ଜ୍ୱାଇଁକୁ ପିଟିପିଟି ମାରିଦେଲେ ଶ୍ଵଶୁର ଘର ଲୋକ

ବଲାଙ୍ଗୀର: ପାରିବାରିକ କଳହର କରୁଣ ପରିଣତି । ଜ୍ୱାଇଁକୁ ପିଟିପିଟି ମାରିଦେଲେ ଶ୍ଵଶୁର ଘର ଲୋକ । ବସ୍ତାରେ ବାନ୍ଧି ଜଙ୍ଗଲରେ ଫିଙ୍ଗିବା ଉଦ୍ୟମ ବେଳେ ପୋଲିସ ପହଞ୍ଚି ମୃତଦେହ ଜବତ କରିଛି । ଶ୍ବଶୁର ସହ ୫ଜଣଙ୍କୁ ଅଟକ ରଖାଯାଇଛି । ବଲାଙ୍ଗୀର ଜିଲ୍ଲା ଖପ୍ରାଖୋଲ ଥାନା ଚାବ୍ରିପାଲି ଗାଁର ଘଟଣା । ମୃତକ ହେଲେ ବରଗଡ଼ ଜିଲ୍ଲା ରାଜଭାଟିପଡ଼ାର ରୁଦ୍ର ମେହେର । ଖପ୍ରାଖୋଲ ଚାବ୍ରିପାଳି ଗାଁରେ ରାଜଭାଟିପଡ଼ାର ରୁଦ୍ର ମେହେର ବିବାହ କରିଥିଲେ I ବିବାହ ପରଠୁ ଶ୍ୱଶୁର ଘର ସହ କଳହ ଲାଗି ରହିଥିଲା I

ଗତ ବୁଧବାର ଦିନ ତାଙ୍କ ସ୍ତ୍ରୀ ସରୋଜିନୀ ମେହେର ଏକ ବିବାହ ଉତ୍ସବକୁ ଯାଇଥିଲେ I ଜ୍ବାଇଁ ଓ ଶ୍ୱଶୁର ଘର ଲୋକେ ଘରେ ଥିବା ସମୟରେ କୌଣସି କଥାକୁ ନେଇ କଳହ ସୃଷ୍ଟି ହୋଇଥିଲା I ଉତକ୍ଷୀପ୍ତ ହୋଇ ଶ୍ୱଶୁର ଘର ଲୋକ ରୁଦ୍ରଙ୍କୁ ପିଟିଥିଲେ । ଆକ୍ରମଣରେ ରୁଦ୍ରଙ୍କ ମୃତ୍ୟୁ ପରେ ଘଟଣାକୁ ଚପାଇବା ପାଇଁ ଏକ ଭ୍ୟାନରେ ମୃତଦେହ ନେଇ ଜଙ୍ଗଲରେ ଫିଙ୍ଗିବାକୁ ଉଦ୍ୟମ କରୁଥିବା ବେଳେ ପୋଲିସ ମୃତଦେହ ଜବତ କରିଛି । ଶ୍ୱଶୁର ସହ ୫ ଜଣଙ୍କୁ ଅଟକ ରଖି ତଦନ୍ତ କରୁଛି ପୋଲିସ । ଶ୍ୱଶୁର ଉଦ୍ଧବ ମେହେର, ଅନିରୁଦ୍ଧ ମେହେର, ସୁନିଲ କୁମାର ମେହେରଙ୍କ ସହ ଅନ୍ୟ ଦୁଇ ଜଣଙ୍କୁ ଅଟକ ରଖାଯାଇଛି ।