ପ୍ରେମିକାକୁ ପେଟ୍ରୋଲ ଢ଼ାଳି ଜାଳୁଥିଲା, ନିଜେ ଜଳି ମରିଗଲା ପ୍ରେମିକ
ମୁମ୍ବାଇ: କଥାରେ ଅଛି ଯେ ପାଞ୍ଚେ ପରମନ୍ଦ, ତା ମନ୍ଦ ପାଞ୍ଚନ୍ତି ଗୋବିନ୍ଦ । ଏଠି ଠିକ୍ ସେମିତି ହୋଇଛି । ଅନ୍ୟକୁ ପେଟ୍ରୋଲ୍ ଢାଳି ହତ୍ୟା ପାଇଁ ଉଦ୍ୟମ କରିଥିବା ବ୍ୟକ୍ତି ନିଜେ ଜଳିପୋଡ଼ି ମରିଛି । ଆଶ୍ଚର୍ଯ୍ୟକର ଘଟଣା ଘଟିଛି ମହାରାଷ୍ଟ୍ରର ମୁମ୍ବାଇର ମେଘୱାଡ଼ି ଅଞ୍ଚଳରେ । ପୁରୁଷ ଜଣଙ୍କ ଯୁବତୀଙ୍କୁ ପେଟ୍ରୋଲ୍ ଢାଳି ନିଆଁ ଲଗାଇ ଦେଇଥିଲେ । ଜଳୁଥିବା ଅବସ୍ଥାରେ ଯୁବତୀ ଜଣଙ୍କ ପୁରୁଷଙ୍କୁ ଜାବୁଡ଼ି ଧରିଥିଲେ । ଫଳରେ ଦୁହେଁ ନିଆଁରେ ଜଳି ଯାଇଥିଲେ । ପୁରୁଷ ଜଣଙ୍କର ମୃତ୍ୟୁ ହୋଇଥିବା ବେଳେ ମରଣ ସହ ଜୀବନ ପାଇଁ ଲଢ଼ୁଛନ୍ତି ଯୁବତୀ ।
ପୋଲିସ ଅଭିଯୁକ୍ତ ଯୁବକ ବିଜୟ ଖମ୍ବେଙ୍କ ନାଁରେ ମାମଲା ରୁଜୁ କରିବା ସହ ତଦନ୍ତ ଚଳାଇଛି । ଅଭିଯୁକ୍ତର ମୃତ୍ୟୁ ଘଟିଥିବା ବେଳେ ସଙ୍କଟାପନ୍ନ ଅବସ୍ଥାରେ ଜେଜେ ହସ୍ପିଟାଲରେ ଚାଲିଛି ପୀଡ଼ିତାଙ୍କ ଚିକିତ୍ସା । ପୀଡ଼ିତାଙ୍କ ଅବସ୍ଥା ବହୁତ ଚିନ୍ତାଜନକ ଥିବା ପୋଲିସକୁ ଚିକିତ୍ସା କରୁଥିବା ଡାକ୍ତର କହିଛନ୍ତି ।
ମୁମ୍ବାଇର ପୂର୍ବ ଜାଗେଶ୍ୱରୀର ଗାନ୍ଧି ନଗରରେ ରହୁଥିବା ଅଭିଯୁକ୍ତ ବିଜୟ ଓ ପୀଡ଼ିତା ଯୁବତୀ ଉଭୟଙ୍କୁ ୬ ବର୍ଷ ହେଲା ଜାଣିଥିଲେ । ବିଜୟ, ଯୁବତୀ ଜଣଙ୍କୁ ବିବାହ କରିବାକୁ ଚାହୁଁଥିଲା । କିନ୍ତୁ, ବିବାହ ପ୍ରସ୍ତାବକୁ ପ୍ରତ୍ୟାଖ୍ୟାନ କରି ଦେଇଥିଲେ ଯୁବତୀଙ୍କ ପରିବାର । ଏହା ପରେ ବିଜୟ ମୁଣ୍ଡରେ ଚଢ଼ିଥିଲା ବିବାହର ଭୂତ । ସେବେଠୁ ବିଜୟ, ଯୁବତୀ ଜଣଙ୍କୁ ହଇରାଣ ହରକତ କରି ଚାଲିଥିଲା । କେତେବେଳେ ମଦ ପିଇ ପାଟିତୁଣ୍ଡ କରୁଥିଲା ତ ଆଉ କେବେ ପିଛା କରୁଥିଲା । ଏସବୁ ଭିତରେ ବିଜୟଙ୍କୁ ଭୁଲିଯିବାକୁ ଚେଷ୍ଟା କରୁଥିଲେ ଯୁବତୀ ।
ଫେବ୍ରୁଆରୀ ୬ ରାତିରେ ବିଜୟ ମାମଲାକୁ ଶେଷ କରିବାକୁ ନିଷ୍ପତ୍ତି ନେଇଥିଲା । ଦେହ ଭଲ ନଥିବାରୁ ଯୁବତୀ ଜଣଙ୍କ ଘରେ ବିଶ୍ରାମ କରୁଥିଲେ । ଘରେ କେହିନଥିବାର ସୁଯୋଗ ନେଇ ଯୁବତୀଙ୍କ ପାଖରେ ପହଞ୍ଚିଥିଲା ବିଜୟ । ପେଟ୍ରୋଲ ଢାଳି ଯୁବତୀଙ୍କ ଦେହରେ ନିଆଁ ଲଗାଇ ଦେଇଥିଲା । ଜଳୁଥିବା ଅବସ୍ଥାରେ ଯୁବତୀ, ବିଜୟକୁ ଜାବୁଡ଼ି ଧରି ନେଇଥିଲା ।
ଉଭୟ ଜଳୁଥିବା ଅବସ୍ଥାରେ ଘରୁ ବାହାରକୁ ଆସିବା ପରେ ସ୍ଥାନୀୟ ଲୋକ ନିଆଁ ଲିଭାଇଥିଲେ । ଉଭୟଙ୍କୁ ଟ୍ରମା ସେଣ୍ଟରରେ ଭର୍ତ୍ତି କରାଯାଇଥିଲା । ପରେ ଡାକ୍ତର ଜେଜେ ହସ୍ପିଟାଲ ସ୍ଥାନାନ୍ତର କରିଥିବା ବେଳେ ଶନିବାର ସନ୍ଧ୍ୟାରେ ବିଜୟର ମୃତ୍ୟୁ ହୋଇଛି । ଏବେ ଯୁବତୀ ଜଣଙ୍କ ମେଡିକାଲ ବେଡରେ ମୃତ୍ୟୁ ସହ ଜୀବନ ସଂଗ୍ରାମ କରୁଛନ୍ତି । ତାଙ୍କ ସ୍ୱାସ୍ଥ୍ୟାବସ୍ଥା ଗମ୍ଭୀର ଥିବା କୁହାଯାଉଛି ।
