ମାଲକାନଗିରି ପୋଲିସକୁ ବଡ଼ ସଫଳତା, ଦୁର୍ଦ୍ଧାନ୍ତ ମାଓବାଦୀ ଲକ୍ଷ୍ମଣ ପଡ଼ିଆମି ଗିରଫ

ମାଲକାନଗିରି: ଦୁର୍ଦ୍ଧାନ୍ତ ମାଓବାଦୀ ଗିରଫ । ମାଥିଲି ବ୍ଲକ ମହୁପଦର୍ ମାଓ ସଂଗଠନର ଏରିଆ ମେମ୍ବର ଲକ୍ଷ୍ମଣ ପଡ଼ିଆମିକୁ ଗିରଫ କରିଛି ମାଲକାନଗିରି ପୋଲିସ । ଗତକାଲି ମାଥିଲି ଅଞ୍ଚଳର ତୁଳସୀ ପାହାଡ଼ରେ ଏସଓଜି ଏବଂ ଡିଭିଏଫ୍ ବାହିନୀ ସର୍ଚ୍ଚ ଅପରେସନ କରିବା ସମୟରେ ଗୋଟିଏ ଦେଶୀ ବନ୍ଧୁକ ସହ ଲକ୍ଷ୍ମଣକୁ ଗିରଫ କରିଥିଲା । ଲକ୍ଷ୍ମଣର ଘର ଛତିଶଗଡ଼ର ଦରଭା ଅଞ୍ଚଳର ବୋଲି ଜଣାପଡ଼ିଛି ।

୨୦୧୭ରୁ ମାଓ ସଂଗଠନରେ ସକ୍ରିୟ ରହିଥିଲା ଲକ୍ଷ୍ମଣ । ଟେମୁରୁପାଲି ପଞ୍ଚାୟତ ଅଫିସ୍ ଭଙ୍ଗାରୁଜା ଓ ଲୁଟ୍ କରିବା ତଥା ତାଳପଦର ଗାଁର ସୁକୁମାର ମଣ୍ଡଳ ହତ୍ୟା ମାମଲାରେ ସଂପୃକ୍ତ ଥିବା ଜଣାପଡ଼ିଛି । ରାଜ୍ୟ ସରକାରଙ୍କ ପକ୍ଷରୁ ଲକ୍ଷ୍ମଣ ନାଁରେ ଏକ ଲକ୍ଷ ଟଙ୍କାର ପୁରସ୍କାର ଘୋଷଣା କରାଯାଇଥିଲା । ଛତିଶଗଡ଼ ରାଜ୍ୟର ମଧ୍ୟ ବିଭିନ୍ନ ମାଓ ହିଂସାରେ ସଂପୃକ୍ତ ରହିଥିବା ମାଲକାନଗିରି ଏସପି ସୂଚନା ଦେଇଛନ୍ତି ।