ସାରା ବିଶ୍ବରେ ଚାଲିଲା ଟ୍ରମ୍ପ ଟାରିଫରାଜ୍: ପ୍ରଭାବିତ ହେବେ ଭାରତ ସମେତ ଅନେକ ରାଷ୍ଟ୍ର

ସାରା ବିଶ୍ବରେ ଚାଲିଲା ଟ୍ରମ୍ପ ଟାରିଫରାଜ୍ । ଭାରତ ସମେତ ଅଧିକାଂଶ ରାଷ୍ଟ୍ର ଉପରେ ଟାରିଫ ଲାଗୁ କରିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ । ଭାରତରୁ ଆମଦାନୀ ଉପରେ ୨୬ ପ୍ରତିଶତ ଟାରିଫ ଲାଗୁ ହୋଇଛି । ତେବେ ଆମେରିକା ଉପରେ ବିଭିନ୍ନ ରାଷ୍ଟ୍ର ଯେତିକି ଲେଭି ଲାଗୁ କରିଛନ୍ତି ଏହି ଟାରିଫ ତାହାର ଅଧା ବୋଲି କହିଛନ୍ତି ଟ୍ରମ୍ପ । ଆମେରିକାରୁ ଆମଦାନୀ ଉପରେ ଭାରତ ୫୨ ପ୍ରତିଶତ ଟାରିଫ ଲାଗୁ କରୁଥିବାବେଳେ ଆମେରିକା ଭାରତ ଉପରେ ୨୬ ପ୍ରତିଶତ ଲାଗୁ କରିଥିବା କହିଛନ୍ତି । ଆସନ୍ତା ଏପ୍ରିଲ ୫ ରାତି ୧୨ଟା ୦୧ରୁ ବେସଲାଇନ ଟାରିଫ ଓ ଏପ୍ରିଲ ୯ ରାତି ୧୨ଟା ୦୧ରୁ ପରିବର୍ଦ୍ଧିତ ଟାରିଫ ନୀତି କାର୍ଯ୍ୟକାରୀ ହେବ ।

ଯେଉଁ ରାଷ୍ଟ୍ରଗୁଡିକ ଆମେରିକା ସହ ବାଣିଜ୍ୟରେ ଅଧିକ ନିଅଣ୍ଟିଆ ସ୍ଥିତିରେ ରହିଛନ୍ତି ସେହି ରାଷ୍ଟ୍ରଗୁଡିକ ଉପରେ କମ୍ ଟାରିଫ ଅର୍ଥାତ ୧୦ରୁ ୪୯ ପ୍ରତିଶତ ଯାଏ ଟାରିଫ ଲାଗୁ ହୋଇଛି । ଏହା ସହ ଆମେରିକାରେ ଆସେମ୍ବଲ ହେଉ ନଥିବା ଅଟୋମୋବାଇଲ କ୍ଷେତ୍ରରେ ୨୫ ପ୍ରତିଶତ ଟାରିଫ ଘୋଷଣା ହୋଇଛି । ଏହା ଏପ୍ରିଲ 3ରୁ ଲାଗୁ ହେବ । ଏହି ନିଷ୍ପତ୍ତି ଯୋଗୁ ଆମେରିକାରୁ ବିଦେଶକୁ ଯାଉଥିବା ଗାଡି ଦାମ ବଢିବ । ଆମେରିକାର ଅର୍ଥନୈତିକ ସ୍ବାଧୀନତା ଲାଗି ଏହି ସବୁ ପଦକ୍ଷେପ ନିଆଯାଇଛି ବୋଲି କହିଛନ୍ତି ଟ୍ରମ୍ପ । ଦୀର୍ଘ ୫୦ ବର୍ଷ ଧରି ଆମେରିକୀୟ କରଦାତାମାନେ ପଡିଥିବା ସଙ୍କଟରୁ ମୁକ୍ତି ପାଇବେ ବୋଲି ସେ କହିଛନ୍ତି । ନୂଆ ନୀତି ଫଳରେ ଚୀନ ଉପରେ ୩୪ ,ୟୁରୋପୀୟ ୟୁନିଅନ ଉପରେ ୨୦, ଦକ୍ଷିଣ କୋରିଆ ଉପରେ ୨୫, ଜାପାନ ଉପରେ ୨୪ ଓ ତାଇଓ୍ବାନ ଉପରେ ୩୨ ପ୍ରତିଶତ ଆମଦାନୀ ଶୁଳ୍କ ଲାଗୁ ହୋଇଛି ।.