ସରକାରଙ୍କୁ ଆର୍ଥିକ ସହାୟତା ମାଗିଲେ ମାରୁତି-ସୁଜୁକୀର ଏମ.ଡି

ନୂଆଦିଲ୍ଲୀ: କରୋନା ମହାମାରୀ କାରଣରୁ ଅନ୍ୟ ସମସ୍ତ ଇଣ୍ଡଷ୍ଟ୍ରି ଭଳି ଅଟୋମୋବାଇଲ ସେକ୍ଟରରେ ମଧ୍ୟ ଆର୍ଥିକ ସମସ୍ୟା ସୃଷ୍ଟି ହେଉଛି । ଏଭଳି ପରିସ୍ଥିତିରେ ମାରୁତି ସୁଜୁକୀର ମ୍ୟାନେଜିଙ୍ଗ ଡାଇରେକ୍ଟର ଏବଂ ସିଇଓ କେନିଚି ଆୟୁକାବା ସରକାରଙ୍କୁ ସହାୟତା ମାଗିଛନ୍ତି । ଅଟୋମୋବାଇଲ ଇଣ୍ଡଷ୍ଟ୍ରି କଠିନ ସମସ୍ୟା ମଧ୍ୟରେ ଗତି କରୁଥିବା ସେ କହିଛନ୍ତି । ଜିଏସଟି ହାର କମ କରିବା ବ୍ୟତୀତ ସ୍କ୍ରାପେଜ ପଲିସିରେ ସରକାରଙ୍କ ଠାରୁ ସହାୟତା ଲୋଡ଼ିଛି ମାରୁତି ସୁଜୁକୀ । ତେବେ ଜିଏସଟି ହାର କମ୍ କରିବା ଏବଂ ପ୍ରୋତ୍ସାହନ ଯୋଜନାକୁ ଖୁବ ଉତ୍ସାହର ସହିତ ଅପେକ୍ଷା କରିଥିବା ମଧ୍ୟ ସେ ତାଙ୍କ ବୟାନରେ ଉଲ୍ଲେଖ କରିଛନ୍ତି ।

ଆୟୁକାବା କହିଛନ୍ତି କି, କରୋନା ଭୂତାଣୁ ମହାମାରୀ କାରଣରୁ ଗତ ବର୍ଷ ଆର୍ଥିକ ସ୍ଥିତି ସାମାନ୍ୟ ରହିଥିବା ବେଳେ ଚଳିତ ବର୍ଷ ମାନ୍ଦାବସ୍ଥା କାରଣରୁ ଅଟୋମୋବାଇଲ ଇଣ୍ଡଷ୍ଟ୍ରି ଖୁବ ପଛକୁ ଫେରି ଯାଇଛି । ବିଶ୍ୱ ସ୍ୱାସ୍ଥ୍ୟ ସଙ୍କଟ ସୃଷ୍ଟି ଯୋଗୁଁ ଭାରତୀୟ ଅଟୋମୋବାଇଲ ଇଣ୍ଡଷ୍ଟ୍ରି ଭେଣ୍ଟିଲେଟର, ପିପିଇ ପ୍ରସ୍ତୁତିରେ ଏକ ଭୂମିକା ଗ୍ରହଣ କରିଛି । ସେ ଏହା ମଧ୍ୟ କହିଛନ୍ତି କି ଦୀର୍ଘ ଦିନର ବ୍ୟବଧାନରେ ଗତ ଅଗଷ୍ଟ ମାସରେ ଆମେ ପୂର୍ବ ବର୍ଷ ତୁଳନାରେ ଭଲ କାରବାର  କରିଛୁ । ତଥାପି ଗତ ବର୍ଷ ସହିତ ତୁଳନା କରିବା ଉଚିତ ହେବ ନାହିଁ । ଗତବର୍ଷ ୧୫ରୁ ୨୫ ପ୍ରତିଶତ ନକରାତ୍ମକ ପରିସ୍ଥିତି ଥିବା ବେଳେ ଚଳିତ ବର୍ଷ ନକରାତ୍ମକ ବୃଦ୍ଧି ଇଣ୍ଡଷ୍ଟ୍ରିକୁ ବହୁ ବର୍ଷ ପଛକୁ ନେଇ ଯାଇଛି । ସୂଚନାଯୋଗ୍ୟ କେନିଚି ଆୟୁକାବା ଏହି କଥା କେନ୍ଦ୍ର ମନ୍ତ୍ରୀ ପ୍ରକାଶ ଜାଭେଦକରଙ୍କ ଉପସ୍ଥିତିରେ କହିଛନ୍ତି । ଆୟୁକାବା ଅଟୋମୋବାଇଲ ଇଣ୍ଡଷ୍ଟ୍ରି ସଂସ୍ଥା ଏସ.ଆଇ.ଏ.ଏମର ମଧ୍ୟ ଅଧ୍ୟକ୍ଷ ।