ଦିନେ ମଣିଷ ମାରୁଥିଲେ, ଆଜି ପ୍ରଭୁ ନାମ ଜପୁଛନ୍ତି

ମୁମ୍ବାଇ: ରକ୍ତପାତ ବଦଳରେ ଆଧ୍ୟାତ୍ମିକତା ଆଡକୁ ଢଳିଲେ ବିଶିଷ୍ଟ ମାଓନେତା କୋବାଡ ଘନ୍ଦି । ଏହି କାରଣରୁ ସିପିଆଇ ମାଓବାଦୀ ସଂଗଠନର ସଦସ୍ୟତାରୁ ତାଙ୍କୁ ବାଦ୍ ଦିଆଯାଇଛି । ମାର୍କସବାଦର କୌଣସି ଉତ୍ତମ ମୂଲ୍ୟବୋଧ ନାହିଁ ବୋଲି ସେ ଦର୍ଶାଇବା ସହ ଆଧ୍ୟାତ୍ମିକତା ଆଡକୁ ସେ ଢଳିବା ପରେ ସଂଗଠନ ଏହି ପଦକ୍ଷେପ ନେଇଛି । ସଂଗଠନର ମୁଖପାତ୍ର ଅଭୟ କହିଛନ୍ତି-ଦୀର୍ଘ ୫୦ ବର୍ଷ ଧରି କୋବାଡ ନକ୍ସଲ ଆନ୍ଦୋଳନ ସହ ସାମିଲ ଥିଲେ । ପ୍ରଥମେ ସେ ସିପିଆଇ ଏମଏଲ ଓ ପରେ ସିପିଆଇ ମାଓବାଦୀରେ ସାମିଲ ହୋଇଥିଲେ । ସେ ଅନେକ ଦିନ ଧରି ଜେଲରେ ବି ଥିଲେ ।

ସେ ମୁମ୍ବାଇରେ ପତ୍ନୀ ଅନୁରାଧାଙ୍କ ସହ ବସ୍ତି ଅଞ୍ଚଳରେ କାମ କରୁଥିଲେ । ମାତ୍ର କିଛି ଦିନ ଧରି ସେ ମାର୍କସବାଦ, ଲେନିନବାଦ ଓ ମାଓବାଦୀ ଚିନ୍ତାଧାରା ଛାଡି ଆଧ୍ୟାତ୍ମିକପନ୍ଥୀ ହେବାରେ ଲାଗିଥିଲେ । ଫଳରେ ତାଙ୍କ ସଦସ୍ୟତା ନବୀକରଣ ନ କରିବାକୁ ସିପିଆଇ ମାଓବାଦୀ ନିଷ୍ପତ୍ତି ନେଇଛି । ସେ ମାର୍କସବାଦୀ ବୁଦ୍ଧିଜୀବୀ ଭାବେ ଦେଶ ଓ ଦେଶ ବାହାରେ ବେଶ୍ ଜଣାଶୁଣା ଥିଲେ । ସେ ଇଂଲଣ୍ଡରେ ଶିକ୍ଷାଲାଭ କରିଥିବା ବେଳେ ୨୦୦୯ରେ ସିପିଆଇ ମାଓବାଦୀ ସଂଗଠନରେ ଯୋଗଦେଇଥିଲେ ।