ସିମେଣ୍ଟ ଦୋକାନରୁ ୨୫ହଜାର ଟଙ୍କା ଲୁଟିନେଲା ଦୁର୍ବୁତ୍ତ

ଭୁବନେଶ୍ୱର: ଭୁବନେଶ୍ୱର ନିଳାଦ୍ରୀବିହାର ରେ ଥିବା ଏକ ସିମେଣ୍ଟ ଦୋକାନରୁ ଲୁଟ୍ । ସିମେଣ୍ଟ କିଣିବା ବାହାନାରେ ଆସି ଦୋକାନ କ୍ୟାସ କାଉଣ୍ଟରରୁ ୨୫ହଜାର ଟଙ୍କା ଲୁଟିନେଲା ଦୁର୍ବୁତ୍ତ । ଲୁଟର ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ଏ ନେଇ ଚନ୍ଦ୍ରଶେଖରପୁର ଥାନାରେ ଏକ ମାମଲା ଦାୟର ହୋଇଛି ।

ପୋଲିସ ଘଟଣାର ତଦନ୍ତ କରୁଛି । ଗତକାଲି ସନ୍ଧ୍ୟାରେ ଜଣେ ବ୍ୟକ୍ତି ସିମେଣ୍ଟ କିଣିବାକୁ ନିଳାଦ୍ରୀବିହାରରେ ଥିବା ପ୍ରଭୁମହିମା ସିମେଣ୍ଟ ଦୋକାନକୁ ଆସିଥିଲେ । ଦୋକାନୀଙ୍କ ସହ ସିମେଣ୍ଟର ଦର ଓ ବ୍ରାଣ୍ଡକୁ ନେଇ ପଚରା ଉଚରା କରିବା ପରେ, ସିମେଣ୍ଟ ବସ୍ତା ଦେଖିବାକୁ ଗୋଦାମକୁ ଯିବାକୁ କହିଥିଲେ । ଏହି ସମୟରେ ଦୋକାନ ମାଲିକ ଗୋଦାମ ଚାବି ନେଇ, ସଂପୃକ୍ତ ବ୍ୟକ୍ତିଙ୍କୁ ସିମେଣ୍ଟ ଦେଖାଇବାକୁ ଯିବା ବେଳେ କ୍ୟାସ କାଉଣ୍ଟରରୁ ୨୫ହଜାର ଟଙ୍କାର ବଣ୍ଡଲ ନେଇଯାଇଥିଲେ ସଂପୃକ୍ତ ବ୍ୟକ୍ତି ।

ସିମେଣ୍ଟ ଦେଖିବା ପରେ, ପରେ ଆସିବେ ବୋଲି କହି ଚାଲିଯାଇଥିଲେ । ଦୋକାନ ମାଲିକ କ୍ୟାସ ବକ୍ସ ଖୋଲିବା ପରେ ସେଥିରେ ୨୫ହଜାର ଟଙ୍କାର ବଣ୍ଡଲ ନଥିବା ଦେଖି, ସିସିଟିଭି ଚେକ୍ କରିଥିଲେ । ସେଥିରେ ସଂପୃକ୍ତ ବ୍ୟକ୍ତି ଜଣକ କ୍ୟାସ ବକ୍ସରୁ ଟଙ୍କା ଲୁଟି ନେଇଥିବା ଦେଖିବାକୁ ମିଳିଥିଲା ।