାମ ଦେବା ପାଇଁ  ନାଟୋ ଭଳି ଏକ ମହାସନ୍ଧିର ଆବଶ୍ୟକତା ରହିଛି ବୋଲି ଅନୁଭବ କରୁଛି ଆମେରିକା । ଆମେରିକାର ଉପ ବୈଦେଶିକ ମନ୍ତ୍ରୀ ଷ୍ଟିଫେନ ବିଗନ ସୋମବାର ଦିନ କହିଛନ୍ତି କି, ଖୁବଶୀଘ୍ର ଏହି ୪ ଦେଶର ବୈଠକ ଦିଲ୍ଲୀରେ ଅନୁଷ୍ଠିତ ହୋଇପାରେ । ଉକ୍ତ ବୈଠକରେ ପ୍ରସ୍ତାବିତ ସଙ୍ଗଠନ ଏବଂ ସୈନ୍ୟ ସହଯୋଗକୁ ନେଇ ଆଲୋଚନା କରାଯିବ । ବିଗନ ୟୁଏସ ଇଣ୍ଡିଆ ଷ୍ଟ୍ରାଟେଜିକ୍ ପାର୍ଟନରଶିପ ଫୋରମରେ ଆମେରିକାର ଲକ୍ଷ୍ୟ ବିଷୟରେ ନିଜର ମତ ପ୍ରକାଶ କରିଛନ୍ତି । ତାଙ୍କ କହିବାନୁଯାୟୀ ଏହି ଚାରି ଦେଶଙ୍କୁ ମିଶି ଚୀନକୁ ସାମ୍ନା କରିବାକୁ ପଡ଼ିବ । ସୂଚନାଯୋଗ୍ୟ ବିଗନ ଭାରତରେ ଆମେରିକାର ପୂର୍ବ ରାଷ୍ଟ୍ରଦୂତ ରିଚାର୍ଡ଼ ବର୍ମାଙ୍କ ସହିତ ଅନଲାଇନରେ ଆଲୋଚନା କରୁଥିଲେ ।

ନାଟୋ ଭଳି ସଙ୍ଗଠନର ଆବଶ୍ୟକତା

ବିଗନ କହିଛନ୍ତି କି ଇଣ୍ଡୋ ପେସିଫିକ କ୍ଷେତ୍ରରେ ମଜବୁତ ସ୍ଥିତିର ଆବଶ୍ୟକତା ରହିଛି । ତାଙ୍କ ନିକଟରେ ନାଟୋ କିମ୍ବା ଇଉରୋପୀୟ ୟୁନିଅନ ଭଳି ମଜବୁତ ମେଣ୍ଟ ନାହିଁ । ଏକଦା ନାଟୋରେ ସାମିଲ  ହେବାକୁ ଅନେକ ଦେଶ ନାପସନ୍ଦ କରୁଥିଲେ । କିନ୍ତୁ ପରେ ଅନେକ ଦେଶ ଏଥିରେ ସାମିଲ ହୋଇଥିଲେ ।  ଏହି ମହା ଚୁକ୍ତି ସେତେବେଳେ ସମ୍ଭବ ଯେତେବେଳେ ଅନ୍ୟ ଦେଶ ଗୁଡ଼ିକ ଆମେରିକା ଭଳି ଦୃଢ ପ୍ରତିବଦ୍ଧ ହେବେ । ବିଗନ ଏହା ମଧ୍ୟ କହିଛନ୍ତି କି ମାଲବାର ନାଭାଲ ଏକ୍ସରସାଇଜରେ ଅଷ୍ଟ୍ରେଲିଆର ଭାଗ ନେବା ପ୍ରତିରକ୍ଷା ଦୀଗରେ ଏକ ବଡ ପଦକ୍ଷେପ ।

ଗଣମାଧ୍ୟମର ଖବର ଅନୁସାରେ ଭାରତ ସ୍ପଷ୍ଟ ଭାବରେ ମାଲାବାର ନାଭାଲ ଏକ୍ସରସାଇଜରେ ଅଷ୍ଟ୍ରେଲିଆର ସାମିଲ ହେବାକୁ ନେଇ ସଙ୍କେତ ଦେଉଛି । ବିଗନ କହିଛନ୍ତି କି Quadrilateral Security Dialogueର ଦେଶ ଗୁଡ଼ିକ ସହିତ ଭିଏତନାମ, ସାଉଥ କୋରିଆ ଏବଂ ନ୍ୟୁଜିଲ୍ୟାଣ୍ଡକୁ ସାମିଲ କରାଯାଉ । ତେବେ ଏଥିରେ ପୂର୍ବରୁ ଭାରତ,ଜାପାନ,ଅଷ୍ଟ୍ରେଲିଆ ଏବଂ ଆମେରିକା ସାମିଲ ଅଛନ୍ତି । ଏହାର ଲକ୍ଷ୍ୟ ଇଣ୍ଡୋ-ପେସିଫିକ କ୍ଷେତ୍ରରେ ଶାନ୍ତି ବଜାୟ ରଖିବା ।

ସୂଚନାଯୋଗ୍ୟ ମାଲାବାର ନାଭାଲ ଏକ୍ସରସାଇଜ ୧୯୯୨ରେ ଭାରତ ଓ ଆମେରିକା ମଧ୍ୟରେ ଆରମ୍ଭ ହୋଇଥିଲା । ପରେ ୨୦୧୫ରେ ଏଥିରେ ଜାପାନ ସାମିଲ ହେଲା । ୨୦୦୭ରେ ଥରେ ଅଷ୍ଟ୍ରେଲିଆ ଏଥିରେ ଭାଗୀଦାର ହୋଇଥିଲା । କିନ୍ତୁ ପରେ ଏଥିରୁ ଓହରି ଯାଇଥିଲା । ୨୦୦୭ରେ ସିଙ୍ଗାପୁର ମଧ୍ୟ ସାମିଲ ହୋଇଥିଲା । ଚଳିତ ଖବର ଅନୁସାରେ ଏବେ ପୁଣିଥରେ ଅଷ୍ଟ୍ରେଲିଆ ଏଥିରେ ସାମିଲ ହେବାପାଇଁ ଇଛା ପ୍ରକାଶ କରିଛି ।