କଟକ: କାଠଯୋଡ଼ି ନେତାଜୀ ସେତୁରୁ ନଦୀକୁ ଡେଇଁ ଶଳାଭାଉଜ-ନଣନ୍ଦେଇ ଆତ୍ମହତ୍ୟା ଘଟଣା ନୂଆ ରୂପ ନେଇଛି। ଗତକାଲି ରାତିରୁ ଅଗ୍ନିଶମ ବାହିନୀ କାଠଯୋଡ଼ି ସେତୁ ତଳୁ ଏକ କିଲୋମିଟର ତଳ ପର୍ଯ୍ୟନ୍ତ ସର୍ଚ୍ଚ ଅପରେସନ ଜାରି ରଖିଥିଲା। ହେଲେ ଆଜି ସକାଳୁ ଉଭୟ ପୁରୀଘାଟ ଥାନାରେ ଆସି ପହଞ୍ଚିଛନ୍ତି। ପୋଲିସ ସେମାନଙ୍କର ପ୍ରାଥମିକ ରିପୋର୍ଟ କରି ଡାକ୍ତରୀ ପରୀକ୍ଷା ପାଇଁ ସିଟି ହସ୍ପିଟାଲ ପଠାଇଛି।
ସେମାନେ ନଦୀରେ ପଡି ଭାସି ଯାଉଥିବା ବେଳେ ଘାସ ବୁଦାରେ ଲାଗି ପହଁରି ପହଁରି କୂଳକୁ ଆସିଥିବା ପୋଲିସ ଆଗରେ କହିଛନ୍ତି। ତେବେ ସେମାନେ ପିନ୍ଧିଥିବା ପୋଷାକକୁ ଦେଖିଲେ ସେଭଳି ଲାଗୁନାହିଁ। ଅନ୍ଯପଟେ ଆତ୍ମହତ୍ୟା ଉଦ୍ୟମ କରିଥିବା କୃଷ୍ଣ ମୁଦୁଲିଙ୍କ ପତ୍ନୀ ଆସି ଥାନାରେ ପହଞ୍ଚିଛନ୍ତି। କଟକ ଆସିଷ୍ଟାଣ୍ଟ ଫାୟାର ଅଫିସର ସଂଜୀବ କୁମାର ବେହେରା ପୁରୀଘାଟ ଥାନାରେ ପହଞ୍ଚି ଘଟଣା ସଂପର୍କରେ ପଚରାଉଚୁରା କରିଛନ୍ତି।
ସେ କହିଛନ୍ତି ଆଜି ସକାଳ ୯ଟା ପର୍ଯ୍ୟନ୍ତ ସର୍ଚ୍ଚ ଅପରେସନ ଜାରି ରହିଥିଲା। ସେମାନଙ୍କୁ ପଚରାଉଚୁରା କରାଯିବ। ସେମାନେ ଯାହା କହୁଛନ୍ତି ସେଥିରେ ସତ୍ଯତା ଅଛିକି ନାହିଁ ଅନୁଧ୍ୟାନ କରାଯିବ । ଯଦି ମିଛ ଘଟଣା ହୋଇଥାଏ ତେବେ ଏ ସଂପର୍କରେ ଆବଶ୍ୟକ ପଡିଲେ ଉଭୟଙ୍କ ନାଁରେ ଏତଲା ଦିଆଯିବ।
