ଶରଣକୁଳ: ଛୁଆକୁ ମାରିବାକୁ ସ୍ତ୍ରୀ ରାଜି ନହେବାରୁ ସ୍ବାମୀର ଆତ୍ମହତ୍ୟା ଅଭିଯୋଗ। ନୟାଗଡ଼ ଜିଲ୍ଲା ଶରଣକୁଳ ଥାନା ତୋଡିବାରୀ ଗାଁରେ ଘଟିଛି ଏଭଳି ଚାଞ୍ଚଲ୍ୟକରଣ ଘଟଣା। ୨୧ଦିନର ଶିଶୁକନ୍ୟାକୁ ମାରିବାକୁ ସ୍ତ୍ରୀ ରାଜି ନହେବାରୁ ସ୍ବାମୀ ଆତ୍ମହତ୍ୟା କରିଥିବାନେଇ ଥାନାରେ ଅଭିଯୋଗ କରିଛନ୍ତି ସ୍ତ୍ରୀ।
ସ୍ତ୍ରୀ ସୁମିତ୍ରା ନାଏକଙ୍କ ଅଭିଯୋଗ ଅନୁସାରେ ସମ୍ବିଦ ସାହୁଙ୍କୁ ସେ ପ୍ରେମ ବିବାହ କରିଥିଲେ। ଅଲଗା ଜାତିର ହୋଇଥିବାରୁ ସମ୍ବିତଙ୍କ ପରିବାର ତାଙ୍କୁ ଗ୍ରହଣ କରିନଥିଲେ । ପରେ ଉଭୟଙ୍କର ବିବାହ ବିଚ୍ଛେଦ ହୋଇଥିଲା । ଗଣିଆରେ ବାପାମାଆଙ୍କ ସହ ସେ ରହୁଥିବା ସମୟରେ ପୁଣି ତାଙ୍କ ସହିତ ସମ୍ପର୍କ ରଖିଥିଲେ ସମ୍ବିତ। ପରେ ତାଙ୍କର ଏକ ଶିଶୁକନ୍ୟା ଜନ୍ମ ହୋଇଥିଲା।
ଛୁଆଟିକୁ ୨୧ଦିନ ହୋଇଥିବାବେଳେ ତାକୁ ହତ୍ୟା କରିବାକୁ ଜିଦ୍ ଧରିଥିଲା ସ୍ବାମୀ। ଏନେଇ ସୁମିତ୍ରା ରାଜି ନହେବାରୁ ସମ୍ବିତ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ପୋଲିସ କହିଛି।
