ତାମିଲନାଡ଼ୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ସହ ଆଲୋଚନା କଲେ ମମତା

କୋଲକାତା: ଅଣବିଜେପି ଶାସିତ ରାଜ୍ୟରେ ରାଜ୍ୟପାଳମାନଙ୍କ ଅଗଣତାନ୍ତ୍ରିକ କାର୍ଯ୍ୟଧାରା ପ୍ରସଙ୍ଗ । ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ସହ ଆଲୋଚନା କଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଅଣବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଖୁବ୍ ଶୀଘ୍ର ଏକାଠି ହେବା ନେଇ ଷ୍ଟାଲିନଙ୍କୁ ମମତା କହିଥିବା ସୂଚନା ମିଳିଛି । ରାଜ୍ୟ ସରକାରଙ୍କ ଦ୍ବାରା ପ୍ରସ୍ତୁତ ବିଭିନ୍ନ ବିଲକୁ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସ୍ବୀକୃତି ଦେବା ଲାଗି ଏକ ପ୍ରସ୍ତାବ କିଛି ଦିନ ତଳେ ତାମିଲନାଡ଼ୁ ବିଧାନସଭାରେ ପାରିତ କରାଯାଇଛି । ଏହି ନିୟମ ପାଳନ କରିବାକୁ ବିଭିନ୍ନ ଅଣବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଚିଠି ଲେଖିଛନ୍ତି ଷ୍ଟାଲିନ ।

ଷ୍ଟାଲିନ ଲେଖିଛନ୍ତି- ଭାରତୀୟ ଗଣତନ୍ତ୍ର ଦୋଛକିରେ ରହିଛି । ଏକ ସହଯୋଗୀଭିତ୍ତିକ ସଂଘୀୟ ବ୍ୟବସ୍ଥା କ୍ରମଶଃ ନିଶ୍ଚିହ୍ନ ହେବାରେ ଲାଗିଛି ବୋଲି ଦର୍ଶାଇଛନ୍ତି ଷ୍ଟାଲିନ । ଏହି ପ୍ରସଙ୍ଗରେ ମମତାଙ୍କ ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଓ କେରଳ ମୁଖ୍ୟମନ୍ତ୍ରୀ ପିନରୟି ବିଜୟନ ବି ଷ୍ଟାଲିନଙ୍କ ସହ ଆଲୋଚନା କରିଥିଲେ । ଏହି ପ୍ରସଙ୍ଗରେ କେରଳ ମୁଖ୍ୟମନ୍ତ୍ରୀ ଗୁରୁତର ସହ ବିଚାର କରୁଥିବା ସୂଚନା ମିଳିଛି ।