ଚରମ ସୀମାରେ ସାମ୍ପ୍ରଦାୟିକ ହିଂସା , ପୁଣି ମାମଲାର ଶୁଣାଣି କରିବେ ସିଜେଆଇଙ୍କ ଖଣ୍ଡପୀଠ

ଇମ୍ଫାଲ : କୁକୀ-ମିତେଇ ବିବାଦରେ ଜଳୁଛି ମଣିପୁର । ଜନଜାତି ମାନ୍ୟତାକୁ ନେଇ ଚରମ ସୀମାରେ ପହଞ୍ଚିଛି ସାମ୍ପ୍ରଦାୟିକ ହିଂସା । ମଣିପୁରର ବର୍ବର ଭିଡିଓ ଭାଇରାଲକୁ ନେଇ ସରକାରଙ୍କ ଉପରେ ବର୍ଷିଛନ୍ତି ସୁପ୍ରିମକୋର୍ଟ । ଆଜି ଦିନ ୨ଟାରେ ପୁଣି ମାମଲାର ଶୁଣାଣି କରିବେ ସିଜେଆଇଙ୍କ ଖଣ୍ଡପୀଠ। ଗତକାଲି ମଣିପୁର ପୀଡ଼ିତାଙ୍କ ପିଟିସନର ଶୁଣାଣି କରି ସରକାରଙ୍କ ଉପରେ ବର୍ଷିଥିଲେ ପ୍ରଧାନ ବିଚାରପତିଙ୍କ ଖଣ୍ଡପୀଠ। ତିନି ମାସ ଧରି ମଣିପୁର ଜଳୁଥିବା ବେଳେ ପୋଲିସ କ’ଣ କରୁଥିଲା ବୋଲି ଖଣ୍ଡପୀଠ ପ୍ରଶ୍ନ କରିଥିଲେ ।

ମହିଳାଙ୍କୁ ଉଲଗ୍ନ କରି ପରେଡ କରାଇବା ଘଟଣାର ୧୪ଦିନ ଯାଏଁ କାହିଁକି FIR ହୋଇ ନଥିଲା ? ହିଂସା ପରଠୁ ପୋଲିସ କେତେ ମାମଲା ରୁଜୁ କରିଛି? ଅଭିଯୁକ୍ତଙ୍କୁ ଗିରଫ କରିବାକୁ କ’ଣ କ’ଣ ପଦକ୍ଷେପ ନିଆଯାଇଛି ? ଧାରା ୧୬୪ରେ କେତେ ଜଣଙ୍କ ବୟାନ ରେକର୍ଡ ହୋଇଛି ? ଏସବୁର ରିପୋର୍ଟ ଦେବାକୁ କହିଛନ୍ତି କୋର୍ଟ । ସେପଟେ ଗୃହରେ ମଧ୍ୟ ମଣିପୁର ପ୍ରସଙ୍ଗରେ ଅଚଳାବସ୍ଥା ଜାରି ରହିଛି । ଗ୍ରାଉଣ୍ଡ ଜିରୋରେ ସ୍ଥିତି ସମୀକ୍ଷା ପରେ ମଣିପୁର ସ୍ଥିତି ପାଇଁ ସରକାରଙ୍କ ଅବହେଳାକୁ ଦାୟୀ କରିଛନ୍ତି ବିରୋଧୀ।