ଶ୍ୱଶୂର ଘର ଯିବାବେଳେ ଗୁଡ଼ି ସୂତାରେ କଟିଗଲା ବେକ
କଟକ: ପୁଣି ଜୀବନ ନେଲା ମାଞ୍ଜା ସୂତା । ମାଞ୍ଜା ସୂତାରେ ବେକ କଟି ଯୁବକଙ୍କ ମୃତ୍ୟୁ ହୋଇଛି । ଜଗତପୁର ପୀରବଜାର ଅଞ୍ଚଳରେ ଘଟିଛି ଏହି ଘଟଣା । ମୃତ ଯୁବକ ହେଲେ ସ୍ଥାନୀୟ ଭୟରପୁରର ଜୟନ୍ତ ସାମଲ । ଅପରାହ୍ଣ ୪ଟା ବେଳେ ଜୟନ୍ତ ନିଜ ବାଇକ୍ ଯୋଗେ ତାଙ୍କ ସ୍ତ୍ରୀଙ୍କ ସହ ଶ୍ୱଶୂର ଘରକୁ ଯିବା ବେଳେ ପୀରବଜାର ଠାରେ ଏହି ଅଘଟଣ ଘଟିଛି । ଗୁଡ଼ି ଉଡାଇବା ପାଇଁ ବ୍ୟବହାର କରାଯାଉଥିବା ବେଆଇନ୍ ମାଞ୍ଜା ସୂତାରେ ତାଙ୍କ ବେକ କଟି ଯାଇଛି ।
ସୂତାଟି ଅତି ଶକ୍ତ ଥିବାରୁ ବର୍ତ୍ତି ପାରିନଥିଲେ ଜୟନ୍ତ । ପ୍ରଥମେ ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ବେଆଇନ୍ ଘୋଷିତ ମାଞ୍ଜା ସୂତା ବିକ୍ରି ଏବଂ ଉଡ଼ାଉଥିବା ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଜଗତପୁର ଥାନାରେ ଏତଲା ଦେଇଛନ୍ତି ପରିବାର ଲୋକ ।
