୬ ଘଣ୍ଟା ଅକାମୀ ଫେସବୁକ୍, ଜୁକରବର୍ଗ ହରାଇଲେ ୭ ବିଲିୟନ ଡଲାର
ନନ୍ଦିଘୋଷ ବ୍ୟୁରୋ: ୬ ଘଣ୍ଟାର ସେବା ବନ୍ଦ ହୋଇଯିବା ଫଳରେ ଫେସବୁକ ହରାଇଛି ୭ ବିଲିୟନ ଡଲାର । ଏକ ବଡ଼ ଧରଣ ବ୍ଲାକଆଉଟ ପୂର୍ବରୁ କେବେ ଘଟି ନଥିଲା । ଗତକାଲି ଅପରାହ୍ନ ୪ଟାରୁ ସାଇଟ ଅକାମୀ ହୋଇଥିବା ପରିଲକ୍ଷିତ ହୋଇଥିଲା । ତେବେ ୫ଟା ୪୫ରୁ ଆଂଶିକ ଭାବେ ସେବା ପ୍ରଦାନ କରାଯାଇଥିଲା । ସେବା ଅଚଳ ନେଇ ପ୍ରାୟ ୨୦ ହଜାର ୟୁଜର ଅଭିଯୋଗ କରିଥିଲେ । ସେପଟେ ଏହି ବ୍ଲାକଆଉଟ ଲାଗି ଫେସବୁକ ଚିଫ୍ ଟେକ୍ନୋଲୋଜି ଅଫିସର ମାଇକ୍ ସ୍କ୍ରୋଇଫର ଦୁଃଖ ପ୍ରକାଶ କରିଛନ୍ତି । ୧୦୦ ପ୍ରତିଶତ ସେବା ଖୁବଶୀଘ୍ର ଯୋଗାଇଦିଆଯିବ ବୋଲି ସେ କହିଛନ୍ତି ।
ଫେସବୁକର ସେୟାର ମଧ୍ୟରୁ ୨୦୦ କୋଟି ଦୈନିକ ସକ୍ରିୟ ୟୁଜରଙ୍କ ସଂଖ୍ୟା ଗତକାଲି ୪.୯ ପ୍ରତିଶତ ହ୍ରାସ ପାଇଥିଲା । ଆଭ୍ୟନ୍ତରୀଣ ତ୍ରୁଟି ଯୋଗୁ ଏହି ବ୍ଲାକ ଆଉଟ ହୋଇଥିଲା ବୋଲି ନିରାପତ୍ତା ବିଶେଷଜ୍ଞମାନେ କହିଛନ୍ତି । ସେପଟେ ଏହି ଘଟଣାରେ ଫେସବୁକ ପ୍ରତିଷ୍ଠାତା ତଥା ମୁଖ୍ୟ କାର୍ଯ୍ୟନିର୍ବାହୀ ମାର୍କ ଜୁକରବର୍ଗ କେଇ ଘଣ୍ଟାରେ ହରାଇଛନ୍ତି ୭ ବିଲିୟନ ଡଲାର । ଫେସବୁକର ଷ୍ଟକ ୪.୯ ପ୍ରତିଶତ ହ୍ରାସ ପାଇବା ଯୋଗୁ ଏହି ଘାଟା ସୃଷ୍ଟି ହୋଇଥିଲା । ଅସହିଷ୍ଣୁତା ମୂଳକ ତଥ୍ୟ ଓ ତ୍ରୁଟିଯୁକ୍ତ ସୂଚନା ପ୍ରସାରଣ ଅଭିଯୋଗ କରି କମ୍ପାନୀ ପକ୍ଷରୁ ଅଧିକରୁ ଅଧିକ ଆକାଉଣ୍ଟ ଉପରେ କଟକଣା ଜାରି କରି କମ୍ପାନୀ ଅଧିକ ଲାଭ ପାଉଛି ବୋଲି ଓ୍ବେବସାଇଟ ମନିଟରିଂ ଗ୍ରୁପ ଡାଉନ ଡିଟେକ୍ଟର ଅଭିଯୋଗ କରିଥିଲା ।
ପ୍ରାୟ ରାତି ୯ଟା ପରେ ଫେସବୁକ, ଇନଷ୍ଟାଗ୍ରାମ ଓ ହ୍ବାଟସଆପ୍ ଅକାମୀ ହୋଇଯାଇଥିଲା । ଏହି ତିନୋଟି ସୋସିଆଲ ସାଇଟ କାମ ନକିରବା ଫଳରେ କୋଟି କୋଟି ୟୁଜର ପ୍ରଭାବିତ ହୋଇଥିଲେ । ସେପଟେ ଯେଉଁ ୬ ଘଣ୍ଟା ପାଇଁ ଫେସବୁକ ବନ୍ଧ ହୋଇଯାଇଥିଲା, ସେଥିଲାଗି ବିଲିୟନ ଡଲାର ହରାଇଛି କମ୍ପାନୀ । ଏତେବଡ଼ କ୍ଷତି ଏବଂ ତ୍ରୁଟି ପୂର୍ବରୁ କେବେ ଘଟିନଥିଲା । ଫେସବୁକ ଯୋଗାଇ ଆସୁଥିବା ନିରବିଛିନ୍ନ ସେବା ବ୍ୟାଘାତ ହେବା ଆମ ପାଇଁ ଦୁଖଃଦ ଘଟଣା । ଏଥିପାଇଁ ୟୁଜରଙ୍କ ନିଟରେ କ୍ଷମାପ୍ରାର୍ଥୀ ବୋଲି କହିଛନ୍ତି ମାର୍କ ଜୁକରବର୍ଗ ।
