କରୋନା ସଂକ୍ରମଣରେ ପ୍ରାଣ ହରାଇଛନ୍ତି ୩୦୦ରୁ ଅଧିକ ସାମ୍ବାଦିକ

ନୂଆଦିଲ୍ଲୀ: କରୋନା ସଂକ୍ରମଣରେ ପୂର୍ବ ବର୍ଷ ଅଧିକ ସଂଖ୍ୟାରେ ଆଗ ଧାଡିର ଯୋଦ୍ଧା ତଥା ଡାକ୍ଟର, ସ୍ୱାସ୍ଥ୍ୟ କର୍ମୀ, ପୋଲିସ କର୍ମୀଙ୍କର ଜୀବନ ଯାଇଥିଲା । ଯାହାକୁ ଦୃଷ୍ଟିରେ କରୋନାର ଦ୍ୱିତୀୟ ପ୍ରବାହରେ ସେମାନଙ୍କ ପ୍ରଥମେ ଟିକାକରଣ କରାଯାଇଥିଲା । ଫଳରେ ଚଳିତ ବର୍ଷ ଫ୍ରଣ୍ଟ ଲାଇନ୍ ୱାକର୍ସଙ୍କର ମୃତ୍ୟୁ ପୂର୍ବ ବର୍ଷ ତୁଳନାରେ କମ୍ ରହିଥିଲା ।

କିନ୍ତୁ ଏଥିରୁ ବାଦ୍ ପଡିଯାଇଥିଲେ ସାମ୍ବାଦିକ ମାନେ । ସଂକ୍ରମଣକୁ ଖାତିର ନକରି ସାମ୍ବାଦିକ ମାନେ ଗ୍ରାଉଣ୍ଡ ରିପୋର୍ଟିଂ କରିବାକୁ ପଛାଇ ନଥିଲେ । ପରିଣାମ ସ୍ୱରୁପ ବିଭିନ୍ନ ରାଜ୍ୟରୁ ପାଖାପାଖି ୩୦୦ରୁ ଅଧିକ ସାମ୍ବାଦିକ ମାନଙ୍କ ମୃତ୍ୟୁ ହେବା ଭଳି ଖବର ମିଳିଥିଲା । ପରିସ୍ଥିତି ଏଭଳି ହେଲା ଯେ ଏପ୍ରିଲ୍ ମାସରେ ପ୍ରତିଦିନ ୩ ଜଣ ସାମ୍ବାଦିକଙ୍କ ମୃତ୍ୟୁ ଘଟିଥିଲା । ମେ ମାସ ବେଳକୁ ତାହା ବଢିକି ଦୈନିକ ୪ରେ ପହଞ୍ଚିଥିଲା ।

ଖାଲି ଏତିକି ନୁହେଁ କରୋନାର ଦ୍ୱତୀୟ ପ୍ରବାହରେ ଦେଶରେ ଅନେକ ବରିଷ୍ଠ ସାମ୍ବାଦିକ ମାନଙ୍କର ଜୀବନ ଯାଇଛି । ଦିଲ୍ଲୀରେ ଅବସ୍ଥାପିତ ଇନଷ୍ଟିଚ୍ୟୁଟ୍ ଅଫ୍ ପରସେପସନ୍ ଷ୍ଟଡିଜର ରିପୋର୍ଟ ମୁତାବକ କରୋନା ସଂକ୍ରମଣରେ ୨୦୨୦ ମସିହା ଏପ୍ରିଲ୍ ରୁ ୨୦୨୧ ମସିହା ମେ ୧୬ ତାରିଖ ସୁଦ୍ଧା ୨୩୮ ସାମ୍ବାଦିକଙ୍କର ମୃତ୍ୟୁ ଘଟିଥିଲା ।

ରିପୋର୍ଟ ଅନୁଯାୟୀ କରୋନାର ପ୍ରଥମ ପ୍ରବାହରେ ୨୦୨୦ ମସିହା ଏପ୍ରିଲରୁ ଡିସେମ୍ବର ୩୧ ମଧ୍ୟରେ ୫୬ ଜଣଙ୍କର ଜୀବନ ଯାଇଥିଲା । ହେଲେ ଏହା ଦ୍ୱିତୀୟ ପ୍ରବାହରେ ଭୟାନକ ସାବ୍ୟସ୍ତ ହୋଇଛି । ୨୦୨୧ ମସିହା ଏପ୍ରିଲ୍ ୧ରୁ  ମେ ୧୬ ତାରିଖ ଭିତରେ ୧୭୧ ସାମ୍ବାଦିକଙ୍କର ଦେହାନ୍ତ ହୋଇଛି । ବାକି ୧୧ ଜଣଙ୍କର ଜାନୁଆରୀରୁ ଏପ୍ରିଲ୍ ମଧ୍ୟରେ ହୋଇଛି ।

ଇନଷ୍ଟିଚ୍ୟୁଟର ନିର୍ଦ୍ଦେଶକ ଡା. କୋଟା ନିଲିମା କହିଛନ୍ତି ଯେ କରୋନା ସଂକ୍ରମଣରେ ୩୦୦ରୁ ଅଧିକ ସାମ୍ବାଦିକଙ୍କର ଜୀବନ ଯାଇଛି ।  ତନ୍ମଧ୍ୟରେ ୨୩୮ ଜଣଙ୍କୁ  ଭେରିଫାଏ କରାଯାଇଥିବା ବେଳେ ଅନ୍ୟମାନଙ୍କ ସମ୍ପର୍କରେ ଯାଞ୍ଚ ଚାଲିଛି ।

ଜାଣନ୍ତୁ, କେଉଁ ରାଜ୍ୟରୁ କେତେ…

ତେବେ ଡାଟା ମୁତାବକ ଉତ୍ତର ଭାରତରେ ୩୭ ସାମ୍ବାଦିଙ୍କର ଜୀବନ ଯାଇଛି । ତେଲେଙ୍ଗାନାରେ ୩୯, ଦିଲ୍ଲୀରେ ୩୦ ମହାରାଷ୍ଟ୍ର ୨୪, ଓଡ଼ିଶାରେ ୨୬, ମଧ୍ୟ ପ୍ରଦେଶରେ ୧୯ ଜଣ ସାମ୍ବାଦିକଙ୍କର ଦେହାନ୍ତ ଘଟିଛି । ଅପରପକ୍ଷେ ୮୨ ଜଣଙ୍କୁ ଭେରିଫାଏ କରାଯାଇ ପାରିନାହିଁ ।